Ku Pfumaleka Ka Makaya—Hi Wihi Ntlhantlho Wa Kona?

“NYIKA munhu nhlampfi, u ta dya yona siku rin’we. Dyondzisa munhu ku phasa nhlampfi, u ta tiphasela vutomi hinkwabyo.” Xivulavulelo lexi xi kombisa ntiyiso wa leswaku ku enerisa swilaveko swa munhu swa nkarhinyana a swi nge pfuni nchumu. Swa antswa ku pfuna vanhu leswaku va dyondza ndlela yo tlhantlha swiphiqo ni ku enerisa swilaveko swa vona vini. Vanhu vo tala va fanele va dyondzisiwa mintirho yo karhi kumbe langutelo rin’wana ni ndlela yo karhi yo hanya.

Timbhoni ta Yehovha ti kholwa leswaku ndlela leyinene ngopfu yo pfuna vanhu lava pfumalaka makaya i ku va dyondzisa ndlela leyinene yo hanya. Leswi vulaka ku hanya hi switsundzuxo leswinene ku tlula hinkwaswo—ku nga leswi humaka eka Muvumbi. Phela hi yena loyi a nga hi nyikaka switsundzuxo leswinene! Switsundzuxo swa yena swi pfuna vanhu leswaku va papalata swiphiqo swo tala leswi nga endlaka leswaku vanhu va pfumala makaya. Swi tlhela swi pfuna vanhu va timbilu letinene lava nga ni xiphiqo lexi leswaku va xi hlula. Phela, ku hlaya Bibele ntsena a swi nge endli leswaku swiphiqo hinkwaswo leswi hi nga na swona swi hela. Hambiswiritano, Bibele yi nga ku pfuna leswaku u tshika mikhuva yo biha, u tixixima ni ku hanya vutomi lebyi xiximekaka.

Vanhu vo tala va lahlekeriwe hi makaya hikwalaho ka mikhuva yo biha, vugevenga, swiphiqo swa mali kumbe ku hohloka ka ndyangu. Bibele yi nyikela ndzayo leyinene eka timhaka leti hinkwato. Ku tirhisa ndzayo yoleyo swi pfune vanhu vo tala swinene leswaku va cinca langutelo ra vona hi vutomi—ni ku cinca vumunhu bya vona—va hanya hi ndlela leyinene. Phela, ku tirhisa ndzayo ya Matsalwa ntsena, a swi nge swi tlhantlhi swiphiqo leswi fambisanaka ni ku pfumaleka ka makaya. Makhombo ya ntumbuluko, vuvabyi, vusweti lebyikulu, ku godzomberiwa ni swin’wana, i swiphiqo swa nkarhinyana leswi lavaka leswaku vanhu van’wana va pfuna eka swona. Hambileswi Timbhoni ta Yehovha ti endlaka matshalatshala yo pfuna vanhu lava karhatiwaka hi swilo swo kota leswi, ta swi xiya leswaku i Muvumbi wa vanhu ntsena loyi a nga kotaka ku susa swiphiqo leswi hilaha ku nga heriki. Xana u ta swi susa?

Xikongomelo Xa Xikwembu Xo Sungula

Ku ni xivangelo lexinene xo tshemba leswaku ku pfumaleka ka makaya ku ta hela ku nga ri khale. Exisekelweni xihi? Anakanya: Yehovha Xikwembu u nyike mpatswa wo sungula kaya. Xikwembu xi va veke eparadeyisini, laha a va ri ni swilo hinkwaswo leswi a va swi lava. Loko a va yingise nkongomiso wa Muvumbi, a va ta va va endle misava hinkwayo yi va Paradeyisi. Vatukulu va vona a va ta va ni ndzalo ni tiyindlu ta kahle. Vanhu hinkwavo a va ta rhandzana ni ku tirhisana. Lexi a ku ri xikongomelo xo sungula xa Xikwembu. A xi si cinca miehleketo.—Pisalema 37:9-11, 29.

Tlhandlakambirhi, xin’wana ni xin’wana lexi Xikwembu xi xi lavaka xi ta humelela, hambi ko ba lexi dumaka. (Esaya 55:10, 11) Bibele yi profete leswaku ku ta fika nkarhi laha un’wana ni un’wana a nga ta va ni kaya ra yena n’wini ni swilo swin’wana. Phela, loko sweswo swi nga si humelela, vanhu hinkwavo va fanele va cinca. Ku cinca koloko ku ta va kona loko Xikwembu xi nghenelela etimhakeni ta vanhu. Hi swona leswi Yesu a a ehleketa ha swona loko a byela vadyondzisiwa va yena ku khongela va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

Ehansi ka Mfumo wa Xikwembu wo lulama, vanhu lava yingisaka va ta vona ku hetiseka ka vuprofeta lebyi, lebyi khumbaka mbilu lebyi nge: “Va ta aka tindlu va tshama eka tona . . . A va nge aki kutani ku tshama un’wana; a va nge rimi kutani ku dya un’wana. . . . Ntirho wa mavoko ya vona, vahlawuriwa va mina va ta wu tirhisa hi xitalo.” (Esaya 65:21, 22) Hi ku komisa, ku hava munhu loyi a nga ta va a pfumala kaya.

Timbhoni ta Yehovha ti endla matshalatshala yo nyika vanhu mpfuno wa moya lowu va wu lavaka sweswi. Ti tsakela ku komba vanhu rirhandzu leri Yesu a vulavuleke ha rona. (Matewu 22:36-39) Ku khathala hi van’wana swi tlhela swi ti susumetela ku pfuna lava lahlekeriweke hi makaya ya vona hikwalaho ka makhombo ya ntumbuluko.a

Entiyisweni, Timbhoni ta swi xiya leswaku a swi nge koteki ku pfuna vanhu hinkwavo. Jacek, wa le Poland, loyi a tshamaka endhawini ya vanhu lava pfumalaka makaya, u vula leswi malunghana ni vanhu lava pfumalaka makaya: “Van’wana va ni tihanyi kumbe va lawuriwa hi swidzidzirisi. Van’wana a va ti rhandzi timhaka ta vukhongeri, va ehleketa leswaku Xikwembu a xi va rhandzi. Kambe ku ni lava angulaka kahle eRitweni ra Xikwembu.” Hi xikombiso, Jacek hi byakwe u endle tano. U sungule ku dyondza swo tala leswi Bibele yi swi dyondzisaka.

Wanuna un’wana la nga riki na kaya la anguleke kahle i Roman, loyi a nga na AIDS naswona a ha ku sukaka exitarateni. U ri: “Loko ndzi fika endhawini leyi ku Pfuniwaka Vanhu eka yona, a ndzi nga swi tivi leswaku Timbhoni ta Yehovha ti hlanganyela kwala kusuhi. Ku nga ri kungani ti sungule bulo na mina exitarateni, ti hlamusela leswaku Xikwembu xa xi twa xirilo xa vanhu lava pfumalaka makaya. Ti tlhele ti ndzi rhambela eka wun’wana wa minhlangano ya tona.”—Pisalema 72:12, 13.

Xana swi n’wi khumbe njhani leswi a swi tweke? “Ndzi dyondze leswaku ndzi nga hanya hilaha ku nga heriki emisaveni eParadeyisini nileswaku ndzi wa risima emahlweni ka Xikwembu. Ku va ni vanghana lavantshwa lava khathalaka ha mina swi endle leswaku ndzi tshika ku anakanya hi vusiwana bya mina kutani ndzi sungula ku cinca vutomi bya mina. Ku rhandza Xikwembu swi endle leswaku ndzi tshika ku dzaha naswona ndzi kombele leswaku xi ndzi pfuna ndzi famba endleleni yo lulama.”

Roman u endle nhluvuko lowukulu hi tlhelo ra moya naswona ku nga ri kungani u khuvuriwile a va Mbhoni ya Yehovha. Hi ku pfuniwa hi vapfumeri-kulobye ni valawuri, u swi kotile ku kuma ndhawu ya kahle yo tshama. Roman u vula marito lawa hi ntsako: “Ndzi tsakile swinene. Ndzi tshinele ekusuhi ni Xikwembu xa rirhandzu, lexi endleke leswaku ndzi tlhela ndzi va ni xikongomelo evuton’wini. Xi ndzi nyike ndyangu lowunene wa vamakwerhu va xinuna ni va xisati swin’we ni kaya!”

Vumundzuku Bya Lava Pfumalaka Makaya

Timbhoni ta Yehovha ti kombisa ntwela-vusiwana eka vaakelani va tona hinkwavo ku katsa ni lava pfumalaka makaya. Ti hisekela ku byela van’wana ntiyiso lowu nga eBibeleni wa vumundzuku lebyinene—ntiyiso lowu hambi ku ri sweswi wu nga cincaka vutomi.—Yohane 8:32.

Bibele yi ri: “Leswi swi endliweke swi gombonyoka a swi nge ololoxiwi.” (Eklesiasta 1:15) Phela, ku nga khathariseki matshalatshala lamanene lama endliwaka hi vatirhi va ku tirhandzela ni valawuri, swiphiqo leswikulu swo kota ku pfumaleka ka makaya ni vusweti swa tika ku swi herisa. Hambiswiritano, Bibele ya hi tiyisekisa leswaku ku nga ri khale, vanhu hinkwavo lava yingisaka va ta tsakela vutomi ehansi ka swiyimo leswinene eMfun’weni wa Xikwembu.

[Nhlamuselo ya le hansi]

[Xifaniso lexi nga eka tluka 8]

Manana la nga muhlapfa la humaka eSomalia a khome khadi ro phaka swakudya ha rona

[Xihlovo Xa Kona]

© Trygve Bolstad/Panos Pictures

[Xifaniso lexi nga eka tluka 9]

Ku tlula hinkwaswo, vanhu lava pfumalaka makaya va lava ku va ni ntshembo hi vumundzuku

[Swifaniso leswi nga eka tluka 10]

EMfun’weni wa Xikwembu ku hava munhu loyi a nga ta pfumala kaya