Ku Fikelela Tipakani

XINGHANA xa misava hinkwayo, vumakwerhu, ku rhula—i mani la nga ti ndhundhuzeriki tipakani letinene swonghasi? Baron Pierre de Coubertin, mupfuxeti wa Tiolimpiki, a a kholwa leswaku mintlango yi ta hlula rivengo leri nga kona exikarhi ka matiko hi ku kucetela xichavo lexikulu eka lava va phikizanaka entlangweni ku nga khathariseki rixaka, vukhongeri kumbe leswaku i vavanuna kumbe i vavasati. A a kholwa leswaku “misava leyinene yi nga tisiwa ntsena hi vanhu lavanene.” Kambe, xana mintlango yi nga tisa ku rhula ka misava hinkwayo? Loko hi avanyisa hi ku ya hi rhekhodo ya yona leyi hundzeke, hi boheka ku hlamula hi ku e-e.

Hambileswi mintlango yi lavekaka, kambe dyondzo leyi humaka eBibeleni i xilotlelo xo tisa ku rhula ka ntiyiso. Entiyisweni, misinya ya milawu ya Bibele yi nga tisa “vanhu lavanene,” hi ku vula ka Coubertin. Ehleketa hi matsalwa lama endlaka leswaku vanhu lava ma tirhisaka va va ni ku rhula, ku nga khathariseki leswaku i va rixaka rihi.

“Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:35.

“Loko swi koteka, swi titshege hi n’wina, vanani ni ku rhula ni vanhu hinkwavo.”—Varhoma 12:18.

“Loko ntsena hi ri ni nkarhi lowunene wa swona, a hi endleleni hinkwavo leswi nga swinene.”—Vagalatiya 6:10.

“Mi nga endli nchumu hi ku kanetana kumbe hi ku tikurisa, kambe hi mianakanyo yo titsongahata mi teka van’wana va ri lava tlakukeke eka n’wina.”—Vafilipiya 2:3.

“Ku letela miri swa pfuna katsongo; kambe ku tinyiketela loku nga ni vukwembu ku pfuna eka hinkwaswo, hileswi ku nga ni xitshembiso xa vutomi bya sweswi ni lebyi nga ta ta.”—1 Timotiya 4:8.

Xana leswi tsariweke eka matsalwa lawa swi nga endleka? Ehleketa hi leswi swi humeleleke eMunich, le Jarimani. Hi 1974, endzhaku ka malembe mambirhi ku hundze Mintlango ya Tiolimpiki leyi khomeriweke edorobeni rero yi thyakisiwe hi vutherorisi ni ku halatiwa ka ngati, Timbhoni ta Yehovha ti ve ni ntsombano wa matiko hinkwawo eXitediyamu xexo xa Tiolimpiki. Van’wana lava a va ri kona a ku ri mintlawa leyi humaka eGrikiya ni le Turkey—matiko lawa a ma lwa. Entiyisweni, hi ximumu xexo, masocha ya le Grikiya ni ya le Turkey a ma ri karhi ma lwa exihlaleni xa Kipra. Xana leswi a swi ta va khumba Vakreste lava a va ri entsombanweni lowu? Doo! Mawaku ndlela leyi vahlaleri va tsakeke ha yona ku vona Magriki ni Maturkey va vukarhana naswona va vitanana vamakwavo!

Timbhoni ta Yehovha ti tiviwa emisaveni hinkwayo hi ku kota ku va ni vuxaka byo rhula lebyi tsemakanyaka mindzilakano ya vutiko, rixaka ni swivongo. Ina, a ti vuli leswaku ana ti byi fikelele hi ku helela vun’we ni ntirhisano wa misava hinkwayo. Ku fana ni vanhu van’wana, ti boheka ku tirha hi matimba leswaku ti landzela xitsundzuxo xa muapostola Pawulo la nga Mukreste, lexi nge: ‘“Hluvulani vumunhu bya khale ni mikhuva ya byona, kutani mi tiambexa vumunhu lebyintshwa.” (Vakolosa 3:9, 10) Nilokoswiritano, ti kholwa hilaha ku tiyeke leswaku ku landzelela misinya ya milawu ya Bibele swi nga pfuna vanhu ku ‘lava ku rhula ni ku ku landzelela.’—1 Petro 3:11.

Lexi twisaka ku vava, Tiolimpiki—ku nga khathariseki tipakani letinene ta tona—ti tise timfanelo to biha ku tlurisa eka vo tala. Ku hambana ni sweswo, Rito ra Xikwembu leri nga ni matimba ri hundzula vanhu va va lavanene, ri susumeta xinghana ni ku rhula ka misava hinkwayo.

[Swifaniso leswi nga eka tluka 24]

Tiolimpiki ti hlohlotela mphikizano

[Xihlovo Xa Kona]

Aus dem Fundus der MÜNCHNER OLYMPIAPARK GMBH, München

[Swifaniso leswi nga eka tluka 25]

Bibele yi khutaza ku rhula