‘Ndzi Yime eHenhla Ka Xihondzo Xo Rindza’
“Kutani a huwelela, a ku: ‘[Yehova], nḍa wonga tani hi nghala hi siku hikwaro, nḍi mulanguteri wa v̌usiku hi masiku hikwawo.’”—ESAYA 21:8.
1, 2. (a) I pakani yihi leyi Charles T. Russell a a ri na yona? (b) Xana tibuku ta Bibele a ti ta pfuna ku hetisisa pakani yakwe hi ndlela yihi?
WANUNA la chavaka Xikwembu wa malembe ya 21 hi vukhale loyi a tshamaka en’walungu-vuxa bya United States a a ri na ntirho wa vurhumiwa. A ku ri pakani yakwe ku paluxa vunwa bya tidyondzo ta vukhongeri bya siku rakwe, ngopfu-ngopfu tidyondzo ta ku xanisiwa loku nga heriki ni ku kunguhatiwa ka ha ri emahlweni. Nakambe, u lave ku lwela ntiyiso hi ta nkutsulo ni ta xivumbeko na mukhuva wa ku ta ka Kriste. Xana a a ta swi endlisa ku yini leswi hinkwaswo? Hi ku voninga ka Rito ra Xikwembu, Bibele leyo Kwetsima, eka tidyondzo ta vukhongeri.—Psalma 43:3; 119:105.
2 Charles T. Russell, muungameri wo sungula wa Sosayiti ya Watch Tower, a a ri wanuna yoloye, kutani u anakanye hi 1873 ku humesa tibuku ta vukhongeri tanihi ndlela yo tisa ku vonakala ka ntiyiso wa Bibele eku vonakaleni. Eka vahlayisi lavanene, tibuku toleto a ti ta hlavutela ku khehleka eka tidyondzo ta Vujagana. Tidyondzo tihi na tihi leti fihlekeke ta mavunwa a ti nga ta pona ku vonakala ka matimba ka Bibele. (Vaefesa 5:13) Hi nkarhi lowu fanaka, buku leyi a yi ta voningela ‘dyondzo leyi tiyeke’ leswaku yi aka ripfumelo ra vahlayi. (Tito 1:9; 2:11; 2 Timotiya 1:13) Xana ku hisekela ntiyiso wa Bibele loku susumeteke Russell eku lavisiseni kakwe a ku ri ko sungula?—Ringanisa 2 Tihosi 19:31.
Vakriste Vo Sungula: Tinghwazi Ta Rito Ra Xikwembu
3. Kriste Yesu u veke xikombiso xa ku lwela ntiyiso hi ndlela yihi?
3 Vakriste va lembe xidzana ro sungula va lwele ku tirhisiwa ka Rito ra Xikwembu exikarhi ka Vayuda ni Vamatiko. Va yime onge va yimisiwe ehenhla ka xihondzo xo rindza, va twarisa ntiyiso eka hinkwavo lava va yingisaka. (Matewu 10:27) Murhangeri wa vona, Yesu Kriste, u veke xikombiso. U te: “Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso.” (Yohane 18:37) Hambi leswi a a hetisekile, u ale ku tshembela eka vutlhari bya yena n’wini kumbe mianakanyo ya munhu hi xiyexe. Ku ri na sweswo, tidyondzo takwe ti sunguriwe hi Mudyondzisi wakwe Lonkulu, Yehova Xikwembu. “A ndzi endli nchumu hi ku tirhandzela ka mina,” u byele ntlawa wa Vayuda. “Kambe ndzi vula swilo leswi hi laha Tatana a ndzi dyondziseke ha kona.” (Yohane 8:28; nakambe vona Yohane 7:14-18.) Hi ku ya hi timhaka ta Evangeli ta vutirheli byakwe bya laha misaveni, Yesu u tshahe (kumbe a boxa mianakanyo leyi fanaka) leyi humaka eka kwalomu ka hafu yin’we ya tibuku ta Matsalwa ya Xiheveru.—Luka 4:18, 19; (Esaya 61:1, 2); Luka 23:46; (Psalma 31:5).
4. Nyika swikombiso swa hi laha Yesu a tirhiseke Rito ra Xikwembu ku dyondzisa ntiyiso ha kona.
4 Hambi ku ri endzhaku ka rifu ni ku pfuxiwa ka yena. Kriste a a ha tirhisa Rito ra Xikwembu ku dyondzisa ntiyiso. Hi xikombiso, loko Keleyopasi ni munghana wakwe va ri eku fambeni va suka e Yerusalema va ya aEmawusi, Yesu u pfune vadyondzisiwa volavo ku anakanyisisa hi Matsalwa. Mhaka yi ri: “Kutani a va hlamusela hi laha timhaka ta yena ti nga vuriwa eMatsalweni hinkwawo ha kona, ku sungula hi Muxe ku yisa eka vaprofeta hinkwavo.” (Luka 24:25-27) Endzhaku eka siku rero, Yesu u humelerile eka vaapostola va 11 ni le ka van’wana va vadyondzisiwa va yena leswaku a aka ripfumelo ra vona. Hi ndlela yihi? Hi ku tirhisa Matsalwa hi vutshila. Luka wa tsala: “Kava loko [Yesu] a pfula miehleketo ya vona leswaku va twisisa Matsalwa. Kutani a ku ka vona: ‘Kriste u ta twisiwa ku vaviseka, a t1hela a pfuka eku feni hi siku ra vunharhu.’”—Luka 24:45, 46.
5. Hi Pentekosta ya 33 C.E., Petro u landzele xikombiso xa Kriste eku tirhiseni ka Matsalwa hi ndlela yihi?
5 Endzhaku ka Xikombiso xa vona, hi lembe ra 33 C.E. bandlha ra Vukriste ri sungule vutirheli bya rona bya le rivaleni hi ku tirhisa Matsalwa. Masungulo: ndhawu leyi pfulekeke ehandle ka yindlu aYerusalema. Endzhaku ko twa mpfumawulo wa “ku hunga ka xidzedze” eka yindlu leyi, ntshungu wa magidi ya Vayuda va le Yerusalema ni vapfhumba va Vayuda va tisiwa eka ndhawu leyi kutani va hlengeletana. Petro wa yima—vaapostola lavan’wana va 11 va n’wi rhendzerile—kutani hi rito leri tlakukeke u sungula ku vulavula: “Vavanuna va Yudiya, na n’wina hinkwenu vaaki va Yerusalema, ndzi lombeni tindleve mi ta tiva leswi.” Kutani loko a komba “mhaka leyi vuriweke hi muprofeta Yoel” ni leswi ‘Davhida a swi vulaka,’ Petro u hlamusela hlori leri ra ha ku humelelaka ni leswaku “Yesu loyi [va] n’wi vambeke, hi yena loyi Xikwembu xi n’wi endleke Hosi ni Mesiya.”—Mintirho 2:2, 14, 16, 25, 36.
6. (a) Hlamusela leswi humeleleke eka nhlangano wa huvo leyi fumaka ya lembe xidzana ro sungula. (b) Mabandlha a ya tivisiwa hi ta makungu ya huvo leyi fumaka hi ndlela yihi, naswona hi vuyelo byihi?
6 Loko Vakriste vo sungula va lave vuxokoxoko lebyi twisisekaka ehenhleni ka ripfumelo ni mahanyelo, huvo leyi fumaka ya lembe xidzana ro sungula nakambe yi tirhise Matsalwa kahle. Hi xikombiso, eka nhlangano wa huvo leyi fumaka hi lembe ra 49 C.E., mudyondzisiwa Yakobo, loko a tirha tanihi mutshama-xitulu, u kokele mianakanyo ya vona eka tsalwa leri rinene leri kumekaka eka Amos 9:11, 12. “Vavanuna varikwerhu, ndzi yingiseni,” ku vula yena. “Simoni wa ha ku hlamusela hi laha Xikwembu xi nga sungula ha kona ku tikarhata, xi tilavela, exikarhi ka vamatiko, vanhu lava nga ta vuriwa va xona hakunene. Kutani marito ya vaprofeta ma twanana na swona sweswo, hikuva ku tsariwile leswi.” (Mintirho 15:13-17) Huvo hinkwayo yi yime na xiboho xa Yakobo kutani yi veka kungu ra yona leri sekeriweke hi matsalwa hi xivumbeko lexi tsariweke leswaku ri yisiwa eka mabandlha hinkwawo ivi ri hlayiwa hi wona. Mimbuyelo ku ve yihi? Vakriste “va tsakisiwa ngopfu hi marito lawa ya ku va khongotela,” kutani “tikereke ti tiyisiwa eku pfumeleni, ti andza siku rin’wana ni rin’wana.” (Mintirho 15:22-31; 16:4, 5) Xisweswo, bandlha ra Vakriste vo sungula ri ve “mhandze leyikulu ni xisekelo xa leswi nga ntiyiso.” Kambe ku vuriwa yini hi matimu ya manguva lawa? Xana C. T. Russell ni vanghana vakwe va Swichudeni swa Bibele a va ta entisa xikombiso lexi xinene, xa lembe xidzana ro sungula? A va ta lwela ntiyiso hi ndlela yihi?—1 Timotiya 3:15.
Timagazini Ni Langutelo Leri Fikaka eKule
7. (a) Xana xikongomelo xa Zion’s Watch Tower a ku ri xihi? (b) A xi langutele ku seketeriwa hi mani?
7 July 1879 yi vone ku velekiwa ka golonyi leyikulu ya Russell ya ku vonakala ka Bibele—Zion’s Watch Tower and Herald of Christ’s Presence. Nkandziyiso wa yona wo sungula wu veke xikongomelo lexi xiyekaka xa magazini lowu: “Tanihi laha vito ra wona ri kombaka ha kona, wu tiyimisele ku va xihondzo laha timhaka leti tsakisaka ni leti pfunaka a ti ta tivisiwa “ntlhambinyana” ti huma eka xona, naswona tanihi ‘Herald of Christ’s Presence,’ wu nyikela ‘swakudya hi nkarhi wa kona’ eka ‘va yindlu ya ku pfumela.’” Ku tshembela eka Xikwembu xa matimba hinkwawo a ku ri yinhla ya magazini lowu. Nkandziyiso wa yona wa vumbirhi wu te: “Hi tshemba leswaku, ‘Zion’s Watch Tower’ wu seketeriwe hi YEHOVA, naswona loko leswi swi ri tano wu nge wu kombeli nseketelo wa vanhu. Loko Loyi a nge: ‘Hinkwaswo nsuku ni silvere ya tintshava i swa mina,’ a hluleka ku nyikela timali leti lavekaka, hi ta wu twisisa ku ri nkarhi wo yimisa tibuku.”
8. Hlamusela ku kula ka Xihondzo xo Rindza eku vonakaleni ka Esaya 60:22 na Zakaria 4:10.
8 Zion’s Watch Tower, sweswi ku nga Xihondzo xo Rindza, wu hambete wu humesiwa sweswi hi malembe yo tlula 107. Wu kule wu sukela eka magazini wa n’hweti na n’hweti wa tikopi ta 6 000 leti gandlisiwaka hi ririmi rin’we wu ya eka magazini wa kambirhi hi n’hweti wa tikopi ta 12 315 000 lowu kumekaka hi tindzimi ta 103.—Ringanisa Esaya 60:22; Zakaria 4:10.
9. Xihloko lexi nge Watch Tower a xi ri lexi fanelaka hi ndlela yihi?
9 Xihloko lexi nge, Watch Tower, a ku ri ku hlawula loku kongomeke ka Russell. Rito leri hakanyingi ri tirhisiweke eka Matsalwa ya Xiheveru ra “xihondzo xo rindza” ri vula “murindzi” kumbe “xivandla xa vuvalangi,” laha murindzi a nga vonaka nala hi ku olova a ha ri ekule ivi a nyika mpfumawulo wa xitsundzuxo xa ku tshinela ka khombo. Kutani, hi laha ku fanelaka, eka malembe ya wona yo sungula ya 59 ya ku humesiwa, tluka ra xifunengeto ri tamele ku tshaha loku ka mphikamakaneta loku humaka eka Esaya 21:11, 12, King James Version: “Murindzi, Hi Tihi Ta Vusiku?” “Mixo Wa Ta.”
10. I mani loyi a tirhaka tanihi murindzi wa Esaya 21:11, naswona i mahungu wahi lama a ma tivisaka?
10 Murindzi la yimisiweke wa vuprofeta bya Esaya a a ri kusuhi ni ku ya emahlweni. Exikarhi ka xiyimo xa matimba lexo biha xa misava xa munyama, Russell hi ntsako u hangalasa mahungu lamanene ya “mixo” lowu taka. Ku Fuma ka Yesu Kriste ka Gidi ra Malembe ka ku rhula i xihloko xa ku amukela xitiviso. Kambe loko “mixo” wu nga si fika, ntlawa lowu tirhaka tanihi murindzi—masalela ya Israyele wa moya namuntlha—wu tsundzuxa hi ku ya emahlweni ka “vusiku” hi xivindzi, loku nga ta fikelela yinhla ya kona ya munyama eka ku “lwa ni Xikwembu xa Matimba Hinkwawo hi siku lerikulu ra kona” eArmagedoni.—Nhlavutelo 16:14-16.
11, 12. (a) Xana marito lama nga eka Esaya 21:8 ya komba leswaku ntlawa wa murindzi wa tshembeka ni ku phaphama hi ndlela yihi? (b) I xitirho xihi lexi xiviko xa namuntlha xi taka ha xona, naswona ngopfu-ngopfu xi hangalasiwe njhani?
11 Eku sunguleni, eka Esaya 21:8, hi tivisiwa murindzi loyi wo tshembeka hi marito lawa: “Kutani a huwelela, a ku: ‘[Yehova], nḍa wonga tanihi nghala hi siku hikwaro, nḍi mulanguteri wa v̌usiku hi masiku hikwawo.’”
12 Vona murindzi la yimeke eka xihondzo lexi tlakukeke hi mianakanyo, a korhamele emahlweni, a halahala swinene evugimamusi ni nhlekanhi, a tikarhatela ku vona munyama nivusiku—minkarhi hinkwayo a phaphamile. Sweswi u na mianakanyo leyikulu leyi hundziseriweke hi rito ra Xiheveru ra “xihondzo xo rindza” (mits·pehʹ) hi laha ri tirhisiweke ha kona eka Esaya 21:8. Tanihi leswi murindzi a hisekaka, i mani loyi emiehleketweni yakwe leyinene a nga kanakanaka xiviko xakwe lexi twalaka? Hi laha ku fanaka namuntlha, ntlawa wa murindzi wu tinyiketerile hi ku lavisisa Matsalwa ku vona leswi Yehova a swi hlayiseleke mafambiselo lawa ya swilo. (Yakobo 1:25) Kutani murindzi loyi u twarisa mahungu wolawo swinene na hi xivindzi, ngopfu-ngopfu hi matluka ya Xihondzo xo Rindza. (Ringanisa Amos 3:4, 8.) Magazini lowu wu nga ka wu nga khwanyani hi ku chava ku lwela ntiyiso!—Esaya 43:9, 10.
13. I magazini wihi lowu fambisanaka na wona lowu wu humeleleke hi 1919, naswona i xikongomelo xihi lexi fanaka lexi wu nga na xona?
13 Hi October 1, 1919, magazini lowuntshwa wu humelerile eka xiyimo xa misava: The Golden Age.a Ntlawa wa murindzi a wu ta tirhisa xitirho lexi tanihi munghana wa Xihondzo xo Rindza. Hambi leswi swihloko swa wona a swi nga handzisisi timhaka ta Bibele hi ku enta tanihi leswi swi nga eka Xihondzo xo Rindza, a wu phaphamisa vanhu eka tidyondzo ta vukhongeri byo hemba, ku ta ka ndzoviso wa mafambiselo layo biha ya swilo ni misava leyintshwa yo lulama leyi nga ta landzela. Ina, na wona a wu ta lwela ntiyiso!
14. A ku ri xihi xikongomelo xa Consolation, naswona endzhaku Awake!?
14 Malembe ya khume-nhungu endzhakunyana vito ra The Golden Age ri cinciwile ri va Consolation. “Vito lerintshwa ri yimela ntiyiso,” ku vule nkandziyiso wa October 6, 1937. Consolation yi ve Awake! ni nkandziyiso wa August 22, 1946. Eka nkandziyiso wolowo wu tshembisile: “Vutshembeki eka ntiyiso ku ta va xikongomelo lexikulu swinene xa magazini lowu.” Ku fikela namuntlha, a wu hlulekanga ku hlayisa xitshembiso xexo. Xa nkoka, Xihondzo xo Rindza ni Awake! ti tlakusela mujeko wa ntiyiso ehenhla leswaku hinkwavo va wu vona. Leswaku hi ku endla tano, timagazini leti ti landzela ndlela leyi twarisiweke hi bandlha ra Vukriste ro sungula.—3 Yohane 3, 4, 8.
Xihondzo xo Rindza Ni Awake!: Tinghwazi Ta Ntiyiso
15. (a) I endlelo rihi ro phamela swakudya swa moya namuntlha ri fanaka ni leriya ra bandlha ra Vukriste ro sungula? (b) Handle ko tshaha tindzimana ta Bibele, i yini xin’wana xi lavekaka? Nyika swikombiso.
15 Ntlawa wa “nandza lowo tshembeka, lowa vutlhari,” “murindzi,” namuntlha wu tirhisa magazini wa Xihondzo xo Rindza ehansi ka nkongomiso wa Huvo leyi Fumaka ya Timbhoni ta Yehova tanihi ndlela ya wona leyikulu yo phamela “swakudya hi nkarhi wa kona.” (Matewu 24:45) Leswi swi landza ntila wa bandlha ra lembe xidzana ro sungula, leri vekaka vuxokoxoko lebyi twalaka eka dyondzo ni mahanyelo hi xivumbeko lexi tsariweke leswaku swi “hlayeriwa vamakwerhu hinkwavo.” (1 Vatesalonika 5:27) Ku sukela eku sunguleni ka xona Xihondzo xo Rindza a ku ri magazini lowu tirhisaka Bibele ni ku dyondzisa Bibele. Hi xikombiso, nkandziyiso wo sungula wa Zion’s Watch Tower wu tshahile kumbe ku hlamusela matsalwa yo tlula 200 ku suka eka tibuku ta Bibele ta kwalomu ka 30. Kambe swo tala swa laveka ku tlula ku tshaha ntsena tindzimana ta Bibele. Vanhu va lava mpfuno leswaku va ti twisisa. Minkarhi hinkwayo Xihondzo xo Rindza xi antswise ku twisisa ka Bibele. Ku sukela hi 1892 ku ya eka 1927 nkandziyiso wun’wana ni wun’wana wu ve ni tidyondzo ta vhiki na vhiki ta Bibele ni ku vulavurisana ka ndzimana-nkulu eka ku hlaya kun’wana ni kun’wana. Ku kuma swikombiso swin’wana, vona chati leyi nge “Tinhloko-mhaka Ta Xihondzo xo Rindza Leti Endlaka Matimu, Hi Makume-Kume Ya Malembe.”
16, 17. Xana muhleri wo sungula wa Xihondzo xo Rindza u endle yini ku tiyisa leswaku magazini lowu minkarhi hinkwayo wu ta lwela ntiyiso wa Bibele?
16 Xana Xihondzo xo Rindza a xi ta hlayisa vutengi bya ku gandlisiwa ka mahungu ya xona hi ndlela yihi? Muhleri wo sungula wa magazini lowu, C. T. Russell, u yimise vahleri ku tiyisa leswaku leswi swi kandziyisiweke eka Xihondzo xo Rindza a wu ri ntiyiso hi laha a wu twisisiwa ha kona hi nkarhi wolowo. Un’wana wa vahlayisi volavo u kombisiwile eka xiboho xakwe lexi endliweke hi June 27, 1907. (Russell u fe hi October 31, 1916.) Xiboho xakwe xi ri:
“Ndzi tiyisa leswaku vutihlamuleri hinkwabyo bya vuhleri bya ZION’S WATCH TOWER byi ta va emavokweni ya komiti ya vamakwerhu va ntlhanu, lava ndzi va khongotelaka ku va ni vukheta lebyikulu ni ku hlayisa ntiyiso. Swihloko hinkwaswo leswi humelelaka eka tikholomo ta ZION’S WATCH TOWER swi ta va ni ku amukeriwa loku nga tiyangiki ka vanharhu va komiti ya lava va ntlhanu, naswona ndzi boha leswaku loko mhaka yihi na yihi yi amukeriwa hi vanharhu swi tiveka kumbe yi vonaka yi nga twanani ni malangutelo ya un’we kumbe vambirhi va swirho leswin’wana swa komiti, swihloko swo tano swi ta vekeriwa ku kambisisiwa, xikhongelo ni ku kanerisana hi tin’hweti tinharhu wu nga si humesiwa—leswaku hi laha swi nga kotekaka ha kona vun’we bya vupfumeri ni swiboho swa ku rhula swi ta hlayisiwa entirhweni wa vuhleri bya magazini lowu.”
17 Xirho xin’wana ni xin’wana xa Komiti ya Vuhleri, hi ku ya hi xiboho xa Russell, a xi fanele ku “tshembeka hi ku hetiseka eka tidyondzo ta Matsalwa” naswona a va fanele ku kombisa, “ku tenga ka vutomi, ku basa entiyisweni, ku hisekela Xikwembu, rirhandzu ra vamakwerhu ni ku tshembeka eka Muponisi tanihi swihlawulekisi leswi tlakukeke.” Nakambe, Russell u vule leswaku “hi ndlela yin’wana a swi nga kombisiwi leswaku i mani loyi tinhloko-mhaka to hambana-hambana leti humelelaka eka magazini ti tsariweke hi yena . . . leswaku ntiyiso wu ta tiviwa ni ku tlangeriwa hikwalaho ka ku faneleka ka wona n’wini, ni leswaku Hosi ngopfu-ngopfu yi ta tiviwa tanihi Nhloko ya kereke ni ya Xihlovo xa ntiyiso.”
18. Hikwalaho ka yini hi nga hlayaka Xihondzo xo Rindza ni Awake! hi ku tiyiseka?
18 Ku fika ni namuntlha Huvo leyi Fumaka yi landzela ntila lowu fanaka. Xihloko xin’wana ni xin’wana eka Xihondzo xo Rindza ni Awake! ni tluka rin’wana ni rin’wana, ku katsa ni ntirho wa vutshila, swi kambisisiwa hi swirho leswi hlawuriweke swa Huvo leyi Fumaka swi nga si gandlisiwa. Nakambe, lava va pfunetaka eku tsaleni ka swihloko swa Xihondzo xo Rindza i vakulu va Vukriste lava tlangelaka vukulu bya xiavelo xa vona. (Ringanisa 2 Tikronika 19:7.) Va heta tiawara to tala eku sechisiseni ka Bibele ni timhaka tin’wana ku tiyiseka leswaku leswi tsariweke i ntiyiso ni leswaku swi landzela Matsalwa hi ku tshembeka. (Eklesiasta 12:9, 10; 2 Timotiya 1:13) A hi leswi nga tolovelekangiki eka xihloko xin’wana xa magazini—leswaku u xi hlaya hi timinete ta 15—ku teka mavhiki mambirhi ku ya eka n’hweti leswaku u lunghiselela.
19. Xana u nga endla yini leswaku u lwela ntiyiso wa Bibele?
19 Hikwalaho ke, u nga hlaya Xihondzo xo Rindza ni Awake! hi ku tiyiseka. Kambe u nga endla swo tala. Hi ku chivirika u nga nyikela timagazini leti eka van’wana leswaku na vona va dyondza ntiyiso ivi va vuyeriwa hi ku twa mahungu ya ‘murindzi la yimeke ehenhla ka xihondzo xo rindza.’ (Esaya 21:8) Ina, kun’we ni murindzi wa manguva lawa, na wena u nga lwela ntiyiso wa Bibele.
[Nhlamuselo ya le hansi]
a Lexi tsakisaka, vahlayi van’wana eku sunguleni a va hetiwe matimba hi xifunengeto 1exi tsariweke xa The Golden Age. Eka vona wu humelele endhawini leyi tolovelekeke. Loko xi hlamula, xiviko xa lembe na lembe xa Sosayiti ya Watch Tower xi te: “Mayelana ni leswi hi ta ringanyeta leswaku enkarhini lowu buku ya The Golden Age yi sunguleke ha wona a ku ri na ku tereka ka vagandlisi eGreater New York. Hi masiku ma nga ri mangani emahlweni, kontraka yi endliwile ya buku ya The Golden Age naswona vavanuna lava a va tirhisa michini leyi tekaka muxaka wa phepha ni xifunengeto lexi tirhisiweke eka wona a yi hambetanga yi tereka. Xisweswo swi vonakile xi ri Xikwembu lexi hlawuleke xivumbeko xa xifunengeto ni phepha ra kona, hi mhaka ya leswi loko a ku lo hlawuriwa swin’wana ingi swi nga kotekanga ku sungula magazini wa kona. Xisweswo Hosi yi tikombe yi tsetselela buku leyintsongo.”
Wa Tsundzuka Xana?
◻ Ha yini C. T. Russell a sungule ku humesa tibuku ta Bibele?
◻ Vakriste vo sungula va lwele ntiyiso hi ndlela yihi?
◻ Hikwalaho ka yini rito leri nge “Xihondzo xo Rindza” ri ri xihloko xa magazini lowu?
◻ I mani murindzi wa manguva lawa, naswona i xitirho xihi lexi a xi tirhisaka swinene ku kurisa rito ra yena?
◻ Xana Xihondzo xo Rindza ni Awake! swi lwele ntiyiso wa Bibele hi ndlela yihi?
[Bokisi leri nga eka tluka 13]
Swihloko Swa Xihondzo xo Rindza Leswi Endlaka Matimu, Ya Makume-Kume Ya Malembe
1879: “Xikwembu I Rirhandzu”—xi lwela gandzelo ra nkutsulo ra Yesu tanihi xisekelo xa ku kutsuriwa ka vanhu
1879: “Ha Yini Vubihi Byi Pfumeleriwile”—xi hlamusele hi laha ku ta ka Yesu Kriste ku nga ta ka ku nga vonaki ha kona
1880: “Miri Wun’we, Moya Wun’we, Ku Tshemba Kun’we”—xi kombetele 1914 tanihi laha Minkarhi ya Vamatiko yi helaka kona
1882: “Hakelo Ya Xidyoho I Rifu”—xi paluxe dyondzo ya ku xaniseka hi laha ku nga heriki tanihi ku kaneta rirhandzu ra Xikwembu
1885: “Hundzuluko Ni Nguva Ya Vutlhari”—xi paluxe mianakanyo ya hundzuluko tanihi mavunwa
1897: “Matsalwa Ya Ri Yini Hi Ku Tirhisa Mimoya?”—xi nyike vumbhoni bya leswaku ku tirhisa mimoya swi na masungulo ya vudemona
1902: “Xikwembu Ku Sungula—Minhlawulo Ya Xona”—xi kandziyise ku yingisa nawu wa Xikwembu endyangwini ni le timhakeni ta bindzu
1919: “Ku Katekile La Nga Chaviki”—xi tise ku twisisa lokuntshwa eka nhlengeletano leyi pfukaka ya vagandzeri lava nga chaviki
1925: “Ku Velekiwa Ka Rixaka”—xi hlamusele vuprofeta lebyi kombaka leswaku Mfumo wa Xikwembu wu velekiwe hi 1914
1931: “Vito Lerintshwa”—ku sukela kwalaho ku ya emahlweni vito leri nge Timbhoni ta Yehova a ri ta hambanisa Vakriste va ntiyiso eka vagwinehi va Vujagana
1935: “Ntshungu Lowukulu”—xi kombe leswaku ku hlengeletiwa ka lava va nga ta hanya emisaveni hi masiku a ku ri karhi ku endleka
1938: “Nhlengeletano”—xi humese lunghiselelo ra ntiyiso ra le tilweni exikarhi ka Timbhoni ta Yehova
1939: “Vukala-tlhelo”—xi tiyise Timbhoni ta Yehova emisaveni hinkwayo ku tiyisela mintshikilelo ya Nyimpi ya Vumbirhi ya Misava
1942: “Ku Vonakala Ku Ri Koxe”—xi twarise mfungho wo ya emahlweni leswaku ntirho wo veka vumbhoni hi matimba wu ya emahlweni
1945: “Ku Nga Tsekatseki Eka Vugandzeri Lebyinene”—xi kombe leswaku Vakriste va fanele ku tshika ku amukela mimpompelo ya ngati
1952: “Ku Hlayisa Nhlengeletano Yi Basile”—xi kombe leswaku ku tsemiwa hi mabandlha i ka Matsalwa
1962: ‘Ku Ti Veka Ehansi Ka “Tihosi”—Ha Yini?’—xi nyikele swivangelo swa ku ti veka ehansi ka tihosi ta vanhu
1973: “Ku Hlayisa Bandlha Ra Xikwembu Ri Basile ‘Hi Nkarhi Wa Ku Avanyisa Ka Xona’”—xi khutaze ku papalata ku tirhisa fole
1979: “Ku Hisekela Yindlu Ya Yehova”—(Xinghezi) xi hlamusele leswaku ku chumayela hi yindlu na yindlu ku landza ntila wa vaapostola
1983: “Varhandziwa, . . . Tshamani eRirhandzwini Ra Xikwembu”—xi xalamukisele Vakriste eka matirhelo ya vagwinehi
1984: “Ku Famba Ni Xikwembu eMisaveni Leyi Kariheke”—xi tiyise leswaku Vakriste va fanele va nga vi na xiphemu eka vukari
1984: “Tshanga Ra Sweswinyana Ra ‘Tinyimpfu Tin’wana’”—xi kombise ndlela leyi ntlawa lowu wa laha misaveni wu nghenisiweke eka vun’we hi lavaya va nga “etshangeni” ra ntwanano lowuntshwa
1987: “Yubile Ya Vukriste Yi Chaputa Eka Gidi Ra Malembe”—xi kombe hi laha Vakriste hinkwavo lava tshembekaka va kumaka ntshunxeko ni vutomi ha kona