Vantshwa Lava Nga Ni Xivindzi Xo Vulavula Hi Ripfumelo Ra Vona

EXIKARHI ka Timbhoni ta Yehovha ku ni vantshwa vo tala. Va rhandza Xikwembu naswona va lwela ku hanya hi minkongomiso ya xona leyi humaka eBibeleni. Vantshwa lava va tibuma hi ripfumelo ra vona naswona va vulavula ha rona ni van’wana va ntshunxekile. Hi lava van’wana va vona.

◼ Loko Holly a ri eka gredi ya vutsevu, yena ni vadyondzi-kulobye va nyikiwe ntirho wo tsala xitsalwana hi xivutiso lexi nge, “Xana u nga xi tlhantlha njhani xiphiqo xa vutherorisi handle ko tirhisa madzolonga?” Holly u tirhise nkarhi lowu leswaku a tsala hi ntshembo wakwe wa vumundzuku lowu sekeriweke eBibeleni. U hlamusele leswaku ematin’wini hinkwawo ‘munhu a a fuma munhu ku n’wi endla swo biha.’ (Eklesiasta 8:9) Kutani u boxe ntshembo wa xiviri wa vanhu—ku nga Mfumo wa Xikwembu. U tsarile: “Leswi Yesu a nga Hosi leyi hlawuriweke ya Mfumo wolowo, swiphiqo hinkwaswo ku katsa ni vutherorisi, swi ta herisiwa.” Holly u yi hlamusele kahle ndlela leyi Yesu a nga ta hetisisa ha yona leswi vafumi va vanhu va nga taka va nga swi koti ku swi endla. U tsale a ku: “Loko a ha ri emisaveni, Yesu u kombise ndlela leyi a nga ta fuma ha yona. A a rhandza vanhu naswona a va khathalela. U kombise matimba lawa a nga na wona hi ku hanyisa lava vabyaka ni ku pfuxa lava feke. A yi kona hulumendhe ya vanhu leyi nga kotaka ku pfuxa vafi. Kambe Mfumo wa Xikwembu wu ta swi endla.” Holly u gimete xitsalwana xakwe hi marito lawa: “I Xikwembu ntsena lexi nga tlhantlhaka swiphiqo, ku nga ri vanhu.”

Ehansi ka xitsalwana xexo, mudyondzisi u tsale a ku: “U xumile! Rungula ra wena ra twala hakunene, Holly. U ri dyele marhambu ya nhloko.” Mudyondzisi u tlhele a tsakisiwa hileswi Holly a kombeteleke eMatsalweni. Leswi swi nyike Holly nkarhi wo vulavula ni mudyondzisi wakwe hi ta Xikolo xa Vutirheli bya le Tilweni, ku nga nongonoko wo vulavula ni ku dyondzisa lowu khomiwaka hi Timbhoni ta Yehovha vhiki ni vhiki. Mudyondzisi wakwe u amukele kopi ya buku-mpfuno leyi tirhisiwaka eXikolweni xa Vutirheli hi mandla mambirhi.

◼ Jessica u kote ku vulavula hi ripfumelo ra yena loko a tsala xitsalwana xa xikolo. U ri: “Ndzi kote ku tsala matluka manharhu malunghana ni ripfumelo ra mina. Xitsalwana xin’wana a xi vulavula hi Timbhoni ta Yehovha ni timfanelo ta vukhongeri. Mudyondzisi u veke xitsalwana lexi elayiburari leswaku lava va lavaka ku xi hlaya va xi hlaya. Sweswinyana ndza ha ku tata tluka rin’we hi ta nkhuvulo wa mina ni hi ndlela leyi siku rero ri veke ra nkoka ha yona eka mina. Swichudeni swi nyiketane hi switsalwana swa swona, kutani vadyondzi-kulorhi va ve ni lunghelo ro hlaya xitsalwana xa mina. Nhwanyana un’wana u te: ‘U tsale kahle. Swa tsakisa ku tiva mintirho leyi munhu a faneleke a yi endla loko a ri Mbhoni ya Yehovha. Ha ku nkhensisa hi ku khuvuriwa ka wena!’ Nhwanyana un’wanyana yena u te: ‘Mhaka ya wena a yi tsakisa swinene! Ndza tsaka leswi ripfumelo ra wena ri tiyeke swonghasi!’ Mufana un’wana u vhele a swi vekisa xileswi: ‘U tlharihile. Ha ku nkhensisa!’ ”

◼ Loko Melissa a ri ni 11 wa malembe, u ve ni lunghelo ro hlawuleka ro yimelela ripfumelo rakwe. “Muongori wa xikolo u tile etlilasini ya hina ya sayense a ta vulavula hi fambiselo ra nsawutiso. Hiloko ku pfuka mhaka ya mpompelo wa ngati. Loko xikolo xi humile, ndzi byele mudyondzisi wa mina wa sayense hi ta vhidiyo ya hina leyi vulavulaka hi ta ngati. Ndzi te na yona exikolweni hi siku leri landzelaka naswona mudyondzisi u muke na yona ekaya a fika a yi hlalela ni ndyangu wakwe. Hi xamundzuku wa kona u te ni vhidiyo exikolweni kutani a yi komba etitlilasini timbirhi ku katsa ni leyi a ndzi dyondza eka yona. Kutani u bumabumele Timbhoni ta Yehovha, a byela tlilasi leswaku loko a ku nga ri hina, inge byi nga ri kona vutshunguri byin’wana lebyi nga tirhisiki mpompelo. Loko a ndzi vuyisela vhidiyo, u ndzi vutisile, ‘Xana ndzi nga yi kuma njhani leyi ndzi nga ta yi veka elayiburari ya xikolo?’ Ndzi n’wi kumele yona. A a tsake ngopfu hikwalaho ka yona, na mina a ndzi tsakile!”

Holly, Jessica na Melissa hi van’wana va vantshwa lava nga Timbhoni ta Yehovha lava landzelaka xikhutazo xa le Bibeleni xo tsundzuka Muvumbi wa vona. (Eklesiasta 12:1) Xana na wena u endla tano? Loko swi ri tano, u nga tiyiseka leswaku u tsakisa mbilu ya Yehovha.—Swivuriso 27:11; Vaheveru 6:10.

Loko n’wina vantshwa mi vulavula hi vukhongeri bya n’wina eka vadyondzi-kuloni swin’we ni le ka vadyondzisi, swi nyikela vumbhoni bya matimba hi Yehovha Xikwembu ni hi switshembiso swa yena. Swi tlhela swi tiyisa ripfumelo ra n’wina naswona swi mi endla leswaku mi tinyungubyisa hi ku va ni lunghelo ro va exikarhi ka malandza ya Xikwembu. (Yeremiya 9:24) Ku nyikela vumbhoni exikolweni swi tlhela swi tirha tanihi xisirhelelo. Jessica u swi hlamusela hi ndlela leyi: “Vuyelo byin’wana lebyi ndzi byi kumaka hi ku vulavula hi ripfumelo ra mina, hileswaku swichudeni a swi ndzi sindzisi ku endla swilo leswi nga fambisaniki ni leswi Bibele yi swi vulaka.”

[Swifaniso leswi nga eka tluka 12]

Holly

[Swifaniso leswi nga eka tluka 12, 13]

Jessica

[Swifaniso leswi nga eka tluka 13]

Melissa