Leswi Tshembisiwaka Hi “Xikwembu Xi Ri Xin’we Xa Ntiyiso”

YEHOVHA XIKWEMBU u veke mpatswa wa vanhu vo sungula eparadeyisini emisaveni—entangeni wa Edeni. U va byele leswaku va tswala vana naswona va ‘fuma misava,’ leswi a swi ta katsa ku ndlandlamuxa kaya ra Paradeyisi loko ndyangu wa vona wu ri karhi wu kula. (Genesa 1:26-28; 2:15) Xana xikongomelo xa Xikwembu hi vanhu xa leswaku va tsaka emisaveni leyi nga paradeyisi xi ta kala xi hetiseka?

Ina, xi ta hetiseka! Hi ku ya hi vuprofeta bya Bibele, “[Yehovha] u ta mita rifu hi masiku” naswona “u ta sula mihloti eswikandzeni hinkwaswo.” Loko leswi swi humelela, “un’wana u ta ku: ‘Maswivo! Lexi i Xikwembu xa hina. Hi tshembe xona, naswona xi ta hi ponisa. Loyi i Yehovha. Hi tshembe yena. A hi tsakeni, hi tsakela ku ponisiwa hi yena.’”—Esaya 25:8, 9.

Buku yo hetelela ya Bibele yi hlamusela xiyimo xa misava endzhaku ka loko misava leyi kumbe mafambiselo lawa ya swilo lama fumiwaka hi Sathana ma herisiwile. Malunghana ni “misava leyintshwa” leyi eka yona ku nga ta va ni vanhu lava rhandzaka Xikwembu, Bibele yi ri: “Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:1-4.

Mawaku switshembiso leswinene swonghasi! Xana hi nga swi tshemba? Xiya ndlela leyi ha yona rifu ra Yesu ra gandzelo ni masingita lawa a ma endleke swi nga xisekelo xa ntshembo wa leswaku Xikwembu xi ta swi hetisisa hinkwaswo leswi xi swi tshembisaka.—2 Vakorinto 1:20.

Yesu U Nyikele Vutomi Bya Yena Tanihi Nkutsulo

Loko Sathana a kucetele Adamu leswaku a nga yingisi Xikwembu nileswaku a dyoha, vatukulu va Adamu hinkwavo va kume ndzhaka ya xidyoho xa yena. Bibele yi ri: “Tanihi leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” Kambe, Bibele ya engetela: “Vo tala va ta va lava lulameke hikwalaho ka ku yingisa ka munhu un’we [Yesu munhu la hetisekeke].” (Varhoma 5:12, 19) Hilaha swi hlamuseriweke hakona eka xihloko xo sungula xa ntlhandlamano lowu, Yesu i “Adamu lowo hetelela,”—loyi a “huma[ka] etilweni”—loyi a nyikeleke vutomi bya yena tanihi “nkutsulo wa lavo tala.”—1 Vakorinto 15:45, 47; Matewu 20:28.

Kutani hinkwavo lava kombisaka ripfumelo eka Yesu va ta “ntshunxiwa [exidyohweni] hi nkutsulo” naswona va ta kuma vutomi lebyi nga heriki. (Vaefesa 1:7; Yohane 3:36) Ha tsaka hileswi Yehovha Xikwembu a rhandzeke vanhu swonghasi lerova a nyikela hi N’wana wa yena a va Muponisi wa hina! (Luka 2:10-12; Yohane 3:16) Ku kambisisa leswi Yesu a swi endleleke vanhu lava xanisekaka eka lembe-xidzana ro sungula swi endla leswaku hi vona leswi vumundzuku byi hi khomeleke swona. Leswi Yesu a swi endleke a swi hlamarisa hakunene!

Xikombiso Xa Misava Leyintshwa

Yesu a a swi kota ku hanyisa mavabyi ya mixaka hinkwayo ni ku hanyisa vanhu lava vabyaka lava a va tisiwa eka yena. A ku na munhu loyi a tsandzekeke ku n’wi hanyisa, ku nga khathariseki vuvabyi lebyi n’wi khomeke. Ku tlula kwalaho, u phamele vanhu va magidi hi singita hi tinhlampfi ni swinkwa swi nga ri swingani ntsena, naswona u swi endle ko hlayanyana.—Matewu 14:14-22; 15:30-38.

Loko Yesu a pfule mahlo ya wanuna loyi a velekiweke a fe mahlo, vanghana ni lava n’wi tivaka va pfumerile leswaku u endle singita, kambe varhangeri va vukhongeri va Vayuda a va kanakana. Kutani wanuna loyi a hanyisiweke u va byele a ku: “Ku sukela khale a swi si tshama swi twakala leswaku munhu u pfule mahlo ya loyi a velekiweke a fe mahlo. Loko munhu loyi a a nga humi eka Xikwembu, a a nga ta endla nchumu nikatsongo.”—Yohane 9:32, 33.

Hi nkarhi wa vutirheli bya Yesu, muzala wakwe Yohane Mukhuvuri, loyi a a khomiwile, u rhumele varhumiwa leswaku va ya tiyisisa loko leswi a swi twaka hi ta Yesu swi ri ntiyiso. Loko yi vulavula hi Yesu, Bibele yi ri: “Hi nkarhi wolowo a hanyisa mavabyi yo tala ni swifo swa khombo ni mimoya yo homboloka, a pfuna vanhu vo tala lava feke mahlo leswaku va vona.” Kutani Yesu a byela varhumiwa a ku: “Vikela[ni] Yohane leswi mi swi voneke ni ku swi twa: lava feke mahlo va sungula ku vona, lava khutaka va famba, va nhlokonho va basisiwa naswona lava feke tindleve va twa, ni lava feke va pfuxiwa.”—Luka 7:18-22.

Anakanya ha swona: Loko ku humelele nchumu lowunene enkarhini lowu hundzeke, xana a swi nga ta ku tiyisekisa leswaku wu nga tlhela wu humelela? Hi ku endla masingita, Yesu u kombise leswi a nga ta swi endla emisaveni hinkwayo loko a fuma a ri Hosi ya Mfumo wa Xikwembu. Masingita ya yena i xitiyisekiso xa leswaku a a rhumiwe hi Xikwembu nileswaku a a ri N’wana wa Xikwembu hakunene.

Loko Mfumo wa Xikwembu wu fuma, ku ta hetiseka vuprofeta lebyi kongomeke lebyi vulavulaka hi swilo leswinene. Hilaha swi profetiweke hakona, lavo-fe-mahlo va ta vona, lava feke tindleve va ta twa, lava lamaleke va ta tlula kukota timhunti, naswona ku hava la nga ta vabya. Ku ta tlhela ku va ni ku rhula ni nsirhelelo emisaveni hinkwayo. Hambi ku ri swiharhi leswi nga ni khombo sweswi swi ta hanya hi ku rhula ni vanhu.—Esaya 9:6, 7; 11:6-9; 33:24; 35:5, 6; 65:17-25.

Xana u nga swi tsakela ku hanya hilaha ku nga heriki ehansi ka Mfumo wa Xikwembu, u hanya ehansi ka swiyimo swo tano? Yesu u kombise leswi u faneleke u swi endla loko a vula marito lawa loko a khongela eka tata wakwe: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Onge u nga hambeta u nghenisa vutivi byo tano lebyi nyikaka vutomi.

[Xifaniso lexi nga eka tluka 23]

Xikwembu xi tshembisa leswi emisaveni