Eka Vahlayi Va Hina

KU SUKELA eka nkandziyiso lowu, xivumbeko xa Xalamuka! xi ta cincanyana. Hambileswi swilo swin’wana swi nga ta cinca hi ku helela, kambe swo tala a swi nge cinci.

Xalamuka! ya ha khomelele eka xikongomelo xa yona lexa khale ka khaleni. Hilaha swi hlamuseriwaka hakona eka tluka 4, “magazini lowu wu kandziyiseriwa ku voningela ndyangu hinkwawo.” Wu kambisisa swiendlakalo swa misava, wu vulavula hi vanhu va mindhavuko yo hambana-hambana, wu hlamusela swihlamariso swa ntumbuluko, wu bula hi rihanyo, kumbe ku hlamusela swilo swa sayense hi ririmi ro olova leri twisisiwaka hi mani na mani, Xalamuka! yi ta ya emahlweni yi rungulela vahlayi va hina timhaka, yi va xalamukisa hi ta misava leyi hi hanyaka eka yona.

Enkandziyisweni wa yona wa August 22, 1946, Xalamuka! yi tshembisile: “Xikongomelo-nkulu xa magazini lowu i ku namarhela ntiyiso.” A yi vurisile, minkarhi hinkwayo Xalamuka! yi lwela ku kandziyisa timhaka leti nga ntiyiso. Hikwalaho ka sweswo, ku endliwa vulavisisi lebyikulu loko ku tsariwa swihloko swa yona naswona swi kambisisiwa hi vurhon’wana leswaku swa pakanisa. Kambe magazini lowu wu kombise leswaku wu “namarhela ntiyiso” hi ndlela yin’wana ya nkoka swinene.

Minkarhi hinkwayo Xalamuka! a yi yisa vahlayi va yona eBibeleni. Hambiswiritano, ku sukela enkandziyisweni lowu, Xalamuka! yi ta humesa swihloko swo tala leswi sekeriweke eBibeleni ku tlula eku sunguleni. (Yohane 17:17) Xalamuka! yi ta ya emahlweni yi humesa swihloko leswi kombisaka ndlela leyi ha yona ndzayo leyi tirhaka ya Bibele yi nga hi pfunaka ku hanya vutomi lebyi nga ni xikongomelo ni lebyi humelelaka. Hi xikombiso, nkongomiso lowukulu lowu sekeriweke eBibeleni wu nyikeriwa eka swihloko leswi nge “Vantshwa Va Vutisa . . . ” ni le ka leswi nge “Langutelo Ra Bibele,” leswi nga ta tshama swi ri kona eka magazini lowu. Tlhandlakambirhi, Xalamuka! yi ta ya emahlweni yi byela vahlayi va yona hi xitshembiso xa Bibele xa misava leyintshwa leyi nga ni ku rhula leyi nga ta siva fambiselo ra sweswi ro homboloka ra swilo.—Nhlavutelo 21:3, 4.

Hi xihi xin’wana lexi cinceke? Ku sukela enkandziyisweni lowu, Xalamuka! yi ta kandziyisiwa kan’we hi n’hweti hi tindzimi to tala eka leta 82 leti yi kandziyisiwaka ha tona (eku sunguleni a yi kandziyisiwa kambirhi hi tindzimi to tala).a Xihloko lexi nge “Ta Rivala,” lexi a xi huma n’hweti ni n’hweti eka magazini wa Xinghezi ku sukela hi 1946, xa ha ta va kona enkandziyisweni wun’wana ni wun’wana kambe se xi hungutiwile ku suka eka matluka mambirhi ku ya eka rin’we. Nakambe, eka tluka 31 hi sungula xihloko lexi tsakisaka lexi nga ta huma nkarhi hinkwawo lexi nge “U Nga Hlamula Njhani?” Xana xi ta va xi tamele yini naswona u nga xi tirhisa njhani?

Tinyike xinkarhana u languta tluka 31 ra nkandziyiso lowu. Swiyenge swin’wana swa tluka leri swi ta koka vantshwa; swin’wana swi ta kambela swichudeni swa Bibele leswi nga ni vutivi ndlela leyi swi tsundzukaka ha yona. Xiyenge lexi nge “Swi Endleke Rini eMatin’wini?” xi ta ku pfuna ku tiva leswaku vanhu lava ku vulavuriwaka ha vona eBibeleni va hanye rini nileswaku swiendlakalo leswikulu swi endleke rini. Tinhlamulo ta swivutiso swo tala ti ta kumeka eka tluka ro karhi eka nkandziyiso wa kona, naswona ti ta va ti yime hi nhloko, kasi tinhlamulo ta xiyenge lexi nge “Enkandziyisweni Lowu” ti ta kumeka eka magazini hinkwawo. Ha yini u nga endli ndzavisiso wo karhi u nga si hlaya tinhlamulo ta kona kutani u byela van’wana leswi u swi dyondzeke? U nga ha tirhisa xiyenge lexi lexintshwa lexi nge “U Nga Hlamula Njhani?” tanihi xisekelo xa bulo ra ndyangu kumbe loko mi bula hi Bibele mi ri ntlawa.

Emalembeni ya 60 lama hundzeke, Xalamuka! yi endle xitshembiso lexi: “Malunghana ni swihloko leswi nga ta tlhuvutsiwa, magazini lowu wu ta lwela ku tsala timhaka hi ku ya hi langutelo ra misava hinkwayo, ku nga ri ra ndhawu yo karhi ntsena. Yi ta amukeleka eka vanhu hinkwavo lavanene va matiko hinkwawo. . . . Rungula leri kumekaka eka magazini lowu . . . ri ta va ri dyondzisa, ri aka naswona ri tsakisa eka vanhu vo tala, lavatsongo ni lavakulu.” Vahlayi lava tshamaka emisaveni hinkwayo va pfumela leswaku xitshembiso xa Xalamuka! a xi welanga hansi. Ha mi tiyisekisa leswaku yi ta ya emahlweni yi endla tano.

Vakandziyisi

[Nhlamuselo ya le hansi]

[Swifaniso leswi nga eka tluka 3]

A yi vuriwa “The Golden Age” hi 1919, yi cinciwe yi va “Consolation” hi 1937 kutani yi va “Xalamuka!” hi 1946

[Swifaniso leswi nga eka tluka 4]

I khale “Xalamuka!” yi yisa vahlayi va yona eBibeleni

[Swihlovo Swa Kona]

Guns: U.S. National Archives photo; n’wana la sikaka: WHO photo by W. Cutting