Tihanyi Leti Vana Va Langutanaka Na Tona Ti Ta Hela Ku Nga Ri Khale!
“EKA Vumbiwa Bya Misava Hinkwayo Bya Timfanelo Ta Vanhu, Nhlangano wa Matiko wu tivise leswaku ku kurisa vana swi lava nkhathalelo wo hlawuleka ni mpfuno,” ku vula marito ya xingheniso xa vumbiwa bya Ntsombano wa Timfanelo ta Vana. Ku kombisa leswaku ndyangu i wa nkoka, xi engetele xi ku: “Leswaku n’wana a kula kahle ni leswaku a va ni vumunhu u fanele a kulela endyangwini lowu ku nga ni ntsako, rirhandzu ni ku twisisa.” Kambe a swi olovi ku fikelela pakani leyi.
Ku vulavula hi misava leyi lulameleke vana a swi enelanga. Ku hohloka ka mahanyelo ka andza naswona vanhu vo tala va teka xiyimo lexi xi ri xinene. Ku hangalaka ka vuhomboloki ni makwanga swi nga ka swi nga herisiwi hi ku tiyisiwa ka nawu. Hambi vatswari, ematshan’weni yo kombisa vana va vona rirhandzu ni ku va sirhelela, hakanyingi va pfumelela xin’wana ni xin’wana. Kutani, hi ni ntshembo wihi hi ku herisiwa ka ku hanya hi vunghwavava ka vana?
Hambileswi mafambiselo lawa yo homboloka ma tsandzekeke ku endla leswaku vana hinkwavo va va ni ndyangu lowu nga ni rirhandzu ni vumundzuku lebyi sirhelelekeke, ku nga ri khale Muvumbi wa hina u ta herisa vuhomboloki hinkwabyo ni ku tikhoma loko biha hi tlhelo ra rimbewu, ku katsa ni ku endliwa ka vana va va tinghwavava. Ku nga ri khale, Yehovha Xikwembu u ta endla nchumu lowu nga ta hlamarisa misava hi ku nghenela etimhakeni ta vanhu hi Mfumo wa yena. Lava va kucetelaka vubihi ni lava va tlangaka hi vanhu van’wana va nga ka va nga byi balekile vuavanyisi bya Xikwembu. I vanhu lava rhandzaka vanhu van’wana lava nga ta pona leswaku va hanya emisaveni leyintshwa ya Xikwembu. “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”—Swivuriso 2:21, 22.
Mayana ntshunxeko wonghasi loko vana ni vanhu lavakulu va ta tsakela ku hanya handle ko xanisiwa ni ku pfinyiwa! Hambi ku ri ku vaviseka emoyeni ni ku xaniseka ka munhu loku vangiwaka hi madzolonga swi ta va swilo swa nkarhi lowu hundzeke. Vanhu lava tshameke va xanisiwa hi tlhelo ra rimbewu va nge he swi tsundzuki swilo swo biha leswi va tshameke va endliwa swona. “Swilo swo sungula a swi nge tsundzukiwi, hambi embilwini a swi nge ti.”—Esaya 65:17.
Kutani a nga kona n’wana loyi a nga ta velekeriwa ku xaniseka kumbe ku pfinyiwa. Ntsako, rirhandzu ni ku twisisa a ku nge vi nchumu lowu ehleketeleriwaka. Malunghana ni vaaki va misava leyintshwa ya Xikwembu Esaya 11:9 yi ri: “A va nge endli swo biha kumbe ku onha.”
Kunene, mayana ntsako lowu nga ta va kona loko vusweti, ku tirhisiwa ka swidzidzirisi, mindyangu leyi nga tsakangiki ni ku tikhoma loko biha swi nga ta va swi nga ha ri kona! Ku ta va ni ku rhula, vululami ni nsirhelelo. “Vanhu va mina va ta tshama endhawini yo rhula ni le ka vutshamo lebyi tshembiwaka hi ku helela ni le tindhawini to wisela leti nga kavanyetiwiki.”—Esaya 32:18.
[Bokisi/Swifaniso leswi nga eka tluka 9]
Nkhathalelo Wa Vatswari Wu Nga Sivela Ku Hohloka Ka Mindyangu
● “Vatswari va mina va ndzi khutaze leswaku ndzi ma tirhisa hi ndlela leyi vuyerisaka malembe ya mina loko ndza ha ri exikolweni nileswaku ndzi dyondzela ntirho wo karhi. A va nga ndzi sindzisi ku hlawula leswi rhandziwaka hi vona, kambe a va ndzi pfuna leswaku ndzi hlawula xikolo lexi dyondzisaka dyondzo leyi ndzi yi lavaka.”—Tais.
● “Loko mina na sesi hi ya eku xaveni, manana a a famba na hina. A a nga hi pfuni ntsena leswaku hi wonga mali, kambe a a tlhela a hi pfuna leswaku hi papalata swiambalo swa fexeni leyi nga langutekiki kumbe leswi paluxaka mimiri ya hina.”—Bianca.
● “Loko hi ya eswinkhubyanini, minkarhi hinkwayo vatswari va mina a va vutisa leswaku ku ta va ku ri na vamani, ku ta va ku tlangiwa vuyimbeleri bya njhani nileswaku xinkhubyana xa kona xi ta sungula rini naswona xi hela rini. Eswinkhubyanini swo tala a hi famba hi ri ndyangu.”—Priscila.
● “Loko ndza ha ri xihlangi niloko se ndzi ri emalembeni ya kondlo-a-ndzi-dyi, minkarhi hinkwayo mina ni vatswari va mina a hi bula hi ntshunxekile. Loyi a ndzi dyondza na yena exikolweni u swi xiyile kutani a ku: ‘Ndzi navela ndlela leyi u ntshunxekeke ha yona ku burisana ni vatswari va wena hi nchumu wun’wana ni wun’wana. A ndzi ntshunxeki hambi ku ri ku vulavula na manana naswona minkarhi yo tala leswi ndzi lavaka ku swi tiva ndzi ringeta ku swi dyondza eka vanhu van’wana.’”—Samara.
● “Loko ndza ha ri muntshwa a ndzi tsakile. A ndzi nga va ehleketeleli swo biha van’wana naswona a ndzi ri munhu la tshamaka a tihlekela. A swi ndzi olovela ku bula ni vanghana va mina naswona a ndzi swi tsakela ku vulavula na vona hi swilo leswi tsakisaka. Vatswari va mina a va swi twisisa leswaku ndzi tano naswona a va ringetanga ku ndzi cinca. Kambe hi vutlharhi va ndzi pfunile ndzi twisisa leswaku ndzi fanele ndzi va ni vuxiya-xiya naswona ndzi va khoma hi ndlela leyi faneleke vanhu va rimbewu rin’wana.”—Tais.
● “Ku fana ni vantshwa vo tala, ndzi sungule ku rhandza vanhu va rimbewu rin’wana. Tatana u ndzi byele leswaku ndzi nga sungula ku nghenela timhaka ta ku gangisana loko ndzi ri ni malembe yo karhi. Mhaka leyi a yi ndzi hlundzukisanga. Kambe ndzi tibyele leswaku vatswari va mina va ndzi rhandza naswona va lava ku ndzi sirhelela eka makhombo lama nga ndzi welaka enkarhini lowu taka.”—Bianca.
● “A ndzi teka vukati byi ri nchumu lowunene, ngopfu-ngopfu hikwalaho ka xikombiso lexi vatswari va mina va ndzi vekeleke xona. Minkarhi hinkwayo a va ri ni vuxaka lebyinene naswona a va vulavurisana kahle. Ndza ha tsundzuka leswaku loko ndza ha ri etimhakeni ta ku gangisana, manana a a ndzi nyika xitsundzuxo malunghana ni ndlela leyi ndzi faneleke ndzi tikhoma ha yona eka swiyimo swin’wana nileswaku swi ta byi khumba njhani vukati bya mina.”—Priscila.
[Xifaniso lexi nga eka tluka 10]
Emisaveni leyintshwa ya Xikwembu, a nga kona n’wana loyi a nga ta khomiwa hi ndlela yo biha