Ndlela Leyi Swi Pfunaka Ha Yona Ku Hlayela Vana

HI MUTSARI WA XALAMUKA! EPOLAND

Vahleri va tsima ra lembe ni lembe leri nga ni nhloko-mhaka leyi nge “Vanhu Hinkwavo Va Le Poland Va Hlayela Vana” va ri: “Ku hlaya ku pfuna munhu leswaku a va ni vutivi naswona a tlhariha. . . . Ku endla leswaku munhu a tirhisa vutlhari ni vutivi lebyi a nga na byona.” Loko leswi ku ri ntiyiso, ha yini vanhu vo tala lavakulu swin’we ni vana va teka ku hlaya ku ri nchumu lowu nyangatsaka?

Vasunguri va tsima leri va ri: “Munhu u fanele a tolovetiwa ku hlaya ni ku rhandza tibuku a ha ri ntsongo.” Va byela vatswari va ku: “Loko mi lava leswaku vana va n’wina va tlhariha naswona swi va fambela kahle exikolweni ni le vuton’wini, va hlayeleni siku ni siku ku ringana 20 wa timinete.”

Vatswari va khutaziwa leswaku va nga hlweli ku hlayela vana va vona kambe “va songa rigogo ra ha tsakama.” Rini? Vatswari va khutaziwa: “A hi hlayeleni ricece, hi ri xinga, hi ri languta hi ndlela ya rirhandzu naswona hi pfuxa ku tsakela ka rona hi marito ya hina. Hi ndlela leyi, loko n’wana a hlayeriwa u ta titwa a sirhelelekile, a tsakile naswona a rhandza munhu loyi a n’wi hlayelaka. Ku engetela kwalaho, swi endla leswaku a kula kahle emiehleketweni.”

Vahleri va tsima leri va vula leswaku “ku hlayela vana sweswi i swa nkoka swinene ku tlula eku sunguleni,” naswona va boxa tindlela tin’wana leti swi pfunaka ha tona. Ku hlayela vana swi va dyondzisa ku anakanya, “swi va pfuna ku twisisa vanhu van’wana, misava swin’we na vona vini, . . . swi endla leswaku va tsakela ku hlaya, swi kurisa matimba ya vona yo anakanya, swi endla leswaku va kula kahle emintlhavekweni, va anakanyela vanhu van’wana ni ku va ni ntwela-vusiwana, swi va dyondzisa mahanyelo lamanene, . . . swi endla leswaku va titshemba.” Handle ko kanakana, swi “sivela minkucetelo yo tala yo biha . . . leyi xungetaka mianakanyo ni timbilu ta vana,” ku gimeta vahleri va tsima leri.

Leswaku va vuyeriwa ngopfu loko u va hlayela, u fanele u tirhisa tibuku leti khutazaka vantshwa leswaku va tshinela eka Muvumbi wa vona wa le tilweni. Bibele i buku leyi nga hi pfunaka leswaku hi tshinela ekusuhi ni Xikwembu. Bibele yi vula leswaku ‘ku sukela loko a ha ri ricece’ muntshwa la vuriwaka Timotiya u dyondzisiwe “matsalwa yo kwetsima.” (2 Timotiya 3:15) Loko vatswari va hlayela vana, va nga ha katsa tibuku leti sekeriweke eBibeleni to fana ni leyi nge Buku Yanga Ya Timhaka Ta Bibele ni leyi nge Dyondza Eka Mudyondzisi Lonkulu, leti ngopfu-ngopfu ti tsaleriweke vana naswona ti kandziyisiweke hi Timbhoni ta Yehovha.