Ntlhantlho eMakumu!

EHLEKETA hi misava leyi n’wana ha un’we a lavekaka hakunene eka yona, a rhandziwaka hakunene, naswona a ri ni vatswari lava n’wi khathalelaka ni ku n’wi rhandza, lava swi lavaka hi timbilu ta vona hinkwato ku kongomisa n’wana wa vona hi ndlela leyinene ngopfu. Ehleketa hi misava leyi n’wana ha un’we a vaka a hanye kahle emirini ni le mianakanyweni, laha vana lava tshamaka eswitarateni va nga riki kona, naswona laha vana va nga dyeleriwiki vun’wana bya vona hikwalaho ka ku susumetiwa hi ikhonomi leswaku va tirha!

Xana ya naveleka misava yo tano? Ina. Xana yi nga va kona? Timbhoni ta Yehovha ti ehleketa tano, naswona ti ni swivangelo swimbirhi swo ehleketa tano.

Vatswari Va Nga Pfuna Hi Ntlhantlho Wa Kona

Handle ko kanakana wa pfumela leswaku vanhu lavakulu va na wona matimba ya ku tlhantlha—minkarhi yin’wana ya ku sivela—swin’wana swa swiphiqo swa vana. Ina, leswi swi tirha ntsena loko vanhu lavakulu va tiyimisele ku swi endla. Swi tano, vatswari va fanele va tamele xilotlelo xin’wana xa xiphiqo lexi.

Hi xikombiso, vanhu lavakulu lava landzelaka xitsundzuxo xa Bibele xa leswaku “wansati a nga hambani ni nuna wa yena . . . naswona wanuna a nga fanelanga a tshika nsati wa yena” a va na vona vana lava xanisekaka hikwalaho ko hanya ekaya leri hahluriweke hi ku hambana ka vatekani kumbe hi ku dlaya vukati.—1 Vakorinto 7:10, 11.

Vanhu lavakulu lava lavaka ku landzela xitsundzuxo xa Bibele xa ku ‘famba hi ku tenga, va nga yiki eminkhubyeni ya huwa, va nga tinyiketeli eku dakweni,’ a va na vana lava tshikilelekeke hikwalaho ka vudakwa kumbe ku godzomberiwa hi swidzidzirisi ka vatswari.—Varhoma 13:13; Vaefesa 5:18.

Vanhu lavakulu lava lavaka ku landzela xitsundzuxo xa Bibele xa ku “papalata vumbhisa” va pfuna eku hunguteni ka khombo ra leswaku vana va vona va nga kuli va nga laviwi, kumbexana va kulela endyangwini wa mutswari un’we.—1 Vatesalonika 4:3; Matewu 19:9.

Vanhu lavakulu lava lavaka ku landzela xitsundzuxo xa Bibele, lexi nge, “Mi nga dyisi vana va n’wina mbitsi, leswaku va nga heli mbilu,” ni lava va “rhandzaka vana va vona” a va nge vi na vana lava xanisiwaka enyameni kumbe emianakanyweni, hi tindlela to hambana-hambana.—Vakolosa 3:21; Tito 2:4.

Hi ku komisa, loko vanhu lavakulu hinkwavo a va tiyimisele ku landzela xitsundzuxo xa Bibele lexi nyikeriweke hi Yesu, lexi nge, “Swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona,” xana a va ta va kona vana va timiliyoni lava nga laviwiki ni lava nga rhandziwiki?—Matewu 7:12.

Lexi tsakisaka, va tele vanhu lavakulu lava tiyimiseleke ku endla hinkwaswo leswi nga laha henhla. Kambe lexi twisaka ku vava, a hi hinkwavo lava tiyimiseleke ku endla tano, hi xona xiphiqo xa kona. Hambi ku ri lava tiyimiseleke va kuma leswaku hakanyingi matshalatshala ya vona ma onhiwa hi vanhu lava nga hetisekangiki ni hi swilo leswi nga le henhla ka matimba ya vona. Vanhu va nga swi kota ku tlhantlha swiphiqo leswi hi mpimo wo karhi ntsena, kambe swi le rivaleni leswaku a va nge swi koti ku nyikela ntlhantlho lowu hetisekeke.

Hulumendhe Ya Xikwembu Leyi Nga Ta Nyikela Ntlhantlho Lowu Hetisekeke

Mutsari la vuriwaka John Ruskin, la boxiweke exihlokweni lexi hundzeke, u kholwa swinene leswaku “ntirho wa Mfumo i ku vona leswaku n’wana un’wana ni un’wana la velekiwaka eka wona u ta kuma ndhawu yo tshama, swiambalo, swakudya ni dyondzo kukondza a fika eka malembe lama a tihlawulelaka.” Kambe, Ruskin u pfumerile, “leswaku [swi va tona], Hulumendhe yi fanele yi swi kota ku lawula vanhu lava sweswi yi nga lorhiki ni ku lorha yi ri karhi yi va lawula.”

I hulumendhe leyi seketeriwaka hi Xikwembu ntsena leyi yi nga vaka ni vulawuri bya rirhandzu lebyi Ruskin a vulavuleke ha byona. Naswona hulumendhe yoleyo yi tshembisiwile—leyi Yesu a vulavuleke ha yona eka Matewu 6:9, 10. Loko hulumendhe yoleyo ya Xikwembu se yi lawula timhaka ta laha misaveni hi ku helela, yi ta swi kota ku lawula vanhu hinkwavo leswaku yi fikelela xikongomelo lexi. Yi ta tirhisa matimba ya yona leswaku vanhu hinkwavo lava yi va fumaka va kuma ndhawu yo tshama, swiambalo, swakudya ni ku va dyondzisa, ku katsa ni vana. (Esaya 65:17-25) Kambe hulumendhe leyi yi hetisekeke yi ta endla leswi engetelekeke.

Mfumo wa Xikwembu wu ta tlherisela vanhu exiyin’weni lexi hetisekeke, wu va pfuna ku kurisa vana hi ndlela leyi hetisekeke. (Yobo 33:24-26) Vana va ta kurisiwa hi moya wa ku rhula ni vumakwerhu bya misava hinkwayo, ku nga xikongomelo xa Xihlambanyo xa Nhlangano wa Matiko xa Timfanelo ta Vana xi lavaka hakona. (Pisalema 46:8, 9) A ku nge he tlheli ku va ni xilaveko xa Lembe ra N’wana eMisaveni Hinkwayo kumbe Ntsombano wa Timfanelo ta N’wana.

Ku ta va ku ri ntirho wo olova eka Kreste Yesu, Hosi ya hulumendhe ya le tilweni, ku tlherisela rihanyo leri hetisekeke eka vatswari ni le ka vana lava lamaleke. Masingita ya ku tshungula lawa a ma endleke loko a ha ri emisaveni i xitiyisekiso xa sweswo. (Luka 6:17-19; Yohane 5:3-9; 9:1-7) A nge tsandzeki ku pfuxa vana ni vatswari lava feke!—Matewu 9:18-25.

Mawaku ntsako lowukulu swonghasi ku tiva leswaku nkarhi wa Xikwembu wa ku teka goza ro pfuna vana va laha misaveni wu kwala nyongeni!

[Bokisi/Swifaniso leswi nga eka tluka 12]

Mpfuno Eka Vantshwa

Timbhoni ta Yehovha ti tiyimisele swinene ku pfuna vantshwa leswaku va papalata swiphiqo ni ku va kombisa ndlela yo antswa yo langutana ni swiphiqo leswi nga papalatekiki. Se ti ni malembe yo tala ti ri karhi ti humesa swipfuneti leswi endleriweke ku hlangavetana ni swilaveko swa vantshwa—ku sukela eka vana lava nga si nghenaka xikolo ku ya eka va malembe ya kondlo-a-ndzi-dyi. Minkandziyiso leyi yi katsa tibuku leti, Buku Yanga Ya Timhaka Ta Bibele ni leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka swin’we ni vhidiyo leyi nge Young People Ask—How Can I Make Real Friends? Minkandziyiso leyi yi nga kumiwa eka Timbhoni ta Yehovha leti tshamaka endhawini ya ka n’wina kumbe hi ku tsalela vakandziyisi va magazini lowu.

Loko ku ri vana va tona, Timbhoni ta Yehovha ti va kombisa leswaku va laviwa naswona va rhandziwa hi ku hamba ti bula na vona hi swiphiqo swa vona. Hakanyingi vatswari va tirhisa rungula lerinene leri kumekaka eka swipfuneti leswi boxiweke laha henhla tanihi xisekelo xo letela vantshwa hilaha ku yaka emahlweni, nkarhi hinkwawo. Kumbexana u nga ha tsakela ku landzela endlelo leri fanaka eka vana va wena.