Langutelo Ra Bibele

Xana Madimona Ma Kona Hakunene?

HI LEMBE-XIDZANA ra vu-17 ni ra vu-18, tsima ra tihanyi ra ku xanisiwa ka valoyi ri hlasele matiko yo tala ya le Yuropa. Vanhu vo tala lava a va vuriwa valoyi va xanisiwile swinene. Van’wana lava pumbiweke vuloyi va pfumerile leswaku vona i valoyi ku endlela leswaku va nga xanisiwi. Vanhu va ntsandza-vahlayi va dlayiwile hikwalaho ka mavarivari kumbe ku ehleketeleriwa.

Hambileswi Matsalwa ma swi vekaka erivaleni swiendlo leswi swo lwisana ni vuloyi, ku nga endlelo ra vudimona, a swi ri swa ku hisekela etlhelo hakunene. Vakreste a va nyikiwanga mfanelo yo xanisa kumbe ku dlaya valoyi kumbe vanhu van’wana lava nga swingomantanda. (Varhoma 12:19) Hi rihi langutelo leri nga kona namuntlha?

Langutelo Ra Ku Nga Vi Na Mhaka

Namuntlha vanhu vo tala eVujaganini va yi langutela ehansi mhaka ya ku tirhisiwa ka vungoma. Hi ku lava ku tiva, van’wana va nga ha nghena hi nhloko etimhakeni ta vungoma bya tinyeleti, masalamusi, ku hlahluva ni vuloyi, kambe a va swi voni leswaku swiendlo leswi i swa vudimona. Minkarhi yin’wana, vahungasi, tinghwazi ta mintlangu ni van’watipolitiki va pfumela leswaku va byi tirhisa vungoma. Tibuku ni tibayisikopo tin’wana ti kombisa vanyamusoro ni valoyi tanihi “lava kokaka mahlo, tanihi vanhu lava tolovelekeke lava mintirho ya vona leyi nga riki ya ntumbuluko yi nga vavisiki munhu,” hi ku vula ka nsonga-vutivi wun’wana. Rungula leri endleriweke ku hungasa ni ku dyondzisa vana ri nga ha kombisa timhaka ta vungoma.

Langutelo ro tano ro kombisa ku nga vi na mhaka ni ku nga khathali hi vudimona ri nga vangela ku nga kholwi leswaku madimona ma kona. Xana wa pfumela leswaku madimona ma kona ni leswaku ma tirha hi matimba leswaku ma hi vavisa? Entiyisweni, vanhu vo tala namuntlha va vula leswaku a va si tshama va hlangana ni madimona kumbe ku vona mintirho ya wona. Xana madimona ma kona hakunene?

Ku Kaneta Swi Tisa Khombo

Lava yi tshembaka Bibele kambe va kanakana vukona bya madimona va langutane ni khombo. Loko va nga kholwi leswaku madimona ma kona, va kombisa leswaku a va yi tshembi ngopfu Bibele. Ha yini? Hikuva dyondzo ya swivumbiwa swa moya swo homboloka leswi nga ni matimba yo tlula ya munhu yi kumeka eRitweni ra Xikwembu, ku nga Bibele.

Buku ya yona yo sungula, ku nga Genesa, yi hlamusela ndlela leyi xivumbiwa xo tlhariha xi tirhiseke nyoka ha yona ku kanganyisa Evha ni ku n’wi endla leswaku a xandzukela Xikwembu. (Genesa 3:1-5) Buku yo hetelela ya Bibele, ku nga Nhlavutelo, yi vula leswaku mukanganyisi loyi wo homboloka, “nyoka ya khale,” u vitaniwa “Diyavulosi na Sathana, leyi xisaka misava hinkwayo leyi akiweke.” (Nhlavutelo 12:9) Sathana u swi kotile ku yenga tintsumi tin’wana leswaku ti xandzuka. (Yuda 6) EBibeleni, tintsumi leti leti dyoheke ti vuriwa madimona. Ti tirha laha misaveni naswona ti hlundzukele Xikwembu swinene ni lava xi tirhelaka.—Nhlavutelo 12:12.

Sathana ni madimona yakwe va ni matimba yo kucetela, yo vavisa ni ku vulavula ni vanhu. (Luka 8:27-33) Ma dyondze mahanyelo ya munhu ku ringana magidi ya malembe. Ma swi tiva ku tirhisa ku tsana ka vanhu. Bibele yi vika timhaka leti eka tona ma xaniseke, kumbe ku karhata vavanuna, vavasati ni vana. (Matewu 15:22; Marka 5:2) Ma nga vanga vuvabyi kumbe ku lamala emirini ku fana ni ku fa mahlo. (Yobo 2:6, 7; Matewu 9:32, 33; 12:22; 17:14-18) Ma tlhela ma dlaya miehleketo ya vanhu. (2 Vakorinto 4:4) Madimona a ma karhali entirhweni wa wona, ku fana na Sathana murhangeri wa wona, la fanaka ni “nghala leyi vombaka, yi lava wa ku n’wi dya.” (1 Petro 5:8) Bibele yi hlamusela timhaka to tala leti vulavulaka hi vukona bya madimona. Loko u yi tshemba Bibele, kutani u ta pfumela leswaku ku ni swivumbiwa swo homboloka leswi nga vonakiki.

Vakanganyisi Lavo Homboloka

Kambe xana madimona lama nga ni matimba ma nga va kona hi ndlela yihi namuntlha handle ko vangela nchavo lowu yaka emahlweni emisaveni? Hikwalaho ka yini vukona bya wona ni swiendlo swa wona swi nga tikombi ngopfu? Bibele ya hlamula: “Sathana hi byakwe u tihundzula ntsumi ya ku vonakala.” (2 Vakorinto 11:14) Diyavulosi i muxisi. Hakanyingi mintirho ya madimona yi vonaka yi nga ri na khombo kumbe yi vuyerisa. Hikwalaho, swa tika ku yi vona.

Sathana ni madimona yakwe ma hambeta ma xanisa vanhu hi tindlela to hambana-hambana, hilaha ma endleke hakona eminkarhini ya Bibele. Vanhu lava sweswi va nga Vakreste va xiviri lava tshameke va tirhisa swilo swa vungoma; va nga nyika vumbhoni bya minhlaselo ya tihanyi ya madimona. Namuntlha, madimona ma tirhisa matimba yo tlula ya munhu leswaku ma wonga vanhu leswaku va tirhisa vungoma kumbexana hi mpimo lowukulu ku tlula eku sunguleni. Matimba ya wona a ma fanelanga ma tekeriwa ehansi. Hambiswiritano, ma endla swilo swo tala hi ku hambukisa vanhu ekule ni Xikwembu handle ka ku va xanisa. Bibele yi ri Sathana ni madimona yakwe va “xis[a] misava hinkwayo leyi akiweke.” (Nhlavutelo 12:9) Va tiyimisele ku onha vumoya bya vanhu hi tindlela ta vuxisi, ta mano.

Madimona ma kona hakunene. Hi yihi ndlela yin’wana yo hlamusela ku halatiwa ka ngati loku tsemaka nhlana ni ku onhetela loku nga erivaleni exikarhi ka vanhu namuntlha? Hi ntumbuluko vanhu va lava ku hanya hi ku rhula ni ntsako. Kambe madimona ma hlohlotela vubihi naswona ma ni matimba yo kucetela ni ku onha mianakanyo ya vanhu.

Kambe, Yehovha i Xikwembu xa matimba hinkwawo—lexi nga ni matimba swinene ku tlula madimona. U nyika matimba yakwe ni nsirhelelo eka “marhengu ya Diyavulosi.” (Vaefesa 6:11-18) A swi bohi leswaku hi va ni rhumbu hikwalaho ka madimona, hikuva Xikwembu xa tshembisa: “Hikwalaho, tivekeni ehansi ka Xikwembu; kambe mi kaneta Diyavulosi, kutani u ta mi balekela.”—Yakobo 4:7.

[Picture Credit Line on page 16]

Sipa Icono