“Xana U Ta Ti Hlaya Rini Hinkwato Ka Tona?”

Hi July 2001, wanuna un’wana wa le Khabarovsk le Vuxeni bya Rhaxiya u kume nhulu ya timagazini ta 34 ta Xalamuka! elayiburari ya le dorobeni. U lombe timagazini teto, kambe loko siku ra leswaku a ti tlherisela ri fika hi August, a a nga ha swi lavi ku ti tlherisela. Kutani u kombele leswaku va n’wi lomba tona ku fikela hi September. A a rhandza timagazini teto swinene lerova u tlhele a ti lomba hi November a tlhela a lomba ni minkandziyiso yin’wana ya tsevu leyintshwa.

Loko a nga si tikuma timagazini leti, wanuna loyi a a nga lavi ku twa nchumu hi minkandziyiso ya vukhongeri. Ha yini a sungule ku hlaya Xalamuka!? U tsale a ku: “Hikuva swihloko swo tala eka timagazini leti swi vulavula hi swiphiqo swa vanhu leswi kokaka nyingiso naswona swi khumbaka un’wana ni un’wana.”

Wanuna loyi u ye emahlweni a ku: “Hakanyingi ti tamele ‘swihloko’ leswi tsariweke kahle leswi vulavulaka hi madoroba ya manguva lawa ni matiko, swin’we ni hi mindhavuko ya vanhu.” U tlhele a tsakisiwa hi swihloko leswi vulavulaka hi vanhu lava humeleleke evuton’wini, lava landzeleke nkongomiso wa swa moya ni ku pfuna van’wana ku tiyiselela makhombo ni maxangu. Xana u ri yini hi timagazini leti? “Handle ko kanakana a yi kona magazini leyi vulavulaka hi sayense, ntivo-mbango ni ndhavuko wa sweswinyana leyi tlulaka Xalamuka!”

Wanuna loyi u kombele minkandziyiso ya khale ya Xalamuka! ku sukela hi 1995 hi Xirhaxiya. Ku engetela eka minkandziyiso ya Xalamuka! u kombele tibuku ni tibroxara to hambana-hambana leti kandziyisiweke hi Timbhoni ta Yehovha. U tsale a ku: “U nga ha vutisa, ‘Xana u ta ti hlaya rini hinkwato ka tona?’” U hlamule xivutiso lexi hi ku vula leswaku u ni nkarhi wo hlaya rungula leri nga ra nkoka, tanihi leswi a nga hetiki nkarhi wo tala a hlalela TV ni ku pfula-pfula Internet.

Xalamuka! yi ni rungula ro tala leri vulavulaka hi swiendlakalo swa sweswinyana naswona yi hi pfuna ku tlhantlha swiphiqo swin’wana leswi hi langutanaka na swona namuntlha. Ha yini u nga kombeli Timbhoni ta Yehovha leswaku ti ku tisela minkandziyiso leyi ya ha ku humaka ya Xalamuka! n’hweti yin’wana ni yin’wana?

[Xifaniso lexi nga eka tluka 31]

Ku Twisisa Vuvabyi Bya Ku Pfilunganyeka Ka Mianakanyo

[Xifaniso lexi nga eka tluka 31]

Xana Wa Ri Tiva Vito Ra Xikwembu?

[Xifaniso lexi nga eka tluka 31]

Nxungeto Wa Nyutliya—I Wa Xiviri Ku Fikela Kwihi?

[Laha Xifaniso Xi Humaka Kona eka tluka 31]

Nuclear explosion: U.S. Department of Energy photograph