Munhu Un’wana Ni Un’wana U Ta Kuma Swakudya Leswinene

KU DYA swakudya leswinene swa tsakisa. Kambe hilaha hi swi xiyeke hakona, hakanyingi swakudya swo tano a swi kumeki hi ku olova. Kambe lexi twisaka ku vava ngopfu, ku ni timiliyoni ta vanhu lava dyaka rikoko ra xilondza, lava swi va tikelaka ngopfu ku kuma ntsena xo ya ekhwirini. Va wa va pfuka leswaku va kuma swakudya leswi eneleke leswaku va kota ku hanya. Xana a ku ri xikongomelo xa Xikwembu leswaku swilo swi va hi ndlela leyi?

Ehleketa hi swona. Loko Xikwembu xi veka wanuna ni wansati emisaveni, xana a va fanele ku karhateka hi swakudya? Doo! Rungula leri kumekaka ebukwini ya Bibele ya Genesa ri ri: “Yehovha Xikwembu a endla leswaku emisaveni ku mila murhi wun’wana ni wun’wana lowu navelekaka ematihlweni ya munhu ni lowu fanelekaka ku dyiwa.” (Genesa 2:9) Kutani Adamu na Evha a va ri ni ndzalo ya swakudya swo xawula swa mixaka-xaka. Xikwembu lexi va vumbeke a xi swi tiva kahle leswaku i swakudya swa njhani leswi va swi lavaka; nakambe a xi swi tiva leswaku i yini leswi nga ta va tsakisa. I ntiyiso leswaku namuntlha a hi hanyi entangeni wa Edeni. Kambe, xana Xikwembu xi cince xikongomelo xa xona hi vanhu ni misava?

Hi ni xivangelo lexi twalaka xa leswaku ku nga ri khale, un’wana ni un’wana laha misaveni u ta kuma ndzalo ya swakudya leswi akaka miri, leswinene! Ntshembo lowu wu ta hi pfuna swinene leswaku hi va ni langutelo lerinene emhakeni ya vuhlayiseki bya swakudya swa hina namuntlha. Loko hi ri ni ntshembo wolowo, hi nga wu kanakani kambe hi tiyiseka ha wona, wu ta hi pfuna leswaku hi papalata mavonelo lama hundzeletiweke hi swakudya.

Ha yini hi tiyiseka leswaku ku nga ri khale vutomi byi ta cinca? Swichudeni leswi hisekaka swa Rito ra Xikwembu swa swi tiva leswaku sweswi hi hanya “emikarhini ya makumu” ya mafambiselo lawa ya swilo. Fambiselo leri ra swilo ri lawuriwa hi vutlhari bya vanhu, lava eswiyin’weni swo tala, va nga tiyisekiki hi leswi va swi endlaka. Loko swi ta eka tindlela ta ku lunghiselela swakudya, a va tiyiseki loko swakudya sweswo swi ri swinene kumbe swi ri ni khombo. Ku kanakana koloko ku endla leswaku va chava naswona va kanetana.—2 Timotiya 3:1-5.

Muvumbi wa vanhu u tshembise ku siva mafambiselo lawa ya swilo hi fambiselo rin’wana lerintshwa. Xikongomelo xakwe xo sungula—xa leswaku misava hinkwayo yi va paradeyisi leyi fanaka ni ntanga wa Edeni, laha ku tshamaka vanhu lava tsakeke naswona va nga ni rihanyo lerinene—xi ta hetiseka. Matimba ya vutlharhi ya Xikwembu xo hetiseka, lama tisaka vun’we, ma ta tata misava hinkwayo. (Esaya 11:9) Vutlhari lebyi kanakanisaka bya munhu, a byi nge he vi kona. Fambiselo lerintshwa leri nga ta va ri endliwe hi Xikwembu ri ta endla leswaku hi nga ha kanakani hi vuhlayiseki bya swakudya swa hina. Xana a hi ntiyiso ku gimeta hi leswaku Xikwembu lexi vumbeke vanhu, xi nga tlhela xi swi tiva kahle swakudya leswi wundlaka mimiri ya vona?

Swakudya Leswinene Leswi Humaka Eka Muvumbi

Bibele yi tamele vuprofeta lebyi tsakisaka lebyi vulavulaka hi ndlela leyi vanhu va nga ta va va hanya ha yona emafambiselweni lamantshwa lama taka. Muprofeta Esaya u tsarile: “[Xikwembu xi] ta nisa mpfula, [xi] yi nisela mbewu ya wena leyi u yi byaleke emisaveni, ni xinkwa ku nga ntshovelo wa misava, lexi faneleke xi nona naswona xi va ni mafurha. Esikwini rero swifuwo swa wena swi ta dya emadyelweni yo pfuleka. Kutani tihomu ni timbhongolo leti rimaka misava ti ta dya furu leyi lungiweke hi leswo dzunga, leswi peperhiweke hi foxolo ni foroko.”

Vuprofeta bya Esaya byi tlhela byi ku: “Yehovha wa mavuthu u ta endlela vanhu hinkwavo entshaveni leyi, nkhuvo wa swakudya swo nona, nkhuvo wa vhinyo leyi kumekaka eswiseseni, wa swakudya swo nona leswi nga ni mongo, wa vhinyo leyi kumekaka eswiseseni, leyi hlutiweke.” The New American Bible yi hundzuluxela xiga lexi xo hetelela hi ndlela leyi, “nkhuvo wa swakudya swo nona ni vhinyo yo hlawuleka, swakudya swo xawula, swo nona ni swo tenga, vinyo yo hlawuleka.”—Esaya 25:6; 30:23, 24.

Xana leswi swa ku tsakisa? Vuprofeta bya Esaya bya hi tiyisekisa leswaku un’wana ni un’wana loyi a nga ta va a hanya emafambiselweni lamantshwa ya Xikwembu, u ta va ni swakudya leswi eneleke. Xana swi ta va swi nga ri na khombo loko u swi dya? Ina. Vuprofeta byin’wana bya hi tiyisekisa leswaku vanhu va Xikwembu “entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.” (Mikiya 4:4) Nsirhelelo wo tano lowukulu wu ta tiyisekisiwa hi Mfumo wa Xikwembu lowu rhangeriweke hi Mesiya, lowu nga ta fuma misava hinkwayo ku nga ri khale.—Esaya 9:6, 7.

Vanhu a va nge he pfuki va nga ha tiyiseki hiloko swakudya swi ri swinene kumbe swi ri ni khombo. Ku hambana ni sweswo, hi ta tsaka swin’we loko hi ri karhi hi vulavurisana hi ku: “Swakudya hi leswi.”

[Marito lama tshahiweke exihlokweni lama nga eka tluka 22]

Ku nga ri khale, un’wana ni un’wana laha misaveni u ta kuma ndzalo ya swakudya leswi akaka miri, leswinene

[Xifaniso lexi nga eka tluka 20]

Xikwembu xi tshembisa vuhlayiseki ni swakudya leswinene swa vanhu hinkwavo