Ku Tshika Vugevenga Lebyi Hleriweke—“A Ndzi Ri Yakuza”

“PAPA, loko u vuya ekaya, a hi ye eminhlanganweni swin’we. Ndzi tshembise, xana u ta endla tano ke?” Ndzi kume papila leri leri humaka eka n’wana wa mina wa vumbirhi wa nhwanyana loko ndza ha ri ekhotsweni eka khamba ra vunharhu. A a hlanganyela minhlangano ya Timbhoni ta Yehovha nkarhi na nkarhi ni nsati wa mina. Tanihi leswi mapapila lama humaka endyangwini wa mina a ma ri xona ntsena xihlovo xa xikhutazo, ndzi n’wi tshembise leswaku ndzi ta endla hilaha a kombeleke hakona.

Ndzi tivutisile, ‘Ha yini ndzi hanya vutomi bya vugevenga lebyi ndzi hambanisaka ni ndyangu wa mina?’ Ndzi tsundzuke masiku lawa a ndza ha ri ntsongo swinene ha wona. Tatana u love loko ndza ha ri ni tin’hweti ta 18 hi vukhale ntsena, kutani a ndza ha xi tsundzuki ni xikandza xa yena. Endzhaku ka sweswo Manana u nghenele vukati kambirhi. Swiyimo swo tano swa ndyangu swi ndzi khumbe swinene, naswona loko ndzi ri exikolweni xa le henhla ndzi sungule ku tihlanganisa ni ntlawa wa swigevenga. Ndzi sungule ku va ni tihanyi naswona hakanyingi a ndzi katseka eka tinyimpi leti a ti va kona ehandle ka xikolo. Loko ndzi ri ni malembe mambirhi ndzi ri exikolweni xa le henhla, ndzi hlele ntlawa wa swichudeni leswaku wu ya lwa ni ntlawa wun’wana. Hikwalaho ka sweswo, ndzi khomiwile ivi ndzi rhumeriwa ekhotsweni swa xinkarhana.

A ndzi fana ni bolo leyi khungulukelaka ehansi evuton’wini bya madzolonga. Hi ku hatlisa ndzi vumbe vuthu ra vantshwa lava tsemeke mibya, naswona a hi fambisa nkarhi ehofisini ya ntlawa wa yakuza. Loko ndzi ri ni malembe ya 18, ndzi ve xirho xa ntlawa wolowo hi ku helela. Loko ndzi ri ni malembe ya 20, ndzi khotsiwile hikwalaho ka swiendlo swo hambana-hambana swa madzolonga naswona ndzi gweviwe ku tshama malembe manharhu ekhotsweni. Ro sungula, ndzi pfaleriwe eKhotsweni ra Lavantshwa le Nara, kambe mahanyelo ya mina a ma antswanga. Kutani ndzi rhumeriwe eka khotso rin’wana, ra vanhu lavakulu. Kambe ndzi nyanyile naswona ndzi hetelele ndzi ri eKyoto ekhotsweni ra swigevenga leswi omeke tinhloko.

Ndzi tivutisile, ‘Ha yini ndzi ya emahlweni ndzi endla vugevenga byo tanihi lebyi?’ Loko ndzi anakanya endzhaku, ndza swi xiya leswaku a ku ri hikwalaho ka ku ehleketa ka mina ka vuphukuphuku. Hi nkarhi wolowo, a ndzi ehleketa leswaku mahanyelo yo tano a ma ri ya vunhenha, a ku ri xikombiso xa vununa bya mina. Loko ndzi ntshunxiwile ekhotsweni loko ndzi ri ni malembe ya 25, swigevenga-kulorhi a swi ndzi xixima tanihi munhu wo hlawuleka. Sweswi ndlela a yi ndzi pfulekerile leswaku ndzi lava xikhundlha lexi tlakukeke etimhakeni ta vugevenga.

N’wangulo Wa Ndyangu Wa Ka Hina

Ndzi nghenele vukati hi nkarhinyana wolowo, naswona hi ku hatlisa mina ni nsati wa mina hi ve ni vana vambirhi va vanhwanyana. Kambe, vutomi bya mina a byi cincanga. A ndzi tshama ekhotsweni ni le kaya—a ndzi ba vanhu ni ku va dyelela. Xiendlakalo xin’wana ni xin’wana xi endle leswaku ndzi tshama ndzi xiximiwa hi swigevenga-kulorhi ni ku tshembiwa hi mulanguteri. Eku heteleleni, yakuza lonkulu eka mina “makwerhu” u fikelele emaninginingini ivi a va mulanguteri. Ndzi hlawuriwile leswaku ndzi va wa vumbirhi ku suka eka yena.

Ndzi anakanyile, ‘Xana nsati wa mina ni vana va mina va titwa njhani malunghana ni ndlela ya mina ya vutomi?’ Va fanele va khomiwa hi tingana ku va ni nuna ni tatana la nga xigevenga. Ndzi tlhele ndzi khomiwa loko ndzi ri ni malembe ya 30 ndzi tlhela ndzi khomiwa loko ndzi ri na 32. Hi nkarhi lowu, xigwevo xa malembe manharhu ekhotsweni a xi ndzi tikela swinene ku xi tiyisela. Vana va mina a va nga pfumeleriwi ku ndzi endzela. A ndzi navela ku vulavula na vona ni ku va angarha.

Hi nkarhi lowu ndzi sunguleke ku tirhela xigwevo xa mina xo hetelela ekhotsweni, nsati wa mina u sungule ku dyondza Bibele ni Timbhoni ta Yehovha. Siku rin’wana ni rin’wana a a ndzi tsalela mayelana ni ntiyiso lowu a wu dyondza. Ndzi tivutisile, ‘Xana i yini ntiyiso lowu nsati wa mina a vulavulaka ha wona?’ Ndzi hlaye Bibele hinkwayo loko ndza ha ri ekhotsweni. Ndzi anakanyisise hi leswi nsati wa mina a a swi vula eka mapapila ya yena malunghana ni ntshembo wa vumundzuku na mayelana ni xikongomelo xa Xikwembu.

Ntshembo wa leswaku vanhu va ta hanya hilaha ku nga heriki eParadeyisini emisaveni a wu ndzi tsakisa hikuva rifu a ri ndzi chavisa hakunene. Minkarhi hinkwayo a ndzi anakanya, ‘Loko u fa, hi wena u lahlekeriwaka.’ Loko ndzi languta endzhaku, ndza swi xiya leswaku a ku ri ku chava rifu loku ndzi susumeteleke ku vavisa van’wana va nga si ndzi vavisa. Mapapila ya nsati wa mina na wona ma ndzi endle ndzi vona ku pfumala nkoka ka xikongomelo xa mina xo lava ku va emaninginingini ya vugevenga.

Hambiswiritano, a ndzi susumetelekanga ku dyondza ntiyiso. Nsati wa mina u tinyiketerile eka Yehovha ivi a va un’wana wa Timbhoni ta yena leti khuvuriweke. Hambileswi epapileni ra mina ndzi pfumeleke leswaku ndzi ta ya eminhlanganweni ya vona, a ndzi nga ehleketi hi ku va un’wana wa Timbhoni ta Yehovha. A ndzi twa onge nsati wa mina ni vana a va ri ekule swinene, va ndzi siye endzhaku.

Ku Ntshunxiwa eKhotsweni

Siku ra ku ntshunxiwa ka mina ri kale ri fika. Enyangweni ya Khotso ra le Nagoya, swigevenga swo tala a swi longolokile swi lava ku ndzi amukela. Hambiswiritano, entshungwini lowukulu wa vanhu, a ndzi lava nsati wa mina ni vana va mina. Loko ndzi vona vana va mina, lava a va kurile swinene eka malembe manharhu ni tin’hweti ta tsevu, swi ndzi endle ndzi rila.

Endzhaku ka masiku mambirhi ndzi ye ekaya, ndzi hetisise xitshembiso xa mina eka n’wana wa mina wa vumbirhi ivi ndzi ya enhlanganweni wa Timbhoni ta Yehovha. Ndzi hlamarisiwe hi ku vona langutelo ra ntsako eka hinkwavo lava a va ri kona. Timbhoni ti ndzi amukele hi malwandla, kambe ndzi titwe ndzi lahlekile. Loko endzhakunyana ndzi xiye leswaku lava ndzi pfuxeleke a va byi tiva vugevenga bya mina, a ndzi pfilunganyekile. Kambe, ndzi khumbiwe hi ntwela-vusiwana wa vona, naswona ndzi kokiwe hi nkulumo leyi sekeriweke eBibeleni leyi nyikeriweke. A yi vulavula hi vanhu lava nga ta hanya hilaha ku nga heriki aParadeyisini emisaveni.

Mianakanyo ya nsati wa mina ni vana va mina yo ponela eParadeyisini ni ya leswaku mina ndzi lovisiwa yi ndzi vilerise ngopfu. Ndzi anakanyisise swinene hi leswi a ndzi ta fanela ku swi endla leswaku ndzi hanya hilaha ku nga heriki ni ndyangu wa mina. Ndzi sungule ku anakanya hi ku tshika vutomi bya vugevenga, ivi ndzi sungula ku dyondza Bibele.

Ku Tshika Vutomi Bya Mina Bya Vugevenga

Ndzi tshike ku va kona eminhlanganweni ya swigevenga ivi ndzi tshika ni ku tihlanganisa ni yakuza. A swi nga olovi ku hundzula ndlela ya mina yo anakanya. Ndzi famba-fambe hi movha lowukulu wa lowu xaviweke etikweni rimbe leswaku ndzi titsakisa ntsena—a ku ri riendzo ra ku tixixima. Swi ndzi tekele malembe manharhu leswaku ndzi xavisa movha wa mina leswaku ndzi ta kuma lowu tolovelekeke. Ndzi tlhele ndzi va ni mboyamelo wo lava ku hanya vutomi byo olova. Hambiswiritano, loko ndzi ri karhi ndzi dyondza ntiyiso, a ndzi swi vona leswaku ndzi fanele ndzi hundzuka. Kambe hilaha Yeremiya 17:9 yi vulaka hakona, “mbilu yi ni mano e ku tlula hikwaŝo, yi borile ngopfu.” A ndzi swi tiva leswi lulameke kambe a swi ndzi tikela ku tirhisa leswi a ndzi swi dyondza. Swiphiqo leswi a ndzi langutane na swona a swi vonaka onge i ntshava leyikulu. Ndzi karhatekile, naswona minkarhi yo tala ndzi anakanye hi ku tshika ku dyondza ni ku tshika mianakanyo yo va un’wana wa Timbhoni ta Yehovha.

Kutani, mufambisi wa dyondzo ya mina ya Bibele u rhambe mulanguteri la famba-fambaka loyi a a endla leswi fanaka ni leswi a ndzi swi endla, leswaku a ta nyikela nkulumo ya le rivaleni evandlheni ra ka hina. U suke le Akita, ku nga tikhilomitara ta 650, a ta eSuzuka ku ta ndzi khutaza. Endzhaku ka sweswo, nkarhi wun’wana loko ndzi karhele naswona ndzi ehleketa hi ku tshika, a ndzi kuma papila leri humaka eka yena, a ndzi vutisa loko ndza ha hambeta ndzi famba endleleni ya Hosi.

A ndzi tshamela ku khongela Yehovha leswaku a ndzi pfuna ndzi tshika vuxaka bya mina hinkwabyo ni yakuza. Ndzi ve ni ntshembo wa leswaku Yehovha u ta hlamula xikhongelo xa mina. Hi April 1987, ndzi hetelele ndzi swi kotile ku hambana ni vandla ra yakuza. Tanihi leswi ntirho wa mina a wu ndzi yisa entsungeni wa malwandle n’hweti yin’wana ni yin’wana, wu ndzi hambanisa ni ndyangu wa mina, ndzi cince ntirho wa mina ndzi endla wa ku basisa tindlu. Leswi swi endle leswaku nindzhenga ndzi ntshunxeka ndzi endla mintirho ya mina ya moya. Ndzi kume mvhilopho ya muholo ro sungula. A yi nga tiki, kambe yi ndzi endle ndzi tsaka swinene.

Loko ndza ha ri eka xivandla xa vumbirhi hi ntirho eka vandla ra yakuza, a ndzi yime kahle hi swilo swa nyama, kambe sweswi ndzi ni rifuwo ra moya leri nga heleriwiki hi matimba. Ndzi tiva Yehovha. Ndzi tiva swikongomelo swa yena. Ndzi ni misinya ya milawu leyi ndzi hanyaka ha yona. Ndzi ni vanghana va ntiyiso lava khathalaka ha mina. Eka vandla ra yakuza, swigevenga a swi ri ni nghohe leyi swi endlaka onge swa khathalela, kambe ku hava yakuza loyi a ndzi n’wi tiva, hambi ku ri un’we, loyi a ta tinyiketa hikwalaho ka van’wana.

Hi August 1988, ndzi kombise ku tinyiketela ka mina eka Yehovha hi nkhuvulo wa mati, naswona hi n’hweti leyi landzelaka, ndzi sungule ku heta tiawara ta 60 hi n’hweti ndzi byela van’wana mayelana ni mahungu lamanene lama hundzuleke vutomi bya mina. Ndzi sungule ku tirha tanihi mutirheli wa nkarhi hinkwawo hi March 1989 naswona sweswi ndzi nyikiwe lunghelo ro va nandza wa vutirheli evandlheni.

Ndzi swi kotile ku tshika mikhuva yo tala ya vutomi bya vu-yakuza. Kambe, ku ni xin’we lexi saleke. I tinhlanga leti tlhaveriweke leti nga kona emirini wa mina leti tsundzuxaka mina ni ndyangu wa mina ni van’wana, hi vu-yakuza bya mina bya nkarhi lowu hundzeke. Nkarhi wun’wana, n’wana wa mina lonkulu u vuye exikolweni a ri karhi a rila, a vula leswaku a nge he yi exikolweni hikuva vanghana va yena va n’wi byele leswaku mina ndzi yakuza naswona ndzi titlhavele tinhlanga. Ndzi swi kotile ku vulavula mhaka leyi ni vana va mina hi vukheta, naswona va twisise xiyimo. Ndzi langutele siku leri misava yi nga ta va paradeyisi kutani nyama ya mina yi “hlukela e ku tlula v̌uhlangini.” Kutani tinhlanga ta mina leti tlhaveriweke ni mianakanyo ya mina ya malembe ya 20 ya vutomi bya vu-yakuza swi ta va swilo swa nkarhi lowu hundzeke. (Yobo 33:25; Nhlavutelo 21:4)—Hi ku vula ka Yasuo Kataoka.

[Xifaniso lexi nga eka tluka 11]

Ndzi langutele siku leri tinhlanga ta mina leti tlhaveriweke ti nga ta susiwa hi ku helela

[Xifaniso lexi nga eka tluka 13]

Laha a ndzi ri eHolweni ya Mfumo ni ndyangu wa mina