Ku Tihlanganisa Ni Xivandla Xa Mimoya

EXIVINDZINI xa doroba ra le Afrika Vupela-dyambu ku ni muako wa xithezi xin’we lowu kokaka mahlo, lowu pendiweke hi muvala wo basa ni wa rihlaza. Ekamareni ro amukela vaendzi, ku na vamatsalana vambirhi lava nga eku tsaleni hi michini yo tsala. Vanhu vo hlayanyana va tshame eswitulwini, va yimela ku ya vonana na babaláwo, nyamusoro.

Ehofisini leyi nga ekusuhani, edesikeni, etlhelo ka muchini wo rhumela rungula, ku tshame babaláwo hi byakwe. I munhu lonkulu, misisi yi karhi ya basanyana, a ambale swiambalo swo basa—swo durha, leswi rhungeleriweke minkhaviso. U ri: “Tata wa mina a a ri nyamusoro. Ndzi velekeriwe eka byona. Ndzi kulela eka byona. Loko ndzi ri na ntlhanu wa malembe, a ndzi hamba ndzi famba na tata wa mina loko a ya eku fembeni. A ndzi languta leswaku a a swi endlisa ku yini, ivi ndzi n’wi encisa kukondza loko byi ndzi nghena na mina.”

Babaláwo a a kombetela etlhelo ra xiphepherhele lexi endliweke hi timhandzi lexi hlamuselaka maendlelo ya vunyamusoro yo rharhangana lama tinxaka ta vanhu va ka vona ti ma tirhiseke hi ku siyerisana ka tinxaka ta ntsandza-vahlayi. I endlelo leri ri hangalakeke eAfrika Vupela-dyambu hinkwaro ni le tindhawini tin’wana leri endliwaka hi ku cukumeta 16 wa tinyungu ta murhi wa ncindzu. U ri: “Vanhu va ta eka mina ni swiphiqo swo hambana-hambana. Ku ririwa hi vavasati, vumhika, ku pfumala ntirho, ku hlangana nhloko, rihanyo, ni swin’wana ni swin’wana. Swi ya hi nhlamuselo ya nhlahluvo, ku vutisiwa vakokwana kumbe mavandla ya le tilweni [swikwembu]. Ku nga khathariseki leswaku ku vutisiwa mani, ku fanele ku endliwa muxaka wo karhi wa gandzelo.”

Mikhuva ya vukhongeri bya ndhavuko, ku katsa ni ku hlahluva, swi dzime timitsu endhawini leyi, kambe swi tano ni hi tikereke ta Vujagana. Le kulenyana ni tihofisi ta babaláwo, ku ni miako yo basa leyi nga ni mimfungho emahlweni ka yona leyi nge: Kereke ya Hosi Solomoni II, Tikerubimi ni Tiserafimi, Kereke ya le Tilweni ya Kreste, Kereke ya Vaapostola ya Kreste, Kereke ya Vabi va Titirompita va Kreste. Tikereke leti ti tirhisana ni vukhongeri bya xintu, naswona minkarhi yin’wana ti tekelela mikhuva ya byona. Babaláwo u te: “Ku nga ri khale ngopfu, a ndzi vulavula ni mubixopo. A a te kwala. Endzhaku ka loko hi hete 30 wa timinete hi ri karhi hi bula, u vule leswaku u lava ku va hi kunguhata mbulavurisano wo karhi laha Vakreste ni tin’anga ta xintu va nga ta tshama hansi va vulavurisana, ni ku lulamisa ku nga twanani.”

Tinyangwa To Ya eXivandleni Xa Mimoya

Hakanyingi ku nga twanani koloko ku katsa mhaka ya leswaku i vamani lava va tshamaka exivandleni xa moya. Etindhawini hinkwato leti nga edzongeni wa Sahara, eAfrika, swi pfumeriwa ngopfu leswaku ku ni mintlawa mimbirhi ya vanhu lava hanyaka exivandleni xa moya. Ntlawa wo sungula i wa swikwembu, leswi swi nga si tshamaka swi va vanhu. Ntlawa wa vumbirhi i wa vakokwana, kumbe mimoya ya lava feke, lava ntirho wa vona ku nga ku tiyiseka leswaku mindyangu ya vona leyi nga emisaveni yi hambeta yi hanya naswona yi va ni rifuwo. Ku pfumeriwa leswaku swikwembu na vakokwana swi ni matimba yo pfuna kumbe yo vavisa lava nga emisaveni. Hikwalaho, hinkwavo va fanele va xiximiwa ni ku fundzhiwa hi ndlela leyi faneleke.

Mavonelo yo tano ma kona eswiphen’wini swo tala swa misava. Hinkwako-nkwako vanhu va tirhisa tindlela to hambana-hambana to vulavurisana ni mavandla lama tlakukeke ku tlula munhu, va lava ku tiva hi ta vumundzuku, ni ku lava mpfuno ni nkongomiso eka swiphiqo swa vutomi swa siku na siku. Xana hakunene swa koteka ku kuma mpfuno exivandleni xa moya? Yesu Kreste loyi a tshameke a hanya kona u vule leswaku swa koteka. U te: “Kombelani, mi ta nyikiwa; lavani, mi ta swi kuma; gongondzani, mi ta pfuleriwa.” (Matewu 7:7) Kambe leswaku hi kuma mpfuno wolowo, hi fanele hi kombela eka munhu la faneleke, hi lava hi ndlela leyi nga yona, naswona hi gongondza enyangweni lowu nga wona. Loko hi gongondza enyangweni lowu hoxeke, wu nga ha pfuriwa hi munhu un’wana loyi a nga ta hi endla swo biha ematshan’weni yo hi pfuna.

Hikwalaho, i swa nkoka ku tiva leswaku i vamani lava tshamaka exivandleni xa moya ni lava va nga tshamiki kona. Nakambe hi fanele hi tiva ku hambana exikarhi ka lava va nga hi pfunaka ni lava va nga hi vavisaka. Eku heteleleni, hi fanele hi tiva leswaku hi fanele hi endla yini leswaku lava va nga hi pfunaka va ta kota ku hi pfuna. Swihloko leswi landzelaka swi ta kambisisa timhaka leti.

[Xifaniso lexi nga eka tluka 1]

Photo on pages 3-4: The Star, Johannesburg, S.A.