Vantshwa Va Vutisa . . .

Xana Ndzi Nga Swi Papalatisa Ku Yini Ku Pimanisiwa Ni Vamakwerhu?

“A ndzi rhandza ku va leswi ndzi nga xiswona, kambe nkarhi ni nkarhi a ndzi vona onge ndzi fanele ku endla hilaha vasesi wa mina va nga hakona. A ndzi vona onge a ndzi nge swi koti ku endla leswi vasesi wa mina va koteke ku swi endla.”—Clare.

XANA u na buti kumbe sesi loyi a humelelaka eka swilo swo tala? Xana nkarhi ni nkarhi vatswari va wena va tshamela ku ku khutaza leswaku u fana na yena? Loko swi ri tano u nga chava leswaku u ta tshamela ku pimanisiwa na yena— leswaku u ta tekiwa u ri wa ntikelo hi ku ya hileswaku u kota ku n’wi ringisela ku fikela kwihi.

Vabuti wa Barrya havumbirhi bya vona va thwase eXikolweni xa Ndzetelo wa Vutirhelib naswona va ni ndhuma leyinene tanihi Vakreste. Barry u ri: “Ndzi lahlekele hi ku titshemba ku sukela ndzi vona onge a ndzi nge swi koti ku fikelela ndlela leyi va endlaka ha yona entirhweni wa nsimu kumbe ku fana na vona eku nyikeleni ka tinkulumo. A swi ndzi tikela ku va ni vanghana va mina hikuva ndzi landzela va buti loko va rhambiwile. A ndzi vona onge vanhu vo va vanghana va mina ntsena hikwalaho ka vabuti.”

Swa olova leswaku u va ni mona loko u ri ni makwenu loyi a tshamelaka ku dzunisiwa. Eminkarhini ya Bibele Yosefa a a dumile ku tlula vamakwavo. Xana swi va khome njhani vamakwavo? “Va sungula ku n’wi venga, naswona a va nga vulavurisani na yena hi ku rhula.” (Genesa 37:1-4) Ina Yosefa a ri munhu la nga ti tlakusiki. Kambe makwenu a nga ha pfuxa timholovo ni ku ku hlundzukisa hi ku tshamela ku ku tsundzuxa hi vuswikoti byakwe.

Vantshwa van’wana va xandzuka loko va langutane ni swiyimo swo tano—kumbe va pasela ehansi hi vomu exikolweni, va nga ha hiseki entirhweni wa Vukreste, kumbe va endla swilo leswi tsemaka nhlana. Va nga ha ehleketa leswaku loko va nga ta endla hilaha vamakwavo va endlaka hakona, a va fanelanga va tikarhata. Kambe hi ku famba ka nkarhi ku xandzuka ka wena ku ta ku vavisa. Xana u nga endlisa ku yini leswaku u nga langutiwi ku fana ni vamakwenu nawona u sala u ri ni ku titshemba?

U Nga Va Xiximi Ku Tlula Mpimo

Hi ku vona ndlela leyi makwenu a rhandziwaka ha yona, u nga ha tikuma u n’wi teka leswaku u hetisekile nileswaku u nga ka u nga endli leswi a kotaka ku swi endla. Kambe, xana wolowo i ntiyiso hakunene? Bibele yi veka timhaka hi ku kongoma loko yi ku: “Hinkwavo va dyohile, naswona va kayivela ku vangama ka Xikwembu.”—Varhoma 3:23.

Ina, ku nga khathariseki vuswikoti bya vamakwenu kumbe tinyiko ta vona, va ha ri “vanhu lava nga ni vulema lebyi fanaka” ni bya hina. (Mintirho 14:15) A ku na xivangelo xo va xixima ku tlurisa kumbe ku va nyika ku dzuneka loku nga fanelangiki. Munhu loyi a nga tshama a va xikombiso lexi hetisekeke i Yesu Kreste.—1 Petro 2:21.

Dyondza Eka Vona!

Ringeta ku dyondza swo karhi eka xiyimo lexi u nga eka xona. Anakanya hi xikombiso xa vamakwavo va Yesu Kreste va xinuna ni va xisati. (Matewu 13:55, 56) Anakanya hi leswi a va ta va va swi dyondzile eka makwavo la hetisekeke! Ematshan’weni ya sweswo, “vamakwavo a va nga ri kombisi ripfumelo eka yena.” (Yohane 7:5) Kumbexana vutikukumuxi ni mavondzo swi va sivele leswaku va va ni ripfumelo eka yena. Vamakwavo va Yesu va moya—ku nga vadyondzisiwa vakwe—hi vona lava amukeleke xirhambo xa yena lexi nge: ‘Dyondzani eka mina.’ (Matewu 11:29) Naswona vamakwavo va Yesu va nyama va sungule ku vona leswi a va ta swi dyondza eka Yesu, endzhaku ka ku pfuxiwa ka yena. (Mintirho 1:14) Ku fikela nkarhi wolowo, va lahlekele hi minkarhi ya risima yo dyondza eka makwavo wa xiyimo xa le henhla.

Kayini u endle xihoxo lexi fanaka. Makwavo Avele, a a ri nandza wa Xikwembu la rhandzekaka. Bibele yi vula leswaku ‘Yehovha u amukele Avele ni gandzelo rakwe.’ (Genesa 4:4) Kambe hikwalaho ka swivangelo swin’wana, Xikwembu ‘a xi n’wi amukelanga Kayini ni gandzelo rakwe.’ Kayini a a fanele a titsongahatile a dyondza eka makwavo. Ematshan’weni ya sweswo, ‘Kayini u hlundzuke ngopfu’ a hetelela a dlaye Avele.—Genesa 4:5-8.

A swi vuli leswaku u ta hlundzukela makwenu hi ndlela yoleyo. Kambe na wena u nga lahlekeriwa hi malunghelo ya risima loko u pfumelela vutikukumuxi ni mavondzo swi ku lawula. Loko u ri ni makwenu la kotaka tinhlayo, a humelela eka dyondzo ya matimu, a kota ntlango lowu u wu rhandzaka, a ri ni vutivi lebyi enteke hi Matsalwa kumbe a ri xivulavuri lexinene, a wu fanelanga u va ni mavondzo! Phela, “mavondzo i ku bola ka marhambu” naswona ku nga ku vavisa. (Swivuriso 14:30; 27:4) Ematshan’weni yo n’wi venga, ringeta ku dyondza eka makwenu. Amukela ntiyiso wa leswaku yena u ni vuswikoti lebyi u nga riki na byona. Xiyisisa ndlela leyi makwenu a endlaka ha yona swilo—kumbe u kombela mpfuno.

Barry loyi ku vulavuriweke ha yena eku sunguleni u vuyeriwile hi swikombiso leswinene leswi vamakwavo va n’wi vekeleke swona. U ri: “Ndzi vone ndlela leyi vabuti a va tsake ha yona hikuva va tiyimisele ku pfuna vanhu evandlheni ni le ntirhweni wo chumayela. Kutani ndzi endle xiboho xo tekelela xikombiso xa vabuti, kutani ndzi nghenele ntirho wo aka Tiholo ta Mfumo ni ntirho wo aka Bethele. Ntokoto lowu ndzi wu kumeke wu ndzi endle leswaku ndzi titshemba naswona swi ndzi pfunile leswaku vuxaka bya mina na Yehovha byi kula.”

Kambisisa Leswaku U Kota Ku Endla Yini

Nkarhi wun’wana u chava leswaku loko u tekelela timfanelo letinene ta makwenu swi ta vula leswaku u ta lahlekeriwa hi vumunhu bya wena. Kambe a swi fanelanga swi va tano. Muapostola Pawulo u khutaze Vakreste va lembe-xidzana ro sungula: “Vanani vatekeleri va mina.” (1 Vakorinto 4:16) Xana leswi swi vula leswaku Pawulo a a lava leswaku va lahlekeriwa hi vumunhu bya vona? Doo! Ti tele tindlela to kombisa vumunhu bya wena. Loko u nga kumi tinyeleti eka tinhlayo ku fana ni makwenu, a swi vuli swona leswaku ku na leswi hoxeke hi wena. Sweswo swi kombisa leswaku mi hambanile.

Pawulo u nyikela xitsundzuxo lexi: “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana.” (Vagalatiya 6:4) Hikwalaho ka yini u nga lavi tindlela ta ku antwisa vuswikoti lebyi u nga na byona? Ku dyondza ku vulavula ririmi rimbe, ku tlanga xichayachayana kumbe ku tirhisa khompyuta swi nga ku pfuna leswaku u titwa u ri munhu naswona swi ta ku pfuna leswaku u va ni vuswikoti byo karhi. U nga karhateki hi ku endla swilo hi ku hetiseka! Dyondza ku endla swilo hi ndlela leyinene, hi vukheta, naswona u swi endla hi mfanelo. (Swivuriso 22:29) Swi nga ha endleka u nga ri na vuswikoti bya ntumbuluko eka swo karhi, kambe “voko ra lava va gingiritekaka hi rona leri nga ta fuma,” hi ku ya hi Swivuriso 12:24.

Hambiswiritano, i nhluvuko wa wena wa moya lowu u faneleke ku wu hlakulela. Vuswikoti bya swa moya hi byona byi nga bya nkoka ku tlula vuswikoti hambi ku ri byihi lebyi u byi lavaka. Anakanya hi Esawu na Yakobe lava a va ri mahahla. Esawu a a ndhundhuzeriwa hi tata wakwe hikuva a ri “munhu la tivaka ku hlota, munhu wa le nhoveni.” Xo sungula a swi ta olova leswaku Yakobo a rivaleka hi ku olova hikuva a ri “munhu la pfumalaka xisandzu, a tshama emintsongeni.” (Genesa 25:27) Esawu u tsandzekile ku hluvukisa vumoya bya yena kutani a lahlekeriwa hi mikateko. Yakobo u hlakulele rirhandzu ra swilo swa moya naswona u katekisiwe hilaha ku fuweke hi Yehovha. (Genesa 27:28, 29; Vaheveru 12:16, 17) Hi dyondza yini? Hluvukisa vumoya bya wena, ‘ku voninga ka wena a ku vonakale’ ni “ku ya emahlweni ka wena ku [ta] vonaka eka vanhu hinkwavo.”— Matewu 5:16; 1 Timotiya 4:15.

Clare, loyi ku vulavuriweke ha yena eku sunguleni, u ri: “A ndzi nga ri na mhaka nileswaku vanhu va ndzi pimanisa ni vamakwerhu. Kambe ndzi endle xiboho xo landzela xitsundzuxo xa Matsalwa xo ‘ndlandlamuxa’ vuxaka bya mina. A ndzi tirha nsimu ni vanhu vo hambana-hambana evandlheni ni ku lava tindlela to pfuna lava lavaka mpfuno evandlheni. Nakambe ndzi rhambele vamakwerhu va xinuna ni va xisati va malembe yo hambana-hambana ekaya kutani ndzi va swekela. Sweswi ndzi ni vanghana vo tala naswona ndza titshemba.”—2 Vakorinto 6:13.

Minkarhi yin’wana vatswari va wena va nga ha endla xihoxo va ku khutaza leswaku u ringana ni vamakwenu. Kambe ku tiva leswaku vatswari va wena va ku navelela leswinene swi nga vohlisa ku vava koloko. (Swivuriso 19:11) Hambiswiritano, swi nga va vutlhari ku byela vatswari va wena hi xichavo ndlela leyi u titwaka ha yona hi ku pimanisiwa ni van’wana. Nkarhi wun’wana va nga ha ringeta ku kuma tindlela tin’wana to kombisa ku khathalela ka vona.

U nga rivali leswaku Yehovha Xikwembu a nga ka a nga ku rivali loko u n’wi tirhela. (1 Vakorinto 8:3) Barry u katsakanya hi marito lawa: “Ndzi kume leswaku loko ndzi hambeta ndzi tirhela Yehovha, ndzi ya ndzi va ni ntsako. Sweswi vanhu va ndzi rhandza ndzi ri leswi ndzi nga xiswona, hilaha va rhandzaka hakona vamakwerhu.”

[Tinhlamuselo ta le hansi]

[Xifaniso lexi nga eka tluka 12]

Xana vamakwenu va tshamela ku ndhundhuzeriwa?

[Swifaniso leswi nga eka tluka 12, 13]

Endla swilo swo hambana-hambana ku vona leswaku nyiko ya wena i yini ni ku vona leswi u swi tsakelaka

[Xifaniso lexi nga eka tluka 13]

‘Ku voninga ka wena a ku vonakale’ hi ku hlakulela vuswikoti bya wena bya moya