Khombo Ra Ku Tisasekisa Hi Fexeni
A SWI kanakanisi leswaku ku landzelela fexeni swi nga ku pfuna ku antswisa ndlela leyi u langutekaka ha yona ni ku ku endla u titwa u ri munhu na wena. Swiambalo leswinene swi nga fihla laha miri wa wena wu nga ni vugono kona ni ku kombisa kahle laha u sasekeke kona. Swi nga ha hoxa xandla eka ndlela leyi van’wana va ku langutaka ha yona.
Kambe ku ni khombo ra ku landzelela fexeni, leri hi nga ta ka hi nga ri honisi. Lava rhandzaka ku xava va nga tikuma va phasiwe hi xirimbana xo tshamela ku cinca swiambalo swa vona. Phela, varhungi va swiambalo vona va tshamela ku humesa switayele leswintshwa. Leswi swi endliwa hi xikongomelo hikuva lava endlaka fexeni va kuma mali yo tala loko swiambalo swi huma efexenini hi ku hatlisa. Hilaha muendli wa fexeni Gabrielle Chanel a vulaka hakona, “fexeni yi endleriwa ku tlhela yi huma.” Kutani muxavi loyi a nga riki na ntokoto a nga titwa a boheka ku xava swiambalo leswintshwa leswaku a fambisana ni fexeni.
Nakambe ku ni khombo ro phasiwa hi vanavetisi. Vaendli va swiambalo swa fexeni va tirhisa timiliyoni ta tidolara va ri karhi va navetisa mpahla ya vona, hakanyingi va khutaza mukhuva wo tihanyela hi ku tirhandzela lowu tsakeriwaka hi lava va xavaka swiambalo swa vona. Rungula ro tano ri tala ku va ni nkucetelo lowukulu. Mudyondzisi wa le xikolweni xa le Spaniya u ri: “A xi kona lexi tshikilelaka vantshwa ku fana ni loko u nga ri na tintangu leti ‘faneleke.’”
Ntlhamu Wa Fexeni
Mintlawa yin’wana yi tiviwa hi switayela swo karhi swa swiambalo. Leswi va swi ambalaka swi nga kombisa ku va ni moya wo kokela etlhelo, ku tihanyela hi ku ti rhandzela hambi ku ri ku tikombisa u ri munhu wa vukarhi kumbe loyi a nga ni xihlawuhlawu. Hambileswi swin’wana swa switayele leswi swi nga ha chavisaka hambi ku ri ku tsema nhlana, hakanyingi vanhu va ntlawa wolowo va swi rhandza. Hambi ku ri van’wana lava nga swi rhandziki leswi endliwaka hi ntlawa wolowo kambe ndlela ya vona ya ku ambala yi nga ha va tsakisa. Lava va ambalaka muxaka wolowo wa swiambalo va nga hundzisela rungula leri hoxeke leswaku va khutaza mikhuva ya ntlawa wolowo.
Tifexeni ti ta ti tlhela ti hundza, tin’wana ti tshama tin’hwetinyana. Yi nga ha va yi te ni muyimbeleri la dumeke kumbe muendli wa swiambalo swa fexeni. Hambiswiritano, tifexeni ti nga ri tingani ti hundzuka maambalelo lama tolovelekeke. Hi xikombiso, tibokati ta wasi a ti tolovelekile eka vantshwa lava nga pfumelelaniki ni nawu wo karhi hi va-1950 na hi va-1960. Hambiswiritano, sweswi ti ambariwa hi vanhu va malembe yo hambana-hambana ehansi ka swiyimbo swo hambana-hambana.
Ku Karhateka Hi Ku Lava Ku Languteka Hi Ndlela Leyi Hetisekeke
Lava va landzelelaka fexeni ku tlula mpimo va nga ha karhateka swinene hi ndlela leyi va langutekaka ha yona. Vanavetisi va swiambalo hakanyingi va lehile naswona va larile, hi tshamela ku vona swifaniso swa vona.a Munhu la vumbekeke “kahle” u tirhisiwa ku navetisa xin’wana ni xin’wana ku sukela eka timovha ku ya eka malekere. Britain’s Social Issues Research Centre, yi ringanyeta leswaku “vaxisati lava ha riki vantshwa va vona swifaniso swo tala swa vavasati vo saseka hi siku rin’we ku tlula lava va voniweke hi vamana wa vona hi nkarhi wa vona hinkwawo wa vuntshwa.”
Ku tshamela ku vona swifaniso swo tala swi nga ku khumba hi ndlela yo karhi. Hi xikombiso, nkambisiso lowu endliweke le United States lowu tshahiweke eka Newsweek wu kume leswaku tiphesente ta 90 ta vana va kondlo-a-ndzi-dyi va valungu a va nga enerisekanga hi mimiri ya vona. Van’wana va lava va nga endla hambi ku ri yini leswaku ‘va languteka hi ndlela leyi ku vuriwaka leswaku i yinene.’ Kambe, Social Issues Research Centre yi vula leswaku i tiphesente ta ntlhanu ntsena leti nga fikelelaka swo fana ni ntiko ni mpimo leswi laviwaka hi vanavetisi. Hambiswiritano, ku bumabumela miri lowutsongo swi endle leswaku vanhwanyana va timiliyoni va va mahlonga. Swi vangele van’wana leswaku va va ni vuvabyi bya ku chava ku dya.b N’wambhuri wa le Spaniya Nieves Álvarez, loyi a nga tshama a va ni xiphiqo xa ku dya, u ri: “Ku va ni miri a swi ndzi chavisa ku tlula ku fa.”
I ntiyiso, ku va ni xiphiqo xa ku dya ni vuvabyi bya makolo swi nga vangiwa hi swilo swo hambana-hambana. Hambiswiritano, Dok. Anne Guillemot na Dok. Michel Laxenaire, va ri: “Mihivahivani yo lava ku va ni miri lowutsongo yi byarha vutihlamuleri byin’wana bya leswi.”
Swi le rivaleni leswaku fexeni ya pfuna yi tlhela yi onha. Yi enerisa ku navela ka vanhu ko lava ku languteka ni ku va ni xo karhi lexintshwa xo xi ambala. Kambe ku hundzeleta fexeni swi nga hi susumetela ku ambala swilo leswi nga endlaka van’wana va hi languta hi ndlela leyi hoxeke. Naswona loko hi rhangisa ku languteka, swi ta hi endla hi va ni vonelo leri hoxeke ra leswaku ‘ndlela leyi hi langutekaka ha yona’ i ya nkoka ku tlula leswi hi nga swona endzeni. Álvarez, loyi a tshahiweke eku sunguleni u ri: “Hi fanele hi sungula ku tlangela vuswikoti bya munhu ni vumunhu bya yena ematshan’weni yo languta leswi a ti funengete ha swona.” Kambe ku cinca ka muxaka wolowo a ku nge ti hi ku hatlisa. Kutani hi nga swi kotisa ku yini leswaku hi ringanisela emhakeni ya fexeni?
[Tinhlamuselo ta le hansi]
a Hi ku ya hi magazini wa Time, vanavetisi va swiambalo va languteriwe leswaku va va “va lehe 1,74 wa timitara, va larile, va ri ni milomu leyi ringaneleke, va va ni tinhlaya to leha, matihlo lamakulu, milenge yo leha ni nhompfu yo tontswa kambe yi nga hlomukanga ngopfu.”
b Nhlangano wa Matiko wa U.S. Wa Vuvabyi Bya Ku Chava Ku Dya Swin’we Ni Makhombo Ya Kona wu ringanyeta leswaku timiliyoni ta nhungu ti karhatiwa hi vuvabyi bya ku chava ku dya le United States naswona vunyingi bya vona bya fa. Vo tala va vona (tiphesente ta 86) va sungula ku va ni xiphiqo lexi xa ku dya va nga si va ni malembe ya 21.
[Bokisi/Xifaniso lexi nga eka tluka 8]
Xana U Kona La Nga Ambalaka Nchumu Wolowo Hakunene?
Tiyindlu ta fexeni ta le New York, Paris, ni le Milan ti kombisa tinguvu leti fambaka emahlweni hi ximun’wana ni xixikana xin’wana ni xin’wana. Handle ka leswaku va swi durhisa, swo tala swa swiambalo sweswo a swi na xindzhuti, entiyisweni, a swi ambaleki. Juan Duyos, muendli wa tifexeni wa le Spaniya u ri: “Swiambalo sweswo swo durha, leswi endliweke hi ndlela leyi hundzeletiweke a swi endliwanga leswaku swi ambariwa hi mani na mani.” “Xikongomelo xa nkombiso wa swiambalo sweswo i ku yisa nyingiso eka muendli wa fexeni yoleyo kumbe ku tivisa vito ra swiambalo ntsena, a hi ku xavisa swiambalo sweswo. Hi xikombiso, xiambalo xo karhi lexi rhandzekaka swinene, lexi ndhundhuzeriwaka hi vahaxi xi nga ha pfuna leswaku ku xavisiwa xinun’weriso xo karhi lexi endliweke hi munhu yoloye.”
[Xifaniso lexi nga eka tluka 7]
Ku tsutsumisana ni fexeni swi nga ku dyela mali
[Xifaniso lexi nga eka tluka 7]
Ku ambala swiambalo swo karhi swi nga ku endla u va eka ntlawa wo karhi
[Xifaniso lexi nga eka tluka 7]
Van’wana va khomiwe hi mavabyi ya ku chava ku dya