Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g03 10/8 matl. 3-4
  • Khombo Leri Van’wamapurasi Va Langutaneke Na Rona

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Khombo Leri Van’wamapurasi Va Langutaneke Na Rona
  • Xalamuka!—2003
  • Tinhlokomhaka Tin'wana Leti Yelana Na Yona
  • I Yini Lexi Vangaka Swiphiqo Eka Van’wamapurasi?
    Xalamuka!—2003
  • Ndlela Leyi Marimelo Ya Manguva Lawa Ma Yi Cinceke Ha Yona Misava
    Xalamuka!—2009
  • Swiphiqo Swa Van’wamapurasi Swi Ta Hela
    Xalamuka!—2003
  • Tluka Ra Vumbirhi
    Xalamuka!—2003
Vona Swo Tala
Xalamuka!—2003
g03 10/8 matl. 3-4

Khombo Leri Van’wamapurasi Va Langutaneke Na Rona

RICHARD wa ha rima masimu lawa a ma rimiwa hi vakokwana-xinguwe vakwe emalembeni ya kwalomu ka 100 lama hundzeke. Kambe, hi lembe ra 2001, n’wamapurasi loyi wa le Canada a a ri wo sungula eka switukulwana leswa mune endyangwini wa ka vona, loyi a nga kumangiki nchumu emasin’wini. Swibyariwa swakwe swi dlayiwe hi dyandza. Ku chipa ka swilo swa le masin’wini leswi xavisiwaka ni ku durha ka swilo leswi u swi tirhisaka loko u ri karhi u rima swi n’wi tikisele ngopfu. Richard u rile hi ndlela leyi: “Swilo swo ya swi nyanya ku biha, ku hava ndlela yo endla leswaku swi antswa.”

Le Masin’wini ya Swifaki eUnited States, Larry u ni purasi leri ndyangu wa ka vona wu nga ni malembe ya 115 wu ri na rona. U ri: “A ndzi titeka ndzi ri ni vutihlamuleri bya ku hlayisa purasi leri, ndzi endla leswaku ri bindzula . . . , kambe ndzi tsandzekile.” Larry ni nghamu va lahlekeriwe hi purasi ra vona.

Leswi a swi lo humelela eka Larry na Richard ntsena. Le Britain, ku tangunuka ka vuvabyi bya swinyondzwana ni swindomundomu ku dyele van’wamapurasi mali yo tala naswona va sale va tshikilelekile. Xiviko xin’wana xa maphepha-hungu xi te: “Siku ni siku n’wamapurasi wa le Britain—hambi ku ri loyi vuvabyi lebyi byi nga n’wi fikelangiki—u tshama a ri ni gome, a titwa a ri swakwe naswona a ri karhi a kayakaya, a lwa ni ku hakela vakolotisi.” Ematikweni man’wana lama ha hluvukaka, nyimpi, dyandza ni ku andza lokukulu ka vanhu swin’we ni swivangelo swin’wana swo tala, swi siye van’wamapurasi va hele matimba. Tihulumendhe ti boheka ku oda swakudya ematikweni man’wana—swakudya leswi mindyangu yo tala yi nga riki na mali yo swi xava.

Xisweswo, swiphiqo swa van’wamapurasi a swi heleli laha. Hambiswiritano, vanhu va nga ri vangani lava tshamaka emadorobeni, va ehleketa hi mintlhontlho leyi van’wamapurasi va langutaneke na yona. Emalembeni ya kwalomu ka 50 lama hundzeke, Muungameri wa le United States Dwight D. Eisenhower, u vule swi fanerile a ku: “Ku rima swi vonaka swi olova swinene loko u vulavula kunene u ri le hofisi, u ri ekule swinene ni masimu ya swifaki.” Hilaha ku fanaka ninamuntlha, van’wamapurasi va vona onge vanhu vo tala a va tivi nchumu hi ta vurimi swin’we ni ntirho wa nkoka lowu endliwaka hi van’wamapurasi. N’wamapurasi un’wana wa le Canada u ri: “A hi na mhaka ngopfu nileswaku swakudya swa hina swi huma kwihi. Loko swi nga si phutseriwa kutani swi vekiwa exelufini ya le xitolo, swi va swi hundze emavokweni ya vanhu vo tala.”

Leswi hinkwerhu hi titshegeke hi vurimi, a hi nge swi honisi swiphiqo leswi van’wamapurasi va langutaneke na swona. Vativi va ta ntshamisano Don A. Dillman na Daryl J. Hobbs va nyikela xilemukiso lexi: “Etikweni ra hina leri hinkwerhu hi titshegeke hi van’wana, hi xihatla swiphiqo swa le tindhawini ta le makaya swi hundzela emadorobeni ni swa le madorobeni swi hundzela etindhawini ta le makaya. Vutomi bya le makaya a byi nge fambi kahle nkarhi wo leha loko bya le madorobeni byi nga fambi kahle, swi tano ni hi bya le madorobeni.” Tlhandlakambirhi, leswi matiko ya misava ma tirhisanaka namuntlha, ku wa ka ikhonomi etikweni rin’wana ku nga ha endla leswaku swibyariwa swi durhisiwa naswona swi koxa mali yo tala ku swi byala ematikweni man’wana.

Kutani, a swi hlamarisi leswi Ndzawulo ya Mirhi ya Vurimi ni Rihanyo ya le New York yi vikeke yi ku: “Ntirho wa ku rima hi wun’wana wa mintirho ya khume leyi tshikilelaka ngopfu eUnited States.” Hi swihi swin’wana leswi vangaka swiphiqo eka vurimi? Xana van’wamapurasi va nga langutana njhani na swona? Xana xi kona xivangelo xo kholwa leswaku swiphiqo leswi swi nga tlhantlhiwa?

[Marito lama tshahiweke exihlokweni lama nga eka tluka 4]

“Ku rima swi vonaka swi olova swinene loko u vulavula kunene u ri le hofisi, u ri ekule swinene ni masimu ya swifaki”

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela