Tintshava I Mani La Nga Ta Ti Ponisa?

LE Bishkek, eKyrgyzstan (Asiya xikarhi) ku ve ni Nhlangano wa Tintshava ta Misava ku ringana masiku ya mune hi 2002. A ku ri nhlangano wo sungula lowu a wu tlhuvutsa mhaka ya tintshava. Vaseketeri va wona a va kholwa leswaku lembe ra 2002 a ri ta fungha “ku sungula ka nguva leyintshwa, leyi a yi ta endla leswaku vanhu va swi xiya leswaku tintshava i ta nkoka hakunene.”

Hinkwavo lava a va ri eka nhlangano wolowo va pfumelelane hi “Milawu ya Tintshava ya le Bishkek,” leyi a yi tamele milawu leyi a yi khumba hinkwavo lava lavaka ku sirhelela tintshava. Yi vule leswaku pakani a ku ri ku “antswisa vutomi bya vanhu lava tshamaka etintshaveni, ku sirhelela ikholoji ya le tintshaveni ni ku tirhisa rifuwo ra le ntshaveni hi vutlhari.”

Ku endliwe nhluvuko wo karhi. Fambiselo ra misava hinkwayo ra mintanga ya tiko ri sirhelela tindhawu to saseka ni leti nga ni swilo swo hambana-hambana swa ntumbuluko. Etindhawini to tala ta misava, mintlawa yo hlayisa ntumbuluko yi swi kotile ku hunguta ku onhiwa ka mbango. Xiboho xin’wana lexi endliweke eka Nhlangano wa Tintshava eBishkek a ku ri xa ku basisiwa ka thyaka ra nyutliya leri cukumetiweke eKyrgyzstan. Thyaka leri ri nga ni chefu yo tala a ri xungeta mphakelo wa mati ya vanhu va 20 wa tiphesente le Asiya xikarhi.

Hambiswiritano, ka ha ri ni swiphiqo leswikulu swinene eku sirheleleni ka tintshava ta misava. Hi xikombiso, hi 1995, vafumi va le Canada va simeke “Nawu wa Makhwati” leswaku va sirhelela makhwati lama seleke eBritish Columbia. Kambe, nkambisiso lowu landzeleke wu kume leswaku tikhampani to tsema mirhi a ti wu landzeleli nawu wolowo, naswona ti ye emahlweni ti tsema mirhi hambi ku ri etindhawini leti voyameke ngopfu. Nawu wa kona wu antswisiwilenyana hi 1997, tanihi leswi tikhampani to tsema mirhi a ti vula leswaku wu tika ngopfu.

Bindzu a hi rona ntsena ri vangaka swiphiqo. Xiboho xo hetelela lexi endliweke le ka Nhlangano wa le Bishkek xi kume leswaku nyimpi, vusweti ni ndlala, swi hoxa xandla eka ku onhiwa ka ikholoji ya tintshava. Tintshava ni planete leyi hinkwayo, swi ta ya emahlweni swi onhiwa kukondza hinkwaswo leswi vangaka ku onhiwa ka tiko swi herisiwa.

Ndlela Leyi Xikwembu Xi Khathalelaka Ntumbuluko Wa Xona Ha Yona

Hambileswi xiyimo lexi xi tikaka, kambe hi ni swivangelo swo va ni ntshembo. Xikwembu xa Matimba Hinkwawo xa khathala hi leswi swi humelelaka eka ntumbuluko wa xona. Bibele yi xi hlamusela tanihi Loyi “tinhlohlorhi ta tintshava” ti nga ta yena. (Pisalema 95:4) Xa khathala ni hi swiharhi leswi tshamaka etintshaveni. Hi ku ya hi Pisalema 50:10, 11, Yehovha u ri: “Xiharhi xin’wana ni xin’wana xa le khwatini i xa mina, swiharhi leswi nga ehenhla ka tintshava ta 1 000. Ndzi xi tiva kahle xivumbiwa xin’wana ni xin’wana lexi nga ni timpiko xa le tintshaveni, ni mintlhambi ya swiharhi swa nhova i ya mina.”

Xana Xikwembu xi na yona ndlela yo tlhantlha swiphiqo swa mbango wa misava? Ina, xi na yona! Bibele yi vula leswaku xi “[veke] mfumo lowu wu nga ta ka wu nga lovisiwi.” (Daniyele 2:44) Yesu Kreste, Mufumi la hlawuriweke wa hulumendhe yoleyo ya le tilweni, wa khathala swinene hi misava ni vanhu lava tshamaka eka yona. (Swivuriso 8:31) Mfumo wakwe wu ta simeka ku rhula emisaveni, wu ta herisa ku onheteriwa ka misava ni ku lulamisa laha planete ya hina yi onhiweke kona.—Nhlavutelo 11:18.

Loko u navela ntlhantlho wolowo, handle ko kanakana u ta ya emahlweni u khongela leswaku ‘mfumo wa Xikwembu wu ta.’ (Matewu 6:9, 10) Swikhongelo swo tano swi ta hlamuriwa. Ku nga ri khale Mfumo wa Xikwembu wu ta herisa vuhomboloki ni ku lulamisa planete ya hina laha yi onhiweke kona. Tintshava ti ta ‘huwelela hi ku tsaka’ hi ndlela yo fanekisela loko sweswo se swi endlekile.—Pisalema 98:8.