Xana U Nga Ma Kuma Kwihi Mahanyelo Lamanene?

HI HANYA emisaveni leyi mimpimanyeto ya mahanyelo yi cincaka eka yona. Hakanyingi namuntlha ku nga tshembeki loku a ku vengiwa enkarhini lowu hundzeke a ka ha tekeriwi enhlokweni. Makhamba ni vanhu lava nga ni vukungundzwana va tala ku ndhundhuzeriwa hi van’wamahungu. Hikwalaho ka sweswo, vanhu vo tala va fanela nhlamuselo leyi kumekaka eBibeleni: “Nkarhi wun’wana ni wun’wana loko u vona khamba, a wu tsaka na rona.”—Pisalema 50:18.

Kambe, vaendli va vukungundzwana a va fanelanga va bumabumeriwa. Mutsari un’wana u te: “Vanhu lava va kanganyisaka va va va ri ni vuswikoti bya ntumbuluko, lebyi hakanyingi byi tshuburiwaka loko va ha ri vatsongo swinene, va kanganyisa vanhu lava tshamaka na vona. Lexi nyanyisaka swilo, vakanganyisi vo tano a va tivoni nandzu hikwalaho ka swiendlo swa vona. Ematshan’weni yo tivona nandzu, va titwa va enerisekile swinene—va kuma ntsako loko va ya emahlweni va kanganyisa leswaku va kuma xin’wana ni xin’wana lexi va xi lavaka, ku nga khathariseki leswaku loyi va n’wi kanganyisaka u lahlekeriwa ku fika kwihi.”

Ina, vanhu va yi rilela noni leyi kanganyisiweke leswi a yi ri na swona swo tihanyisa, kambe a hi vangani lava rilaka loko un’wana a kanganyise n’wamabindzu lonkulu kumbe ku kanganyisiwe khampani ya swa ndzindza-khombo. Van’wana va vula leswaku vhele van’wamabindzu va fumile. Kambe vukanganyisi byo tano a byi khumbi van’wamabindzu ntsena; va tlakusa minxavo leswaku va ta kota ku vuyeriwa hi mali leyi va lahlekeleke. Hi xikombiso, le United States muti wun’wana ni wun’wana a wu hakela R6 500 hi lembe ya ndzindza-khombo leswaku wu ta pfala mali leyi yiviweke.

Tlhandlakambirhi, vanhu vo tala va tixavela swilo swo chipa kambe leswi nga ni mavito ya ndhuma swo kota swiambalo, tiwachi, swinun’hweriso, switolwa ni tibege ta vamanana. Va nga ha swi xiya leswaku swilo sweswo swi endla leswaku van’wamabindzu va lahlekeriwa hi tibiliyoni ta tirhandzi lembe ni lembe, kambe va anakanya leswaku a swi va khumbi helo. Kambe, eku heteleleni vaxavi va fanele va hakela mali yo tala leswaku va kuma swilo leswi faneleke. Ku tlula kwalaho, ku xava swilo leswi nga riki swa xiviri i ku fuwisa tinsula-voya.

Mutsari un’wana loyi a nga eka timhaka to lwisana ni vukanganyisi u te: “Ndza kholwa leswaku lexi vangaka vukanganyisi lebyikulu namuntlha hileswi hi hanyaka emisaveni leyi nga riki na mahanyelo nikatsongo. Ku hohloka lokukulu ka mahanyelo ku endla leswaku vukanganyisi byi tinyika matimba. . . . Hi hanya emisaveni leyi vanhu va kona va nga dyondzisiwiki mahanyelo ekaya. Hi hanya emisaveni leyi nga wu dyondzisiki nawu exikolweni, hikuva vadyondzisi va nga soriwa hikwalaho ko dyondzisa mahanyelo lamanene.”

Ku hambana ni sweswo, Timbhoni ta Yehovha ti dyondzisa ti tlhela ti lwela ku hanya hi nkongomiso wa Rito ra Xikwembu. Ti kongomisiwa hi misinya ya milawu yo fana ni leyi landzelaka:

● “U fanele u rhandza warikwenu kukota loko u tirhandza.”—Matewu 22:39.

● “U nga dyeleli.”—Marka 10:19.

● “Muyivi a nga ha tlheli a yiva, kambe ematshan’weni ya sweswo a a tirhe hi matimba, a endla ntirho lowunene hi mavoko yakwe, leswaku a kuma xo xi avela loyi a pfumalaka.”—Vaefesa 4:28.

● “Hi [navela] ku tikhoma hi ku tshembeka eka swilo hinkwaswo.”—Vaheveru 13:18.

Hambileswi Timbhoni ti nga ti tekiki ti lulamile, ti tshemba leswaku loko un’wana ni un’wana a tirhisa misinya leyi ya milawu, misava a yi ta va ndhawu yo antswa swinene ku hanya eka yona. Nakambe ti tshembela eka xitshembiso xa Xikwembu xa leswaku siku rin’wana misava yi ta va ndhawu leyinene.—2 Petro 3:13.

[Marito lama tshahiweke exihlokweni lama nga eka tluka 11]

Loko un’wana ni un’wana a a hanya hi nkongomiso wa Rito ra Xikwembu, misava a yi ta va ndhawu yo antswa swinene ku hanya eka yona

[Xifaniso lexi nga eka tluka 10]

Vakreste va ntiyiso va landzelela misinya ya milawu ya Bibele, yo fana ni lowu nge “U fanele u rhandza warikwenu kukota loko u tirhandza”