Ntlhantlho Wa Xiviri—Xana Wu Kona?

SWI vonaka onge vugevenga byi ta tshama byi ri kona manguva lawa. Misava yi hundzuka ndhawu leyi nga ni khombo swinene ku nga khathariseki matshalatshala lamanene ya lava tirhaka ku pfuna vanhu, ya maphorisa ni lava pfunaka swigevenga leswaku swi tshika vugevenga. Xana wu kona ntlhantlho?

Bibele yi kombisa leswaku ku cinca lokukulu ka ta. Ku cinca loku a ku nge tisiwi hi matshalatshala ya tihulumendhe ta vanhu. Vafumi hinkwavo va vanhu va ni swipimelo, ku nga khathariseki leswaku va ni tipakani letinene ku fikela kwihi. Ntsena a va na wona matimba ni leswi swi nga va pfunaka ku herisa vugevenga kumbe ku simeka fambiselo leri sirhelelekeke hilaha ku nga heriki.

Ku cinca loku Bibele yi vulavulaka hakona ku ta tisiwa hi Muvumbi wa hina. Leswi ku nga yena Muendli wa vuako hinkwabyo, u ni matimba ni mfanelo yo endla leswi vanhu va tsandzekaka ku swi endla. Bibele yi n’wi hlamusela tanihi “Loyi a tsongahataka tindhuna leti tlakukeke ti nga vi nchumu, loyi a endleke vaavanyisi va misava va va nchumu lowu nga riki wa xiviri . . . a nga ni ntamu lowukulu.” (Esaya 40:23-26) Xana Xikwembu xi tshembisa ku cinca kwihi, naswona sweswo swi hi nyika ntshembo wihi wa xiviri hi misava yo antswa?

Pisalema 37:10 yi hi byela leswi hi switshembiso swa Xikwembu: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona [lowo homboloka].” Xikwembu xi tiyimisele ku herisa lava nga laviki ku tshika vubihi naswona va nga tiyimiselangiki ku cinca. Kambe, a xi nge lovisi vanhu hinkwavo. Eka lava va tiyimiseleke ku endla leswinene, ku titsongahata ni ku rhandza ku rhula, mupisalema wa tshembisa: “Tshemba Yehovha u hlayisa ndlela yakwe, U ta ku tlakusa leswaku u dya ndzhaka ya misava. U ta swi vona loko lavo homboloka va herisiwa.” Loko lavo homboloka va susiwile, lava saleke va ta tsaka eku “rhuleni lokukulu”—emisaveni leyi nga riki na vugevenga.—Pisalema 37:11, 34.

Ku Laveka Ku Cinca Ka Miehleketo Ni Ka Mbilu

Leswaku xiphiqo xa vugevenga xi heriseriwa makumu, a swi ringananga ntsena ku lovisa lavo homboloka ni ku ponisa lavanene. Ku laveka leswi tlulaka sweswo. Hakanyingi vugevenga byi vangiwa hikwalaho ka ku va vanhu va nga leteriwanga kahle etimbilwini ni le miehleketweni. Kambe, hi kona kwalaho laha hulumendhe ya Xikwembu yi nga ta tikombisa yi tlakukile kona. Vanhu va ta leteriwa ni ku dyondzisiwa kahle leswaku va rhandza leswo lulama. Esaya 54:13 yi ri: “Vana va wena hinkwavo va ta va vanhu lava dyondzisiwaka hi Yehovha, ku rhula ka vana va wena ku ta tala.”

Mimbuyelo ya kona yi ta va yi enerisa hakunene! Bibele yi vulavula hi ndlela yo fanekisela hi ku cinca ka vanhu lava eku sunguleni a va hanya hi ndlela ya vuharhi. Yi ri: “Mhisi yi ta tshama nkarhinyana ni xinyimpfana xa xinuna, yingwe yi ta etlela ni ximbutana, rhole ni xinghalana ni xifuwo lexi wundliweke kahle swi ta tshama swin’we.” Ha yini? “Hikuva kunene misava yi ta tala hi ku tiva Yehovha kukota mati lama funengetaka lwandle.” (Esaya 11:6, 9) Hambiswiritano, wena ni ndyangu wa wena a mi fanelanga mi rindza nkarhi lowu taka leswaku mi ta vona ku cinca ko tano. Hi ndlela yihi?

U Nga Vuyeriwa Sweswi

Ku ni vanhu lava sweswi va cincaka leswaku va lunghekela misava leyi nga riki na vugevenga. Ana se va ambala vumunhu lebyintshwa, ku nga vumunhu lebyi Xikwembu xi byi lavaka eka vanhu lava nga ta hanya emisaveni ya xona leyintshwa. (2 Petro 3:13) Leswi va swi endla hi ku tirhisa misinya ya milawu ya Bibele evuton’wini bya vona. Xiya nhlamuselo leyi tsakisaka leyi nyikeriwaka hi Bibele: “Mi endliwa mi va lavantshwa ematimbeni lama susumetaka mianakanyo ya n’wina, kutani mi fanele mi ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Vaefesa 4:23, 24.

Vakolosa 3:12-14 yi ya emahlweni yi hlamusela timfanelo letinene leti vanhu vo tala va timbilu letinene va ti hlakulelaka sweswi. Yi ri: “Leswi mi nga vahlawuriwa va Xikwembu, vo kwetsima ni lava rhandziwaka, tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha. Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana. Tanihi leswi Yehovha a mi rivaleleke hi ku ntshunxeka, na n’wina endlani sweswo. Kambe, handle ka swilo leswi hinkwaswo, ambalani rirhandzu, hikuva i xiboho lexi hetisekeke xa vun’we.”

Xana u nga swi tsakela ku pfuniwa ku ambala vumunhu lebyintshwa bya Vukreste? Timbhoni ta Yehovha ti karhi ti pfuna vanhu va timiliyoni emisaveni hinkwayo. Eminhlanganweni leyi vaka kona nkarhi ni nkarhi eTiholweni ta Mfumo ni le mintsombanweni leyikulu, hambi vanhu lava a va ri swigevenga leswi nga ni khombo va dyondze ndlela yo ambala vumunhu lebyintshwa.a Loko u swi tsakela ku pfuniwa hi nongonoko wolowo lowunene wa dyondzo ya Bibele, u nga kanakani ku tihlanganisa ni vakandziyisi va magazini lowu. Va ta swi tsakela ku ku pfuna u va exikarhi ka vanhu lava lunghiselelaka sweswi ku hanya emisaveni leyintshwa ya Xikwembu leyi nga riki na vugevenga.

[Nhlamuselo ya le hansi]

[Swifaniso leswi nga eka tluka 10]

Vanhu va timiliyoni va kuma dyondzo leyi nga ta va pfuna vutomi bya vona hinkwabyo emisaveni leyi nga riki na vugevenga