“Xana Vabohiwa Va Nga Hundzuriwa?”

Lexi a ku ri xivutiso lexi vutisiweke eka xifunengeto xa nkandziyiso wa “Xalamuka!” ya May 8, 2001. Vahlayi vo tala va swi tlangele swinene swihloko sweswo, leswi katsaka xiviko xa nongonoko wa tidyondzo leti sekeriweke eBibeleni lowu Timbhoni ta Yehovha ti wu tirhisaka ekhotsweni ra le Atlanta le Georgia, eU.S.A. Hi leswi swin’wana leswi hi swi kumeke emapapileni yo tala lawa hi tsaleriweke wona.

◼ “Tanihi leswi ndzi heteke malembe ya nhungu ndzi khomiwile, ndza swi vona leswaku nchumu lowu humeleleke i ntirho wo dyondzisa Bibele lowu Timbhoni ta Yehovha ti wu endlaka emakhotsweni. Loko ndza ha ri ekhotsweni ra le Atlanta, ndzi ve ni nkateko wo tirha ni ntlhanu wa lava va kombisiweke exihlokweni xa n’wina. A a ndzi tsakisiwa swinene hi rirhandzu ni nseketelo wa vona. Ndza va nkhensa vamakwerhu vo fana ni lava, lava hi kombisaka rirhandzu hina hi endleke swihoxo kambe hi ringetaka ku swi lulamisa hi va vanhu vo antswa.”—R. J.

◼ “Ndza ha ri ekhotsweni naswona vamakwerhu lava humaka eHolweni ya Mfumo ya le kusuhi va swi kotile ku hlela nongonoko lowunene wo hi dyondzisa laha. Hikwalaho ka sweswo, mubohiwa-kulorhi u khuvuriwile naswona mina, hambileswi ndzi tshameke ndzi susiwa evandlheni ra Vukreste, sweswi se ndzi vuyiseriwile. Vabohiwa van’wana vo tala va karhi va dyondza Bibele. Swi tiyisa nhlana ku tiva leswaku na hina hi xiphemu xa ntirho wo dyondzisa emisaveni hinkwayo. Hakunene swa tsakisa ku tirhela Yehovha, ku nga khathariseki leswaku hi le kwihi!”—J. M.

◼ “Hi 1970, ndzi khomeriwe nandzu lowu ndzi nga wu endlangiki. Ndzi gweviwe malembe ya 14. Loko ndzi ri ekhotsweni, ndzi sungule ku dyondza Bibele ni Timbhoni ta Yehovha. Ndzi tsakisiwe ngopfu hi ku tshembeka ka tona nileswi ti khathalaka hi vanhu. Loko ndzi ntshunxiwa, ndzi ye mahlweni ndzi dyondza kutani endzhakunyana hiloko ndzi khuvuriwa. Minkarhi yin’wana ndzi va ni gome ni ku hlundzuka hikwalaho ka ku pfumaleka ka vululami loku ndzi langutaneke na kona. Kambe ndzi titsundzuxa leswaku enkarhini lowu taka, Yehovha u ta herisa ku pfumaleka ka vululami ni ku xaniseka hinkwako. Vabohiwa va nga hundzuriwa loko vo landzela swiletelo leswi humaka eBibeleni. Nakambe va tsaka hileswi vamakwerhu va endlaka matshalatshala ya ku tinyika nkarhi wo va pfuna. Na mina ndzi tsakile!”—R. S.

◼ “Loko ndzi khotsiwa a ndzi dzaha, ndzi tirhisa swidzidzirisi, ndzi rhuketela naswona a ndzi nga byi xiximi vulawuri. A a ndzi ri xirho xa ntlawa wa swigevenga. Ku tlula kwalaho, a ndzi susiwile evandlheni ra Vukreste. Sweswi ndzi vuyiseriwile naswona ndzi endla nhluvuko lowunene. Hi ku pfuniwa hi ntiyiso ndzi titwa ndzi ntshunxekile!”—I. G.