“U Nga Hlamula Njhani?”
1. Hi swihi swihinga leswi vo tala va hina hi langutanaka na swona?
1 Xana wa ri rhandza Rito ra Xikwembu, kambe swa ku tikela ku tsundzuka vuxokoxoko bya rungula ra Bibele kumbe laha rungula ro karhi ri kumekaka kona eMatsalweni? Xana wa swi tsakela leswaku vana va wena va wu twisisa kahle ntiyiso wa Bibele ni tidyondzo ta yona ta xisekelo? Xihloko lexi nge “U Nga Hlamula Njhani?” lexi humaka n’hweti na n’hweti eka tluka 31 ra Xalamuka! xi nga pfuna lavatsongo ni lavakulu leswaku va ri twisisa ku antswa Rito ra Xikwembu.—Mintirho 17:11.
2. Xana swi nga tirhisiwa njhani swiyenge swo hambana-hambana swa xihloko lexi nge “U Nga Hlamula Njhani?”
2 Xana xihloko lexi hi nga xi tirhisa njhani hi ndlela leyi vuyerisaka? Xalamuka! ya January 2006 yi vule leswi: “Tinyike xinkarhana u languta tluka 31 . . . Swiyenge swin’wana swa tluka leri swi ta koka vantshwa; swin’wana swi ta kambela swichudeni swa Bibele leswi nga ni vutivi ndlela leyi swi tsundzukaka ha yona. Xiyenge lexi nge ‘Swi Endleke Rini eMatin’wini?’ xi ta ku pfuna ku tiva leswaku vanhu lava ku vulavuriwaka ha vona eBibeleni va hanye rini nileswaku swiendlakalo leswikulu swi endleke rini. Tinhlamulo ta swivutiso swo tala ti ta kumeka eka tluka ro karhi eka nkandziyiso wa kona, naswona ti ta va ti yime hi nhloko, kasi tinhlamulo ta xiyenge lexi nge ‘Enkandziyisweni Lowu’ ti ta kumeka eka magazini hinkwawo. Ha yini u nga endli ndzavisiso wo karhi u nga si hlaya tinhlamulo ta kona kutani u byela van’wana leswi u swi dyondzeke? U nga ha tirhisa xiyenge lexi lexintshwa lexi nge ‘U Nga Hlamula Njhani?’ tanihi xisekelo xa bulo ra ndyangu kumbe loko mi bula hi Bibele mi ri ntlawa.”
3. Xana mindyangu yin’wana yi vuyeriwe njhani hi xihloko lexi nge “U Nga Hlamula Njhani” naswona hi swihi swiyenge leswi u swi rhandzaka ngopfu eka xona?
3 Mindyangu yo tala, yi tsakela ku endla dyondzo ya ndyangu hi ku tirhisa xihloko lexi. Manana un’wana u tsale a ku: “Mina ni nuna wa mina hi vone leswaku swi ta va swinene leswaku hi katsa ni xihlokwana lexi nge ‘Vana Va Lava-lava Swifaniso’ eka dyondzo ya hina ya ndyangu leswaku yi tsakisa eka xinhwanyetana xa hina xa malembe manharhu. Swi tsakisa ngopfu ku xi vona xi ri karhi xi phendla tluka ha rin’we ra Xalamuka! ya xona ku kondza xi kuma xifaniso lexi xi xi lavaka.” Tatana un’wana le Brazil u ri: “Mina ni xifanyetana xa mina xa malembe ya nkombo hi xi rhandza ngopfu xihlokwana lexi xa Xalamuka! Xi pfuna n’wananga Moises leswaku mianakanyo yakwe yi va exihlokweni xolexo, u lava-lava Matsalwa, ni ku twisisa leswi swifaniso swi hlamuselaka swona naswona u twisisa malembe lawa swiendlakalo swo karhi swi humeleleke ha wona.” Ashley la nga ni malembe ya nhungu hi vukhale, u tsale a ku: “Ndzi nkhensa xihloko lexi nge ‘U Nga Hlamula Njhani?’ lexi nga eka tluka 31 ra Xalamuka! Xi ndzi dyondzise swo tala hi Bibele.”
4. Xana ndyangu wu nga xi tirhisa njhani xihloko lexi eka dyondzo ya wona ya ndyangu?
4 Kumbexana nkarhi wun’wana mi nga tirhisa xihloko lexi nge “U Nga Hlamula Njhani?” eka dyondzo ya n’wina ya ndyangu. U nga ha lava-lava tinhlamulo ta swivutiso swin’wana leswi tikaka ngopfu eka Index kumbe eka Watchtower Library leyi nga eka CD-ROM. Hi ku endla tano, u ta va u dyondzisa vana va wena ndlela yo endla ndzavisiso. Loko u ri ni vana lavakulunyana, swa antswa u va avela ku lava tinhlamulo ta swivutiso leswi rharhanganeke eka xihlokwana lexi nge “Hi Mina Mani?” kumbe lexi nge “Swi Endleke Rini eMatin’wini?” wu nga si fika nkarhi wa dyondzo ya ndyangu. Va ta vula leswi va swi kumeke loko se mi khome dyondzo ya ndyangu. Ku tirhisa tluka leri hi vutlhari i yin’wana ya tindlela leti ha tona vatswari va nga hambetaka va dyondzisa vana va vona Rito ra Xikwembu, va va pfuna ku tiva “matsalwa yo kwetsima” ku sukela evutsongwanini.—2 Tim. 3:15; Det. 6:7.