Xana Swa Ha Hlayisekile Ku Famba hi Xihaha-mpfhuka?

SWIHAHA-MPFHUKA swa mune swi le mavokweni ya vatlhakisi. Swihaha-mpfhuka swa mune swi wile. Ku mbindzimuxiwe miako leyi dumeke. Xifaniso xa xihaha-mpfhuka xa 767 xi kombisiwe hi ku phindha-phindha eka thelevhixini xi ri karhi xi hima Swihondzo Swimbirhi.

Minhlaselo ya September 11, 2001, yi hi kombise ndlela leyintshwa, leyi tsemaka ni nhlana ya tihanyi ta vutherorisi. Swihaha-mpfhuka swi hundzuke matlhari lama dlayaka, swi hundzuke tibomo ta matimba, leti tshwutelaka ndzilo loko ti buluka.

Hikwalaho ka sweswo, se ku ni vanhu van’wana lava chavaka ku teka riendzo hi xihaha-mpfhuka: Lava hi lava a va nga chavi ku famba hi xihaha-mpfhuka kambe sweswi se va chavaka leswaku va nga ha hlaseriwa hi matherorisi. Tlhandlakambirhi, timhangu ta swihaha-mpfhuka leti ti veke kona endzhaku ka September 11, leti a ti nga vangiwi hi matherorisi, se ti endle leswaku vanhu vo tala va chava ku famba hi xihaha-mpfhuka.

Ku vula ntiyiso, a va talanga vanhu lava nga ni lunghelo ra ku khandziya xihaha-mpfhuka. Kasi eka van’wana, ku famba hi xihaha-mpfhuka se swo va tshamelo maxelo. Lava mintirho ya vona yi koxaka leswaku va famba-famba, a ku na ndlela leyi va nga swi balekelaka ha yona ku famba hi xihaha-mpfhuka. Varhumiwa ni vatirheli lava nga Vakreste hakanyingi va boheka ku teka maendzo yo leha swinene hi swihaha-mpfhuka loko va ya niloko va vuya eswiavelweni swa vona. Hambi ku ri swisiwana, swi nga ha boheka ku rhwariwa hi xihaha-mpfhuka loko ku ri ni mhangu ya xihatla. Naswona vahahisi ni vatirhi vo tala swinene va le ka swihaha-mpfhuka va hanya hi bindzu leri.

Vo tala va vafambi lava, lava na vona va vaka va chuhile, va boheka ku rhulisa timbilu ta vanghana va vona va vukati lava va karhatekeke swin’we ni vana va vona lava va chavaka loko va ya entirhweni. Naswona loko maendzo lawa a ma tolovelekile ma sungula ku va ni makhombo, vafambi a va ha tiyiseki leswaku ku famba hi xihaha-mpfhuka swa ha hlayisekile.

Leswaku yi kambisisa mhaka leyi, Xalamuka! yi ye eka vatshila va nsirhelelo, timininjhere ta timbala ta swihaha-mpfhuka, vafambisi va tikhampani ta kona ni lava tirhaka ku swi lunghisa. Hinkwavo va vonaka va pfumelelana ni yinhla leyi: Hambileswi ku famba hi xihaha-mpfhuka ka ha riki ndlela leyi sirheleleke ngopfu ya ku teka riendzo, minxungeto leyintshwa yi koxa leswaku ku tekiwa magoza lama engetelekeke ya nsirhelelo eka swo famba swa mani na mani.

Swihloko leswi landzelaka swi ta tlhuvutsa swiphiqo leswi nga kona ni leswi wena u nga swi endlaka leswaku u tshama u hlayisekile naswona u titwa u ri ekaya hambi u khandziye xihaha-mpfhuka.