Nchumu Wo Antswa Ku Tlula Ku Cinca Loku Tisiwaka Hi Munhu

LOKO murhi wu tswala mihandzu leyi nga pfuniki nchumu, xiphiqo lexi a xi nge tlhantlhiwi hi ku tsema marhavi ya wona. Murhi lowu wu fanele wu tsemiwa naswona ku simuriwa ni timitsu ta wona. Kutani ku fanele ku byariwa murhi wun’wana, lowu tswalaka mihandzu leyinene.—Matewu 7:16-20.

Hikwalaho ka sweswo, hambi ku ri vatisi va ku cinca lava nga ni swikongomelo leswinene, va swi ka henhla swiphiqo leswi vanhu va langutaneke na swona—swo kota vukungundzwana, ku pfumaleka ka vululami, vusweti ni vukhamba. Kambe xiphiqo xa kona xi dzike ngopfu. Ku fanele ku cinciwa fambiselo ra kona hinkwaro. Hi leswi Bibele yi swi tshembisaka.

Mfumo wa Xikwembu i hulumendhe leyi nga ta endla swo tala ngopfu—a yi nge tisi ku cinca loku nga vuliki nchumu etikweni. Hulumendhe leyi yi ta ta ni ndlela leyintshwa hi ku helela yo tamela timhaka ta vanhu, yi hlanganisa vanhu hinkwavo va va ni vun’we ehansi ka ku fuma ka yona. Hulumendhe leyi yi ta lulamisa timhaka to kota dyondzo, ntirho, tindlu, swakudya leswi akaka miri, rihanyo ni mbango.

Pisalema 72:12-14 yi vulavula hi ndlela ya vuprofeta hi leswi Hosi leyi nga Mesiya yi nga ta swi endlela vanhu: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni.”

Kambe leswaku vukanganyisi, ku pfumala vululami ni vusweti swi helela makumu, a hi hulumendhe ntsena leyi faneleke yi cinca, ni vanhu va fanele va cinca. Xisweswo, Mfumo lowu wu ta pfuna munhu ha un’we leswaku a hanya a tsakile, a ri ni xikongomelo naswona a va ni vutomi lebyi fuweke. Kambe Bibele yi tshembisa leswaku Mfumo wa Xikwembu wu ta pfuna vaaki va misava leswaku va cinca. Njhani?

Mfumo lowu wu ta dyondzisa vanhu tindlela ta Yehovha Xikwembu, xisweswo wu va pfuna leswaku va va ni ripfumelo ni rirhandzu. (Esaya 11:9) Ku rhandza Xikwembu ku susumetela mbilu leswaku yi teka goza. Hi xikombiso, eka lembe-xidzana ro sungula, Yesu u hlangane na Zakiya lowa muluvisi, loyi a a kuma mali yo tala hi ku dyelela vanhu lava hakelaka xibalo. Yesu a nga n’wi tshikilelanga muluvisi lowa vukanganyisi, a n’wi khomisa tingana leswaku a cinca tindlela takwe. Ematshan’weni ya sweswo, Yesu u pfune Zakiya ku vona xihoxo xakwe nileswaku a cinca. Zakiya u susumetiwe hi vutivi lebyi kongomeke bya misinya ya milawu ya Xikwembu ni hi ku rhandza Xikwembu. U cincile swinene.—Luka 19:1-10.

Xana leyi a hi yona ndlela yo antswa swinene yo pfuna vanhu eka swihoxo swa vona? Hulumendhe leyi hetisekeke, yo lulama leyi nga ta khathalela timhaka ta vanhu ni ku pfuna munhu ha un’we leswaku a cinca tindlela takwe. Xana swi ta lava hi tisa ndzhundzhunuko hi nkarhi wolowo? Doo, hikuva Xikwembu xi ta va xi endle swilo hinkwaswo swi va leswintshwa. Swilo swa khale swi ta va swi hundzile.—Nhlavutelo 21:4, 5.

[Swifaniso leswi nga eka tluka 10]

Mfumo wa Xikwembu wu ta tisa ku cinca loku hetisekeke, a wu nge hundzuli swo karhi ntsena

[Xifaniso lexi nga eka tluka 11]

Loko Yesu a ha ri emisaveni, u pfune vanhu leswaku va cinca ndlela leyi va hanyaka ha yona