Misava Leyi Nga Riki Na Tibomo Leti Fuhlekiwaka

I MANI la nga tlhantlhaka xiphiqo xa tibomo leti fuhlekiwaka? Hilaha hi voneke hakona, matshalatshala ya munhu a ma nge ri herisi rivengo, xihlawuhlawu ni makwanga. Hambiswiritano, swichudeni swa Bibele swi lemuka leswaku Muvumbi a nga swi kota ku tisa ntlhantlho lowu tshamaka hi masiku. Xana u ta swi endlisa ku yini?

Ku Simeka Vandla Ra Vanhu Vo Rhula

Vanhu hi vona lava lwaka nyimpi, a hi matlhari. Hikwalaho, loko hi lava ku vona ku rhula, ku fanele ku herisiwa rivengo leri avaniseke vanhu hi tinxaka, hi swivongo ni hi matiko. Xikwembu xi tshembisa ku swi herisa hi ku tirhisa Mfumo wa xona, lowu vanhu va timiliyoni emisaveni hinkwayo va dyondzisiweke ku wu khongelela.—Matewu 6:9, 10.

Bibele yi vula leswaku Yehovha i “Xikwembu lexi nyikaka ku rhula.” (Varhoma 15:33) Ku rhula loku Xikwembu xi ku nyikaka a ku sekeriwanga eka mintwanano ni ku yirisiwa, naswona a ku sekeriwanga eka ku chava tiko leri nga ni matlhari yo tala. Hilaha ku hambaneke ni sweswo, ku rhula loku nyikiwaka hi Xikwembu ku katsa ku cinca eka ndlela leyi vanhu va anakanyaka ha yona ni ndlela leyi va langutaka vanhu van’wana ha yona.

Yehovha Xikwembu u ta dyondzisa vanhu lava titsongahataka etindleleni takwe ta ku rhula. (Pisalema 25:9) Rito rakwe ku nga Bibele, ri hi tshembisa nkarhi lowu hinkwavo lava hanyaka “va [nga] ta va vanhu lava dyondzisiwaka hi Yehovha, ku rhula ka vana va wena ku ta tala.” (Esaya 54:13) Leswi ana se swa endleka hi mpimo wo karhi. Timbhoni ta Yehovha emisaveni hinkwayo ti tiviwa hi ku khutaza ku rhula hambi ku ri exikarhi ka vanhu va mindhavuko leyi hambaneke ngopfu. Vanhu lava dyondzisiwaka misinya ya milawu leyi tlakukeke ya Bibele va lwela ku hanya hi vun’we ku nga khathariseki timhaka leti ti nga ha va hambanisaka. Dyondzo ya Bibele yi cinca vonelo ra vona hinkwaro ra rivengo ri va ra rirhandzu.—Yohane 13:34, 35; 1 Vakorinto 13:4-8.

Handle ka dyondzo, ntirhisano wa misava hinkwayo i khale wu langutiwa tanihi xilotlelo xa nkoka xa ku herisa matlhari. Hi xikombiso, Komiti ya Matiko Hinkwawo ya Xihambano xo Tshwuka yi bumabumela leswaku matiko ya misava hinkwayo ma tirhisana eku tekeni magoza yo sivela nyimpi ni minxungeto ya tibomo leti fuhlekiwaka.

Yehovha u tshembisa ku tisa leswi tlulaka sweswo kule. Muprofeta Daniyele u profetile: “Xikwembu xa le tilweni xi ta veka mfumo lowu wu nga ta ka wu nga lovisiwi. . . . Wu ta pfotlosa kutani wu herisa mimfumo leyi [nga kona] hinkwayo, kambe wona wu ta tshama hilaha ku nga riki na makumu.”—Daniyele 2:44.

Mfumo wa Xikwembu wu ta endla swilo leswi munhu a nga ta ka a nga swi koti ku swi endla. Hi xikombiso, hi ndlela ya vuprofeta, Pisalema 46:9 yi ri: “[Yehovha] u herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; tigolonyi u ti hisa endzilweni.” Mfumo wa Xikwembu wu ta tisa xiyimo lexi nga ta endla leswaku vanhu va va ni ku rhula ni Muvumbi wa vona ni vanhu-kulobye.—Esaya 2:4; Sofaniya 3:9; Nhlavutelo 21:3, 4; 22:2.

Augusto, loyi a boxiweke eku sunguleni ka xihloko lexi hundzeke, u chaveleriwe hi rungula leri ra Bibele. Vatswari vakwe, lava nga Timbhoni ta Yehovha va n’wi pfuna leswaku a tshemba switshembiso leswi hlamarisaka swa Bibele. (Marka 3:1-5) Ina, sweswi u fanele a tiyiselela vugono lebyi vavisaka lebyi vangiweke hi bomo leyi n’wi bulukeleke. Nilokoswiritano, Augusto u langutele siku leri xitshembiso xa Xikwembu xa misava ya paradeyisi xi nga ta hetiseka ha rona. Muprofeta Esaya u profetile: “Hi nkarhi wolowo mahlo ya lava nga voniki ma ta pfuriwa, ni . . . la khutaka u ta tlula kukota mhunti.”—Esaya 35:5, 6.

EParadeyisini leyi taka, tibomo leti fuhlekiwaka a ti nge he byi xungeti vutomi ni swirho swa vanhu. Ematshan’weni ya sweswo, vanhu lava tshamaka ematlhelo hinkwawo ya misava va ta tshama va sirhelelekile. Muprofeta Mikiya u swi hlamuserise xileswi: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka; hikuva nomu wa Yehovha wa mavuthu wu swi vurile.”—Mikiya 4:4.

Xana u nga swi tsakela ku dyondza leswi engetelekeke hi switshembiso swa Xikwembu leswi andlariweke eRitweni ra xona, ku nga Bibele? Tihlanganise ni Timbhoni ta Yehovha ta ndhawu ya ka n’wina, kumbe u tsalela eka adirese leyi faneleke eka leti longoloxiweke eka tluka 5 ra magazini lowu.

[Xifaniso lexi nga eka tluka 8, 9]

EMfun’weni wa Xikwembu, munhu a nge he xungetiwi hi tibomo leti fuhlekiwaka