Ku Ponisiwa Loku Hlamarisaka

Hi muyimeri wa Xalamuka! eBENIN

“VAVANUNA volavo vanharhu va hanya hikwalaho ka ku va va ponise hi Timbhoni ta Yehovha!” Wolawo i mahungu lama hangalakeke hi rivilo lerikulu edorobeni ra Calavi, etikweni ra Benin le Afrika Vupela-dyambu, hi Ravunharhu, April 19, 2000. A ku ri vamani vanuna lava vanharhu, naswona swi tise ku yini leswaku Timbhoni ta Yehovha ti va ponisa?

Kwalomu ka 6:30 nimpundzu, Philippe Elegbe na Roger Kounougbe a va lunghekele ku sungula ntirho erivaleni ra nhlengeletano ra Timbhoni ta Yehovha, leri nga etlhelo ka hofisi ya rhavi ya Sosayiti ya Watch Tower ya le Benin. Madyambu wolawo, vanhu va madzana a va ta hlengeletana kwalaho eXitsundzuxweni xa lembe ni lembe xa rifu ra Yesu Kreste.a Hi xitshuketa, hiloko ku twakala huwa leyikulu ngopfu. Xikan’we-kan’we, Philippe na Roger va lemuke leswaku ku humelele mhangu egondzweni lerikulu.

Endzhaku ka tisekoni ti nga ri tingani, va twe munhu a huwelela a ku: “Vatirhi-kulorhi vanharhu va funengetiwe hi masaka ya semendhe!” Hiloko Philippe na Roger va ku ri ntlhaa, va kongoma egondzweni lerikulu. Kwalaho va kume lori ya 20 wa tithani yi genukile. Masaka yo tala ya semendhe a ma wele ma fumbana ehansi.

Josué Didolanvi, loyi na yena a a tirha erivaleni ra nhlengeletano ana se a a ri kwalaho, a ri karhi a koka munhu loyi a a ri exikarhi ka lori ni masaka ya semendhe. Muchayeri, loyi a manyukuteke a huma endzeni ka lorhi, a a kavanyetekilenyana emiehleketweni. Kambe u huwelerile a ku: “Ka ha ri ni vanhu vambirhi lava nga ehansi ka masaka ya semendhe!” Van’wana lava a va ri kwalaho va sungule ku susa masaka, kambe va hatlise va ku ma thya ehansi, hikwalaho ka ku hisa ka wona. Semendhe leyi a ya ha ku cheriwa emasakeni!

Eka Vaponisi

Philippe, Roger na Josué va sungule ku susetela masaka lawa ya semendhe, ha rin’we-rin’we. Mavoko ya vona a ma tshumuriwe hi ku hisa swin’we ni ntiko wa 50 wa tikhilogiramu ta masaka. Lexi nga nyanyisa timhaka, semendhe a yi halaka emasakeni lama boxekeke, yi endla mafidzula etintihweni ta vona naswona yi endla leswaku swi tika ku hefemula. Hi ku famba ka nkarhi Josué u te: “Mavoko ya mina a ma tshwa, ngopfu-ngopfu tintiho. Kambe a ndzi ehleketa leswaku swi nga ha endleka hi swi kota ku ponisa lava nga ha vaka va ri hansi ka masaka lawa.”

Endzhaku ko susa masaka ya kwalomu ka 40, lava vanharhu va vone sangu. Lexi va hlamariseke, va kume vavanuna volavo vambirhi kwalaho—ehansi ka sangu rolero. A va ha hanya! Loko mhangu leyi yi humelela, vavanuna lava a va ri ehenhla ka lori va etlele esangwini leri a ri funengete masaka ya semendhe. Loko lori yi wa, sangu leri ri va funengetile, ri va sirhelela eka ku hisa ka masaka ya semendhe lawa ma va khubumeteke.

Hi nkarhi wa mhangu leyi ni le ndzhaku ka yona, vanhu vo tala va hlengeletane kwalaho. Hinkwavo va tikhome nomu hi ku hlamala leswi Philippe, Roger na Josué va koteke ku susa masaka lama endlaka tithani timbirhi hi ku hatlisa lokukulu ehansi ka swiyimo swo bihisa xileswi. A va tsakile swinene hi leswi vavanuna lava vanharhu va endleke hinkwaswo leswi nga ematimbeni ya vona ku pfuna vanhu lava va nga va tiviki ni ku va tiva. Swi vonaka onge hi ku hatlisa un’wana ni un’wana eCalavi a a twile hi ta matshalatshala lawa ya vurhena.

[Nhlamuselo ya le hansi]

[Xifaniso lexi nga eka tluka 18]

Roger a tamele sangu endzhaku ka ku phalala