Ku Cinca Ka Swiyimo Swa Vanhu Lava Hlaseriweke Hi Nyimpi

“TINYIMPI ta namuntlha a ti fani ni ta khale . . . A hi masocha, kambe i vaaka-tiko” lava va hlaseriwaka, ku vike nongonoko wa “Perspective,” lowu haxiwaka hi Xiya-ni-moya xa Nhlangano wa Matiko. Hi xikombiso, enkarhini wa nyimpi ya misava yo sungula, vaaka-tiko lava va dlayiweke enyimpini a va ringana ntlhanu wa tiphesente ntsena. Kambe, enkarhini wa nyimpi ya misava ya vumbirhi, nhlayo ya vaaka-tiko lava dlayiweke enyimpini yi tlulele eka 48 wa tiphesente. Naswona namuntlha, hi ku vula ka Xiya-ni-moya xa Nhlangano wa Matiko, “vanhu vo tala lava dlayiwaka enyimpini, i vaaka-tiko—va 90 wa tiphesente—naswona vo tala va vona i vavasati, vana ni vadyuhari.”

Hi ku ya hi Olara Otunnu, loyi a nga matsalana wa Nhlangano wa Matiko wa Vayimeri vo Hlawuleka va Vana ni Hasahasa ya Vanhu lava Hlomeke, “ku ringanyetiwa leswaku ku dlayiwe vana lava ringanaka timiliyoni timbirhi etinyimpini ku sukela hi 1987.” Sweswo swi vula leswaku siku ni siku a ku fa vana vo tlula 450 hikwalaho ka nyimpi emalembeni ya 12 lama hundzeke! Ku tlula kwalaho, enkarhini wolowo, vana lava tlulaka timiliyoni ta tsevu va vaviseke ngopfu kumbe ku hundzuka swigono hi ku helela.

Nkul. Otunnu u ringanyete leswaku ndlela yin’wana leyi Nhlangano wa Matiko wu nga hungutaka ha yona nhlayo leyi kulaka ya vana lava faka hikwalaho ka nyimpi, i ku endla leswaku ku va ni tindhawu leti nga ni ku rhula. “Tindhawu leti vana va kumekaka eka tona hi xitalo, to fana ni swikolo, swibedlhele ni timbala ta mintlango, ti fanele ti langutiwa tanihi tindhawu leti ku nga lwiwiki eka tona.” Hambiswiritano, Xiya-ni-moya xa Nhlangano wa Matiko xi engetele hi ku vula leswaku, “ku sivela tinyimpi” hi yona ndlela leyi Nhlangano wa Matiko wu nga tiyisekaka ha yona leswaku vaaka-tiko a va dlayiwi hi nyimpi. Kunene, ku fanele ku herisiwa nyimpi leswaku ku nga tshuki ku va ni vanhu lava dlayiwaka hi nyimpi. Xana sweswo swi ta kala swi endleka?

Vanhu vo tala va ni ku titwa ka leswaku munhu a nge swi koti ku tisa ku rhula ka misava hinkwayo, hikuva i khale tinyimpi ti ri kona. Hambiswiritano, Rito ra Xikwembu, ku nga Bibele, ri tshembisa leswaku Yehovha Xikwembu u ta ku tisa: “U herisa tinyimpi ku ya fika emakumu ya misava.” (Pisalema 46:9) Xana leswi swi ta humelela rini? Naswona, u nga tiyisekisa ku yini leswaku xitshembiso xa Xikwembu xa ku rhula ka misava hinkwayo xi ta hetiseka? Loko u lava ku kuma tinhlamulo ta swivutiso leswi, hi kombela u tsalela vakandziyisi va magazini lowu, u tirhisa adirese leyi nga ekusuhi ni laha u tshamaka kona eka leti longoloxiweke eka tluka 5, kumbe u ya eHolweni ya Mfumo ya Timbhoni ta Yehovha leyi nga ekusuhi na wena. U ta va u nga tibohi hi nchumu naswona a wu nge hakerisiwi—u to kuma tinhlamulo leti kongomeke ntsena.

[Laha Xifaniso Xi Humaka Kona eka tluka 12]

UN PHOTO 156450/J. Isaac