Nchavelelo Eka Lava Nga Ni Gome

NHLASELO wa vutherorisi lowu veke kona hi September 11, 2001, le Dorobeni ra New York ni le Washington, D.C., wu chavise vanhu hinkwavo emisaveni. Hi siku rin’we, ku fe vanhu va magidi, ku katsa ni madzana ya vatimi va ndzilo lava nga ni xivindzi, maphorisa ni vaongori.

Ku sukela loko ku humelele khombo leri, Timbhoni ta Yehovha ta khomisana leswaku ti chavelela lava feriweke hi varhandziwa va vona eka mhangu leyi. Ti endle leswi leswaku ti ta kota ku “bohelela lava vavisekeke mbilu” ni ku “chavelela hinkwavo lava rilaka.”—Esaya 61:1, 2.

Se ku hundze malembe, Timbhoni ta Yehovha ti ri karhi ti swi vona leswaku lava va feriwaka hi varhandziwa va vona, nkarhi hinkwawo va anakanyisisa hi swivutiso leswi longoloxiweke laha hansi. Bibele yi nyika tinhlamulo. Hikwalaho ka yini u nga kambisisi Matsalwa lama kombisiweke laha hansi eka Bibele ya wena?

Xana rifu ra munhu ro kunguhateriwa?

Eka Eklesiasta 9:11, Bibele yi vula leswaku “nkarhi ni xiendlakalo lexi nga languteriwangiki” (“xa xiwelo” New English Bible) swi wela vanhu hinkwavo. Loko rifu a ro kunguhateriwa, hikwalaho ka yini Bibele yi hi khutaza ku landzela nkongomiso wa vuhlayiseki?—Hi xikombiso, hlaya Deteronoma 22:8.

Hikwalaho ka yini hi fa?

Mpatswa wo sungula, Adamu na Evha, a wu vekiwe eparadeyisini ya laha misaveni. Loko a va lo yingisa, a va ta va va nga fanga. Rifu a ri ta va kona ntsena loko vanhu va nga xi yingisi Xikwembu. (Genesa 1:28; 2:15-17) Khombo ra kona, Adamu na Evha a va n’wi yingisanga Muvumbi wa vona. Hikwalaho ka sweswo, va kume hakelo ya vona—ku nga rifu. Leswi vanhu hinkwavo va nga vatukulu va Adamu na Evha, hinkwavo va ni ndzhaka ya xidyoho ni rifu. Bibele ya hlamusela: “Xidyoho xi [nghene] emisaveni hi munhu un’we [Adamu], ni rifu hikwalaho ka xidyoho, xisweswo rifu ri tlulele vanhu hinkwavo.”—Varhoma 5:12.

Hi xihi xiyimo xa lava feke?

Endzhaku ka loko Adamu a xandzukile, Xikwembu xi te: “U [ta] tlhelela emisaveni hikuva u humesiwe eka yona. Hikuva u ntshuri u ta tlhelela entshurini.” (Genesa 3:19) Kutani loko munhu a file, a nga twi nchumu nikatsongo—kunene, a nga hanyi. Bibele ya hlamusela: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5) Nakambe Bibele yi vula leswaku loko munhu a fa, “[u] tlhelela entshurini wa yena; hi siku rero miehleketo yakwe ya lova.”—Pisalema 146:3, 4.

Xana munhu u ni moya-xiviri lowu ponaka loko a fa?

Bibele yi swi veka erivaleni leswaku moya-xiviri wa wena hi wena, a hi nchumu wo karhi lowu nga ta pona rifu. (Genesa 2:7; Swivuriso 2:10; Yeremiya 2:34) Leswi timhaka ti yimiseke xileswi, loko munhu a fa, hi nga vula leswaku moya-xiviri wu file. Bibele a yi mbambeli: “Moya-xiviri [ku nga munhu] lowu dyohaka . . . wu ta fa.”—Ezekiyele 18:4.

Hi wihi ntshembo wa vanhu lava feke?

Bibele yi paluxa leswaku i xikongomelo xa Xikwembu ku pfuxa vanhu lava feke va pfukela eparadeyisini ya laha misaveni, laha vuvabyi ni rifu swi nga ta heriseriwa makumu. Yesu u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma.”—Yohane 5:28, 29; Nhlavutelo 21:1-4.

Loko Yesu a vulavula hi munghana wa yena loyi a ku nga ri khale a file, Lazaro, u fanise rifu ni vurhongo. (Yohane 11:11-13) Ku tlula kwalaho, endzhaku ka loko Yesu a n’wi pfuxile, Lazaro a nga vulanga nchumu hi ndhawu leyi ku tshwiwaka kumbe ndhawu leyi tsakisaka hi nkarhinyana lowu a a file ha wona. (Yohane 11:37-44) Leswi swa twisiseka, hikuva vafi a va twi nchumu. A va xaniseki kambe va yimele “nkarhi” lowu va nga ta pfuxiwa ha wona. Xa nkoka ngopfu, leswi Yesu a pfuxeke Lazaro, swi kombisa leswaku vafi va ta hanya nakambe. Ina, hi singita leri, Yesu a a kombisa hi mpimo lowutsongo leswi swi nga ta endliwa laha misaveni ehansi ka Mfumo wa Xikwembu. (Mintirho 24:15) Mawaku nchavelelo lowukulu swonghasi eka lava va feriweke hi varhandziwa va vona enkarhini lowu wa mangava!