Ku Humesa Xihondzo Xo Rindza

Loko xi humesiwa ro sungula, hi July 1879, a xi vitaniwa Zion’s Watch Tower and Herald of Christ’s Presence. Magazini lowu, lowu a wu ri museketeri-nkulu wa gandzelo ra nkutsulo ra Yesu Kreste, a wu humeseriwa ku nyika swakudya swa moya eka va yindlu ya ku pfumela. Hi January 1, 1909, vito ra wona ri cinciwe ri va The Watch Tower and Herald of Christ’s Presence, leswaku ku yisiwa nyingiso lowu nga erivaleni eka xikongomelo xa magazini lowu. Hi January 1, 1939, hikwalaho ko kandziyisa mhaka ya leswaku Kreste ana se a a fuma etilweni a ri Hosi, vito leri ri cinciwile ri va The Watchtower and Herald of Christ’s Kingdom. Kutani hi March 1, 1939, loko ku cinciwa vito leri ri va Xihondzo xo Rindza Xi Huwelela Mfumo Wa Yehovha, a ku yisiwa nyingiso lowukulu ngopfu eka Yehovha tanihi Mufumi wa Vuako Hinkwabyo, loyi a nga nyika N’wana wa yena vuhosi byo fuma.

Loko Xihondzo xo Rindza (hi Xinghezi) xi sungula ku humesiwa a ku ri xibukwana xa matluka ya nhungu, lexi humesiwaka kan’we hi n’hweti. Mpimo wa xona wu engeteriwe wu va matluka ya 16 hi 1891, naswona xi sungule ku huma kambirhi hi n’hweti hi 1892. Ku kandziyisiwa xi ri ni matluka ya 32 swi sungule hi 1950 hi tindzimi to tala.

Ku hundzuluxeriwa ka Xihondzo xo Rindza xi ya eka tindzimi tin’wana a ku nonoka. Nkandziyiso wun’we wa xikombiso wu humesiwe hi Xisweden hi 1883 leswaku wu tirhisiwa tanihi xiphephana. Ku sukela hi 1886 ku ya ka 1889, magazini wa mpimo lowutsongo wu kandziyisiwile le Jarimani. Kambe Xihondzo xo Rindza a xi nga ha kumeki hi Xijarimani ku fikela hi 1897, naswona xi ye emahlweni xi humesiwa nkarhi hinkwawo. Hi 1916 a xi kandziyisiwa hi tindzimi ta nkombo—ririmi ra le Denmark ni le Norway, Xifinland, Xifurwa, Xijarimani, Xinghezi, Xipoland ni Xisweden. Loko ku chumayela ka mahungu lamanene ku ya ku andza hi 1922, nhlayo ya tindzimi leti magazini lowu a wu humesiwa ha tona yi tlakuke yi va 16. Kasi, ku sukela hi 1993, a yi humesiwa hi tindzimi ta 112 nkarhi hinkwawo—tindzimi leti tirhisiwaka hi vanhu vo tala emisaveni. Tona a ti nga katsi tindzimi to kota Xinghezi, Xipaniya ni Xijapani ntsena, leti ha tona a ku kandziyisiwa timiliyoni ta tikopi ta nkandziyiso wun’wana ni wun’wana, kambe ni tindzimi to kota Xipalau, Xituvalu ni tin’wana leti a ku hangalasiwa tikopi ta madzana ma nga ri mangani ya tona ntsena.

Hi malembe yo tala Xihondzo xo Rindza a xi langutiwa tanihi magazini lowu ngopfu-ngopfu wu nga wa “ntlhambinyana” wa Vakreste lava totiweke. A wu nga hangalasiwi ngopfu; hi 1916 ku kandziyisiwe tikopi ta 45 000 ntsena. Kambe eku sunguleni ka 1935, hi ku phindha-phindha ku kandziyisiwe ku khutaza “Vayonadabu,” kumbe “ntshungu lowukulu,” leswaku wu tikumela ni ku hlaya Xihondzo xo Rindza nkarhi na nkarhi. Hi 1939, loko xifunengeto xa magazini xi sungule ku kandziyisa Mfumo, vanhu va nyikiwe swikhokhelo swa Xihondzo xo Rindza hi nkarhi wa tsima ra swikhokhelo ra matiko hinkwawo ra tinh’weti ta mune. Hikwalaho, nhlayo ya swikhokhelo yi tlakuke yi ya ka 120 000. Eka lembe leri landzeleke Xihondzo xo Rindza a xi fambisiwa nkarhi na nkarhi eka vanhu eswitarateni. Ku hangalasiwa ka xona ku andze hi xihatla. Eku sunguleni ka 1993 a ku kandziyisiwa 16 400 000 eka nkandziyiso wun’wana ni wun’wana hi tindzimi hinkwato.