A Ndzi Tiyimisele Ku Fikelela Pakani Ya Mina
HI KU VULA KA MARTHA CHÁVEZSERNA
Siku rin’wana loko ndzi ri ni malembe ya 16, ndzi tshame ndzi titivala loko ndzi ri karhi ndzi tirha ekaya. Loko ndzi xalamuka, a a ndzi ri emubedweni. Leswi a ndzi pfilunganyekile naswona ndzi pandziwa hi nhloko, ku hundze timinete to hlayanyana ndzi nga voni naswona ndzi nga twi. A ndzi chuhile. Xana ku humelele yini eka mina?
VATSWARI va mina lava a va karhatekile va ndzi tsutsumisele eka dokodela, loyi a fikeke a ndzi nyika tivhithamini. U vule leswaku ku titivala ka mina a ku vangeriwa hi ku xuxa ngopfu. Endzhaku ka tin’hweti timbirhi, ndzi tlhele ndzi khomiwa hi vuvabyi byin’wana bya milombyani, byi tlhele byi ndzi khoma ra vunharhu. Hi tlhele hi ya lava mpfuno eka dokodela un’wana, loyi a ringanyeteke leswaku swi nga ha endleka leswaku ku titivala ka mina a ku vangeriwa hi ku chava naswona u ndzi nyike mirhi leyi verhamisaka mianakanyo.
Hambiswiritano, ndzi sungule ku tshamela ku titivala. A ndzi tshamela ku wa naswona ndzi vaviseka. Minkarhi yin’wana a ndzi tiluma ririmi ni le ndzeni ka nomu. Loko ndzi xalamuka, nhloko a yi pandza swinene naswona a ndzi hlambiwa hi timbilu. Miri wa mina hinkwawo a wu vava, naswona a ndzi nga tali ku tsundzuka leswi endlekeke loko ndzi nga si titivala. Leswaku miri wa mina wu tlhelela exiyin’weni xa wona, a swi lava leswaku ndzi etlela siku rin’we kumbe mambirhi, ndzi wisa. Hambiswiritano, a ndzi ri ni ntshembo wa leswaku a ko va xiphiqo xa xinkarhana—a ndzi ehleketa leswaku xi ta hela hi ku famba ka nkarhi.
Ndlela Leyi Tipakani Ta Mina Ti Khumbekeke Ha Yona
Loko ndza ha ri ntsongo, ndyangu wa ka hina wu sungule ku dyondza Bibele ni Timbhoni ta Yehovha. Vadyondzisi va hina a ku ri maphayona mambirhi yo hlawuleka kumbe vatirheli va nkarhi hinkwawo lava va tinyiketeleke ku tirha tiawara to tala n’hweti yin’wana ni yin’wana va dyondzisa vanhu van’wana ntiyiso wa Bibele. A ndzi swi vona leswaku vutirheli bya maphayona wolawo a byi va nyika ntsako. Loko ndzi ri karhi ndzi vulavula ni thicara wa mina ni vadyondzi-kulorhi hileswi Bibele yi swi tshembisaka, na mina ndzi sungule ku va ni ntsako lowu a va ri na wona.
Endzhakunyana, swirho swa ndyangu wa ka hina swo tala swi sungule ku va Timbhoni ta Yehovha. A swi ndzi tsakisa ngopfu ku chumayela mahungu lamanene! Loko ndzi ri ni malembe ya nkombo, ndzi tivekele pakani yin’wana ya ku va phayona ro hlawuleka. Loko ndzi ri ni malembe ya 16, ndzi teke goza lerikulu hi ku khuvuriwa. Hiloko ndzi sungula ku titivala.
Ntirho Wa Vuphayona
Hambileswi a ndzi vabya, a ndzi vona leswaku ndzi nga va mutirheli wa nkarhi hinkwawo wa Timbhoni ta Yehovha. Kambe leswi a ndzi titivala kambirhi hi vhiki, van’wana evandlheni va ehlekete leswaku a ndzi fanelanga ku teka vutihlamuleri lebyikulu swonghasi. Ndzi twe ku vava naswona ndzi hele matimba. Hambiswiritano, hi ku famba ka nkarhi ku fike mpatswa lowu tekaneke lowu a wu tirha erhavini ra Timbhoni ta Yehovha ra le Mexico. Wu twe hi ta ku tsakela ka mina ku va phayona ra nkarhi hinkwawo kutani wu ndzi khutazile swinene. Wu ndzi khorwisile leswaku vuvabyi bya mina a byi fanelanga byi ndzi sivela ku phayona.
Kutani, hi September 1, 1988, ndzi hlawuriwe ku va phayona ra nkarhi hinkwawo endhawini ya ka hina eSan Andrés Chiautla, le Mexico. A ndzi heta tiawara to tala n’hweti ni n’hweti ndzi ri karhi ndzi chumayela mahungu lamanene. Loko ndzi tsandzeka ku chumayela erivaleni hikwalaho ka vuvabyi, a ndzi tsalela vanhu va le ndhawini ya ka hina mapapila lama sekeriweke eMatsalweni leswaku ndzi va khutaza ku dyondza Bibele.
Vuvabyi Byi Kumeka
Hi nkarhi wolowo, vatswari va mina va humese mali yo tala va ya ndzi hakelela eka dokodela wa fambiselo ra misiha. Dokodela yoloye u kume leswaku ndzi khomiwe hi vuvabyi bya switshetshela. Hikwalaho ka vutshunguri lebyi ndzi byi kumeke, vuvabyi bya mina byi antswile malembe ya mune. Hi nkarhi wolowo, ndzi kote ku ya eXikolweni xa Ntirho wa Vuphayona, laha ndzi khutaziweke ku ndlandlamuxa vutirheli bya mina hi ku ya pfuna laha ku nga ni xilaveko lexikulu xa vachumayeri va evhangheli.
Vatswari va mina a va swi tiva leswaku a ndzi lava ku ndlandlamuxa vutirheli bya mina swinene. Leswi vuvabyi bya mina se a byi lawuleka, va ndzi pfumelerile leswaku ndzi ya eZitácuaro, le Michoacán State, ndhawu leyi nga ekule hi kwalomu ka 200 wa tikhilomitara ku suka ekaya. Ku tirha ni maphayona man’wana exiavelweni xexo swi ndzi endle leswaku ndzi byi tlangela ngopfu vutirheli bya nkarhi hinkwawo.
Hambiswiritano, endzhaku ka malembe mambirhi ndzi ri le Zitácuaro vuvabyi bya mina byi tlhele byi sungula. Ndzi tlhelele ekaya, ndzi pfilunganyekile ni ku khomiwa hi gome naswona ndzi lava mpfuno wa madokodela. Ndzi ye eka dokodela wa fambiselo ra misiha loyi a kumeke leswaku vutshunguri lebyi a ndzi byi tirhisa a byi vavisa xivindzi xa mina. Ndzi sungule ku lava tindlela tin’wana to tshunguriwa, tanihi leswi a hi nga ha ri na yona mali yo hakela madokodela yo hlawuleka. Ndzi sungule ku vabya ngopfu, hikwalaho ndzi boheke ku tshika vuphayona. Nkarhi wun’wana ni wun’wana a ndzi hela matimba loko ndzi titivala. Kambe loko ndzi hlaye Tipisalema ni ku hundzukela eka Yehovha hi xikhongelo, a ndzi kuma nchavelelo ni matimba.—Pisalema 94:17-19.
Ku Fikelela Pakani Ya Mina
Loko vuvabyi lebyi byi te bee, a ndzi titivala kambirhi hi siku. Kambe swilo swi sungule ku cinca. Dokodela un’wana u ndzi nyike vutshunguri byo karhi bya switshetshela, naswona ndzi sungule ku titwa ndzi hanye kahle nkarhi wo leha swinene. Kutani hi September 1, 1995, ndzi tlhele ndzi nghenela ntirho wa vuphayona bya nkarhi hinkwawo. Rihanyo ra mina a ri nga ha ndzi karhati, kutani endzhaku ka malembe mambirhi hinkwawo ndzi nga si titivala, ndzi endle xikombelo xo va phayona ro hlawuleka. Sweswo a swi ta vula ku heta nkarhi wo tala ndzi ri ensin’wini ni ku ya chumayela laha a ndzi laveka kona. Ehleketa ndlela leyi ndzi titweke ha yona loko ndzi hlawuriwa! Ndzi fikelele pakani leyi ndzi tivekeleke yona loko ndza ha ri ntsongo.
Hi April 1, 2001, ndzi sungule xiavelo xa mina lexintshwa etintshaveni ta Hidalgo State. Sweswi ndzi pfuna exidorobanini xa Guanajuato State. Kambe ndzi fanele ndzi nwa tiphilisi ni ku wisa kahle. Ndzi xiya ngopfu loko swi ta eka swakudya, ngopfu-ngopfu eka swakudya swa mafurha, khafeyini ni swakudya swa le swikoteleni. Nakambe ndzi ringeta ku ka ndzi nga hlundzuki kumbe ku karhateka ngopfu. Sweswo swi ndzi pfune ngopfu. Ku sukela loko ndzi ri phayona ro hlawuleka, ndza ha titivale kan’we ntsena.
Leswi ndzi nga tekiwangiki naswona ndzi nga riki na vutihlamuleri bya ndyangu, ndza swi tsakela ku ya emahlweni ndzi ri phayona ro hlawuleka. Ndzi kuma nchavelelo hi ku tiva leswaku ‘Yehovha a nga pfumali ku lulama lerova a nga rivala ntirho wa hina ni rirhandzu leri hi ri kombisaka hikwalaho ka vito ra rakwe.’ U ni rirhandzu swinene, hikuva a nga langutelanga leswi hi nga kotiki ku swi endla! Ku tiva ntiyiso wolowo swi ndzi pfune ku ehleketa hi ndlela leyi faneleke, leswaku hambiloko vuvabyi bya mina byo tlhela byi ndzi sivela ku phayona, ndza swi tiva leswaku Yehovha wa ha ta wu tsakela ntirho wa mina lowu ndzi wu endlaka hi mbilu ya mina hinkwayo.—Vaheveru 6:10; Vakolosa 3:23.
Handle ko kanakana, swi ndzi tiyisile ku bula ni van’wana hi ta ripfumelo ra mina siku ni siku. Nakambe swi ndzi endla ndzi vona kahle mikateko leyi Xikwembu xi hi vekeleke yona enkarhini lowu taka. Bibele yi tshembisa leswaku emisaveni leyintshwa, ku vabya a ku nge he vi kona, “hambi ku ri ku kolola, ni xirilo ni xitlhavi a swi nge he vi kona. Swilo swo sungula swi [ta va swi] hundzile.”—Nhlavutelo 21:3, 4; Esaya 33:24; 2 Petro 3:13.
[Swifaniso leswi nga eka tluka 14]
Loko ndzi ri ni kwalomu ka malembe ya nkombo (ehenhla); ndzi ri na kwalomu ka malembe ya 16, loko ndza ha ku khuvuriwa
[Xifaniso lexi nga eka tluka 15]
Loko ndzi chumayela ni munghana wa mina