Xalamuka!—Magazini Lowu Tsakisaka Vanhu Vo Tala
Eku sunguleni magazini lowu a wu ri na vito leri nge The Golden Age. Nkandziyiso wo sungula a ku ri wa October 1, 1919. Lowu a ku ri magazini lowu vikaka timhaka to tala ta matshalatshala ya vanhu. A wu xalamukisa vanhu hi leswi a swi humelela emisaveni naswona a wu va komba leswaku ntlhantlho wa xiviri eka swiphiqo swa vanhu i Ku Fuma ka Kreste ka Gidi ra Malembe, loku hakunene ku nga ta tisela vanhu “nguva ya ntsako.” Xivumbeko xa xifunengeto xa magazini lowu xi hundzuka-hundzukile, kambe rungula a ri ya emahlweni ri ri karhi ri fana. The Golden Age a yi endleriwe leswaku yi hangalasiwa eka vanhu, naswona hi malembe yo tala ku hangalasiwa ka yona a ku tlula swinene ka Xihondzo xo Rindza.
Ku sukela eka nkandziyiso wa October 6, 1937, vito leri ri cinciwe ri va Consolation. Leswi a swi fanela hikwalaho ka ntshikilelo lowu vo tala a va hlangavetana na wona ni xiyimo lexi a xi ri kona xa mpfilumpfilu loko misava yi nghena eka Nyimpi ya Vumbirhi ya Misava. Hambi swi ri tano, nchavelelo lowu magazini lowu a wu wu nyikela a wu amukeleka eka lava hakunene va rhandzaka ntiyiso.
Ku sukela eka nkandziyiso wa August 22, 1946, wu thyiwe vito ra Xalamuka! A ku kandziyisiwa ku xalamukisa vanhu eka swiendlakalo swa nkoka swa misava. Magazini lowu a wu tirhisa swihlovo swa mahungu lama amukeriwaka, nakambe a wu tlhela wu va ni vayimeri va wona n’wini emisaveni hinkwayo. Swihloko swa Xalamuka! leswi hlamuselaka mhaka hi ndlela leyi ringaniseriweke ni leyi twisisekaka leswi bulaka hi timhaka to hambana-hambana, swi khutaza vahlayi leswaku va amukela rungula ra magazini lowu leri nga ra nkoka swinene, ku nga, leswaku swiendlakalo swa misava swi hetisisa vuprofeta bya Bibele, leswi kombaka leswaku hi hanya emasikwini ya makumu, ni leswaku ku nga ri khale Mfumo wa Xikwembu wu ta tisa mikateko leyi nga heriki eka lava va dyondzaka ku endla ku rhandza ka Xikwembu. Magazini lowu wu ve xitirho lexi tirhaka eku huweleleni ka mahungu lamanene ya Mfumo wa Xikwembu ni rungula leri yisaka eka dyondzo leyi enteke ya mhaka leyi andlariwaka eka Xihondzo xo Rindza ni le ka tibuku to tsindziyela.
Eku sunguleni ka 1993, Xalamuka! a yi humesiwa hi tindzimi ta 67, ni tikopi ta 13 240 000 eka nkandziyiso wun’wana ni wun’wana.