Langutelo Lerinene Hi Fexeni

BIBELE yi vula leswi hi Xikwembu, “swilo hinkwaswo xi swi endle swi saseka hi nkarhi wa swona.” (Eklesiasta 3:11) Hi vona swilo swo saseka emisaveni hinkwayo laha hi nga kona. Nakambe hi ku vona ni le van’hwini.

Vahleri va swiambalo va ni xikongomelo xo antswisa ndlela leyi hi langutekaka ha yona hi swiambalo leswi hi swi ambalaka. Kambe hilaha swi kombisiweke hakona eswihlokweni leswi hundzeke, bindzu ra fexeni ri tlhele ri cinca vonelo ra vanhu hi leswi a swi tekiwa swi sasekile. Profesa wa ntivo-miehleketo Ruth Striegel-Moore u ri: “Se hi tolovele ku vona vavasati lava laleke hi ndlela leyi hundzeletiweke naswona se hi va teka ku ri vona lava va sasekeke.”

Hakunene, ku ta va ku nga ri vutlhari ku pfumelela vonelo ra misava malunghana ni ku saseka ri hi susumetela ku fana na yona. Ebukwini ya yena leyi nge Always in Style, Doris Pooser u vula leswaku “vavasati va namuntlha a va boheki ku cinca mimiri ya vona leswaku va pfumelelana ni ‘fexeni’ yo karhi leyi ngheneke.” Kutani, hikwalaho ka yini hi fanele hi pfumelela vahaxi va mahungu va hi faka matomu? Pooser u ri: “Swa olova swinene ku va leswi hi nga xiswona ku ri ni ku ringeta ku cinca xiyimo xa hina.”

Vumburhi Lebyi Nga Hundzeriwiki Hi Nkarhi

Ku titshemba ni ku eneriseka evuton’wini hi swona swi nga swa nkoka ku ri ni leswaku u languteka njhani. Judy Sargent, loyi a nga tshama a va ni vuvabyi bya ku chava ku dya u ri: “Ntsako wa xiviri wu kumeka endzeni ka munhu. A wu nge kumeki hi ku hlayela tinomboro ta ntiko wa wena eka xikalo hala vuhlambelweni.” Bibele yi vulavula hi mhaka leyi hi vuenti. Muapostola Petro u tsale a ku: “Ku saseka ka wena ku fanele ku va ka wena hi xiviri, vumburhi lebyi nga dyuhariki bya moya wo rhula ni wo olova, lowu nga ni risima lerikulu emahlweni ka Xikwembu.”—1 Petro 3:4, Today’s English Version.

Vumbhuri lebyi nga dyuhariki lebyi Petro a vulavulaka ha byona byi tlula swinene ku saseka ka miri hikuva i bya masiku naswona i bya nkoka ematihlweni ya Xikwembu. Eka malembe-xidzana yo tala lama hundzeke hosi ya vutlhari yi te: “Vuxongi byi nga ha va vunwa, ku saseka ku nga ha va vuhava; kambe wansati la chavaka Yehovha hi yena loyi a tikumelaka ku dzunisiwa.”—Swivuriso 31:30.

Hambileswi ku saseka ka miri ku kokaka vanhu mahlo namuntlha, vanhu vo tala va ha xixima munhu la kombisaka timfanelo ta Vukreste. Muapostola Pawulo u khutaze Vakreste: “Mi tiambexa vumunhu lebyintshwa, . . . xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha.”—Vakolosa 3:10, 12.

Fexeni kahle-kahle a yi tlhaveriwi hi dyambu. Hambiloko hi yi teka yi sasekile swinene, fexeni yi nga hi sasekisa swa xinkarhana. Kambe hambiloko hi languteka hi koka mahlo a hi nge amukeleki loko vumunhu bya hina byi nga fambisani ni ndlela leyi hi langutekaka ha yona. Tsundzuka “mihandzu ya moya”—leyi katsaka mfanelo ya rirhandzu, ntsako, ku rhula, ku lehisa mbilu, vunene ni ku tikhoma—a yi heleriwi hi nkarhi.—Vagalatiya 5:22, 23; 1 Timotiya 2:9, 10.

Hambiswiritano, i swinene leswaku hi va ni mhaka leswaku hi ambala yini. Aline wa le Furwa wa pfumela leswaku a swi nga olovi ku ringanisela emhakeni leyi. U ri: “Tanihi muntshwa, a ndzi rhandza swiambalo. A ndzi lava ku tsutsumisana ni fexeni hikuva a yi ndzi endla ndzi titshemba. Naswona loko ndzo xava nguvu leyi nga ni vito ra ndhuma, hi swona leswi a ndzi swi rhandza ngopfu.”

Aline u ya emahlweni: “Kambe loko ndzi kula, ndzi boheke ku dyondza ku tihlayisa hi tlhelo ra timali naswona ndzi sungule ku heta nkarhi wa mina wo tala evutirhelini bya Vukreste. Ndzi swi xiyile leswaku loko ndzi lava ku hanya hi leswi ndzi swi kotaka ku swi fikelela, a ndzi nge he vi hlonga ra fexeni. Ndzi sungule ku xava swiambalo swa mina loko ku ehlisiwe ntsengo wa swona kumbe eswitolo leswi xavisaka mpahla hi mali ya le hansi. Ndzi kume leswaku ndza swi kota ku ambala kahle kambe hi kotara ya mali leyi a ndzi yi tirhisa eku sunguleni. Xihundla xa kona i ku dyondza ku xava swiambalo leswi ku fanelaka, leswi twananaka kahle ni leswi se u nga na swona ni leswi nga ta ka swi nga humi efexenini hi ku hatlisa. Ematshan’weni yo pfumelela fexeni yi ndzi lawula leswaku ndzi fanele ndzi xava yini, sweswi ndzi ringeta ku endla xiboho leswaku i xitayele xihi lexi fanelaka mina. A ndzi nge vuli leswaku swiambalo a swa ha vuli nchumu eka mina. Kambe nchumu wa nkoka eka mina a ko va ntsena ndlela leyi ndzi langutekaka ha yona.”

Emisaveni leyi ku languteka ka munhu ku tekiwaka ku ri ka nkoka ku tlula timfanelo takwe ta xiviri, Vakreste va endla kahle ku tsundzuka xilemukiso xa Bibele lexi faneleke: “Hinkwaswo leswi nga emisaveni—ku navela ka nyama ni ku navela ka mahlo ni ku bombisa rifuwo ra munhu ra vutomi—a swi humi eka Tatana, kambe swi huma emisaveni. Ku tlula kwalaho, misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:16, 17.

[Xifaniso lexi nga eka tluka 9]

Ku saseka ka xiviri ku huma endzeni, hayi eka leswi hi swi ambaleke

[Xifaniso lexi nga eka tluka 10]

Hlawula swiambalo leswi faneleke ni leswi twananaka ni leswi se u nga na swona