Ku Kandziyisa Ngopfu Bibele
1. Eku sunguleni, Xihondzo xo Rindza a xi kandziyiseriwe vamani hi ku kongoma naswona Golden Age a yi endleriwe vamani?
1 Hi October 1, 1919 ku humesiwe nkandziyiso wo sungula wa The Golden Age. Yi ve mpfuno lowukulu ngopfu entirhweni wo chumayela. Ha yini swi ve tano? Hikuva yona a yi endleriwe ku fikelela vanhu hinkwavo. Kambe, a swi nga ri tano hi Xihondzo xo Rindza, lexi ku hundzeke malembe yo tala xi tekiwa tanihi lexi tsaleriweke va “ntlhambinyana.” (Luka 12:32) Vahuweleri va Mfumo va hisekele ku fambisa magazini wa The Golden Age lerova ntsengo wa timagazini leti a ti fambisiwa a wu wu tlula kule swinene wa timagazini ta Xihondzo xo Rindza.
2. Hi rihi vito ra The Golden Age namuntlha naswona a xi ri xihi xikongomelo xa yona ku sukela eku sunguleni?
2 Magazini wa The Golden Age a wu kandziyisiwe hi xikongomelo xo pfuna vanhu va vona leswaku swiphiqo swa vona swi ta tlhantlhiwa ntsena hi ku Fuma ka Kreste ka Gidi ra Malembe, loku hakunene a ku ta hundzula mahanyelo ya vanhu ma va lamanene ngopfu. Hi ku famba ka nkarhi, ku endliwe mindzulamiso yo hlayanyana eka The Golden Age leswaku yi pfumelelana ni swiyimo leswi a swi ri karhi swi cinca. Hi 1937 vito ra yona ri cinciwile ri va Consolation. Hi 1946 yi sungule ku vitaniwa Xalamuka!, hilaha yi tiviwaka hakona namuntlha.
3. Hi byihi vuprofeta lebyi Xalamuka! yi veke xitirho xa matimba eku hetisekeni ka byona?
3 Ku sukela eku sunguleni ka wona, magazini lowu wu hoxe xandla swinene entirhweni wo chumayela lowu endliweke ku sukela hi 1919. (Mat. 24:14) Hambiswiritano, hikwalaho ka ku biha ka minkarhi ya hina, swi vonaka swi fanerile leswaku ku endliwa mindzulamiso yin’wana eka Xalamuka!
4. (a) Xana munhu u fanele a endla yini leswaku a pona ‘siku ra ku hlundzuka ka Yehovha’? (b) Hi ku ya hi Nhlavutelo 14:6, 7, xana ‘ntsumi leyi hahaka empfhukeni,’ yi rhamba vanhu leswaku va endla yini?
4 Vanhu va timiliyoni va tsakela ku hlaya Xalamuka! hileswi yi vulavulaka hi timhaka to tala leti nga riki ta vukhongeri, hi ndlela leyi twisisekaka. A swi kanakanisi leswaku vunyingi bya vanhu lava vaka kona eXitsundzuxweni lembe ni lembe va yi hlaya minkarhi hinkwayo Xalamuka! Hambiswiritano, munhu a nge poni ‘siku ra ku hlundzuka ka Yehovha’ hi ku hlaya minkandziyiso ya hina ntsena kambe u fanele a kuma mpfuno lowu engetelekeke.—Sof. 2:3; Nhlav. 14:6, 7.
5. (a) Ku sukela eka nkandziyiso wa Xalamuka! ya January 2006, i yini leswi ku nga ta va ku vulavuriwa ngopfu hi swona? (b) I yini lexi vo tala va nga susumetelekaka ku xi endla naswona sweswo ku ta va ku ri ku hetiseka ka vuprofeta byihi?
5 Hikwalaho, ku sukela hi January 2006, Xalamuka! yi ta vulavula ngopfu hi Mfumo wa Xikwembu. Yi ta khutaza vahlayi hi ku kongoma leswaku va kuma ntlhantlho wa swiphiqo swa vona eBibeleni yi tlhela yi kandziyisa ngopfu leswi Bibele yi swi vulaka hi swilo leswi endlekaka sweswi. Hi ndlela yoleyo, vahlayi va ta swi twisisa kahle swilo leswi endlekaka sweswi kumbexana leswi va swi hlayaka swi ta tlhela swi va susumeta leswaku va lava ku tiva leswi engetelekeke malunghana na Yehovha.—Zak. 8:23.
6, 7. (a) I yini lexi nga ta endliwa leswaku Xalamuka! yi kota ku pfuna vanhu vo tala va tirhisa leswi tsariweke eka 1 Vatesalonika 2:13? (b) Xana Xalamuka! yi ta kandziyisiwa kangani naswona ku cinca loku ku ta khumba tindzimi tingani?
6 Xalamuka! yi ta ya emahlweni yi kandziyisa swihloko leswi vanhu vo tala va swi tsakelaka. Hambiswiritano, yi ta vulavula ngopfu hi timhaka leti khumbaka Bibele. (1 Tes. 2:13) Leswi Xihondzo xo Rindza xi tameleke timhaka leti dzikeke ta Bibele ni leswi Xalamuka! yi nga ta va ni swihloko leswi sekeriweke eBibeleni, swi vonaka ku nga ha ri na xilaveko xa leswaku Xalamuka! yi hambeta yi huma kambirhi hi n’hweti. Hikwalaho, ku sukela hi nkandziyiso wa January 2006, Xalamuka! yi ta huma kan’we hi n’hweti. Leswi swi ta wu olovisa ngopfu ntirho wo lunghiselela, wo hundzuluxela ni wo rhumela minkandziyiso ya hina.
7 Ku cinca loku ku ta khumba tindzimi ta kwalomu ka 40 wa tiphesente, leti Xalamuka! yi kandziyisiwaka ha tona. Eka tindzimi to tala ana se Xalamuka! yi huma kan’we hi n’hweti kumbe kan’we endzhaku ka tin’hweti tinharhu. Kambe Xihondzo xo Rindza xi ta ya emahlweni xi kandziyisiwa hi ndlela leyi tolovelekeke.
8. Xana vahuweleri va nga yi fambisa njhani Xalamuka! swin’we ni Xihondzo xo Rindza?
8 N’hweti yin’wana ni yin’wana vahuweleri va nga fambisa Xalamuka! hi ku yi katsa ni xin’wana xa Xihondzo xo Rindza xa n’hweti yoleyo. Lava va nga ta fambisa Xalamuka! va ta kota ku fambisa nkandziyiso wa n’hweti yoleyo va nga kalanga va xi cinca xingheniso xa vona exikarhi ka n’hweti, hilaha swi nga xiswona sweswi.
9. Hi wihi ntirho lowu Xalamuka! yi nga ta hambeta yi wu endla?
9 Ku sukela loko wu humesiwa ro sungula hi 1919, magazini lowu a wu vitaniwa The Golden Age, ivi endzhaku wu vitaniwa Consolation, kutani sweswi ku nga Xalamuka!, wu hoxe xandla swinene entirhweni wo chumayela. Hi khongelela leswaku Yehovha a hambeta a katekisa ku fambisiwa ka magazini lowu hambileswi ku nga ta va ni ku cinca ko karhi eka wona nileswaku wu pfuna vanhu vo tala lava engetelekeke lava humaka “eka matiko hinkwawo ni tinyimba hinkwato ni vanhu hinkwavo ni tindzimi hinkwato,” leswaku va teka Mfumo wa Xikwembu wu ri ntshembo wa vona wa xiviri.—Nhlav. 7:9.