Ku Endzela Ndhawu Leyi Ku Endliwaka Swirho Eka Yona — Watchtower LAYIBURARI YA LE KA WEB SITE

Ku Endzela Ndhawu Leyi Ku Endliwaka Swirho Eka Yona

HI MUTSARI WA XALAMUKA! LE NEW ZEALAND

A NDZI ri ni swivangelo swimbirhi swo kombela ku endzela Ndhawu yo Endla Swirho eWellington, le New Zealand. Xo sungula, nenge wa mina lowu ndzi endleriweke wona a wu fanele wu lunghisiwa. Xa vumbirhi, a ndzi lava ku ya valanga ndhawu leyi leswaku ndzi ta dyondza swo tala mayelana ni ndlela leyi ku endliwaka swirho ha yona.

Dokodela loyi a ndzi endleleke nenge u pfumerile ku ndzi valangisa ndhawu yoleyo. Ndzi dyondze swo tala, naswona swi ndzi endle leswaku ndzi tlangela swinene ntirho lowu endliwaka hi lava va tinyiketeleke ku endla swirho.

Xana Nenge Wu Endliwa Njhani?

Vavabyi vo tala lava taka endhawini leyi va tela ku ta tlhomiwa nenge lowu nga lo endliwa. Leswaku va ku endlela nenge, va sungula hi ku endla nchumu lowu nga ta khotleka exipimbini lexi vaka xi hole kahle hi nkarhi wolowo. Kutani ku endliwa rimba ra xipimbi hi vumba byo hlawuleka, leswi swi endla leswaku va kota ku vumba nenge lowu fanaka ni wa xipimbi xa kona. Rimba rero ri tirhisiwa ku endla ndhawu leyi xipimbi ni nenge lowuntshwa swi nga ta hlangana kona. Hi ndlela yoleyo, munhu u sungula ku endleriwa nenge lowu tirhaka kahle, lowu nga ta siva lowu n’wi lahlekeleke. Maendlelo ya sweswinyana, lawa ya tirhaka kahle ku pima xipimbi, i ku tirhisa progreme leyi pakanisaka ya khompyuta leyi vitaniwaka CAD/CAM. Kutani muchini wu kota ku dirowa kahle xirho lexi nga ta nghena kahle eka xipimbi lexi munhu a saleke na xona.

Endzhaku ka loko ndzi vone vutshila bya xithekiniki lebyi va byi tirhisaka endhawini yoleyo, ndzi tlhele ndzi kombiwa swilo leswi va swi xaveke ematikweni man’wana leswi se swi lunghekeleke ku tirhisiwa ku endla swirho swa vanhu. Xin’wana xa leswi swi ndzi hlamariseke a ku ri tsolo ra plasitiki leri loko ri kufumetiwa a ri sungula ku olova leswaku ri nghena kahle laha ri faneleke ri nghena kona kutani ri tlhela ri tiya loko ri sungula ku titimela. Ku ni tibuku leti nga ni swifaniso swa swirho swo tano leswi kumekaka etindhawini to hambana-hambana emisaveni.

Loko va hetisela ku endla nenge, va lunghisa laha ni lahaya leswaku tsolo, nhlonge ni nkondzo swi fambisana leswaku munhu a ta kota ku famba kahle. Kutani va hetelela hi ku endla rhaba leyi nga ta pfala nenge. Rhaba leyi yi pfuna ku funengeta tinsimbi ni swin’wana leswi nenge wu endliweke ha swona. Kutani va tlhela va penda nenge leswaku wu yelana ni xipimbi hilaha swi nga kotekaka hakona.

Loko munhu a ya a tolovela ku famba hi nenge lowu, ku endliwa malunghiselelo ya leswaku a voniwa hi dokodela wa marhambu laha ku endliwaka swirho kona. Hi ndlela yoleyo, u kamberiwa ro hetelela ku tiyiseka leswaku wa swi kota ku tirhisa nenge wa yena kahle.

Vana Lavatsongo Ni Vatlangi

Loko ndzi ri karhi ndzi valanga, ndzi vone xinhwanyetana xin’wana. A xi nga chavi ku hi komba xipimbi xa xona ni voko ra xona leri xi endleriweke rona. Endzhakunyana ndzi vone xinhwanyetana lexi xi ri karhi xi tlanga ntlango wo tlula-tlula wa khadi, xi nga ri na mhaka na nchumu.

A ndzi lava ku tiva leswaku dokodela wa mina la ndzi endleleke xirho u ri yini hi vana lava nga lahlekeriwa hi nenge kumbe voko. U ndzi kombe xivokwana, a ndzi byela leswaku xivokwana lexi xi tlhomiwa ni le ka vana lavatsongo lava nga ni tin’hweti ta tsevu. Hikwalaho ka yini? Leswi swi endleriwa ku toloveta n’wana leswaku loko a kurile a ta kota ku tirhisa voko leri endliweke. Loko o ka a nga tolovetiwi hi ndlela leyi, a nga kula a kota ku tirhisa voko rin’we ntsena, naswona swi nga n’wi tikela ku tirhisa mavoko mambirhi loko se a kurile.

Ndzi kume leswaku, hi nkarhi wa Mintlango ya lava Lamaleke le Sydney, eAustralia, khampani yin’wana ya le Yuropa a yi rhumele vatlangi lava milenge ni mavoko lama endliweke. Lava a va tlanga, va nyikiwe swirho leswi mahala, naswona a ku ri ni madokodela ya lava lamaleke, man’wana a ma huma eNew Zealand ku ta pfuna hi nkarhi wa mintlango.

Swin’wana swa swirho leswi swi endleriwe vatlangi. Ndzi kombiwe xin’we. A ku ri nenge ni hlakala leswi hlanganisiweke swin’we, naswona swi endliwe hi ndlela leyi kotaka ku encenyeta nenge wa munhu loko a famba.

Leswi Koteke Ku Fikeleriwa Hi Thekinoloji Ya Manguva Lawa

Xana ku endliwa ka swirho ku ni vumundzuku bya njhani? Dokodela wa mina u ndzi byele leswaku ku ni nenge lowu lawuriwaka hi khompyuta, lowu swa sweswi wu tirhisiwaka hi munhu un’we eNew Zealand. Swi vonaka onge nenge lowu wu ni michini leyi kotaka ku fambisana ni ngati ya munhu. Leswi swi endlaka leswaku munhu a kota ku famba onge u famba hi nenge wakwe wa ntumbuluko.

Ematikweni man’wana, madokodela lama nga ni ntokoto wa marhambu ma karhi ma ringeta endlelo ro joyina xirho lexi endliweke hi ku kongoma erhambyini. Ku ni nsimbi yo hlawuleka leyi tlhomiwaka exipimbini loko va heta ku tsema xirho, nsimbi yoleyo yi tirhisiwa ku tlhoma nenge lowu endliweke. Leswi swi endla leswaku ku nga ha tirhisiwi vumba ni swin’wana swo pfuna ku nameketa nenge.

Ku karhi ku endliwa vulavisisi byo hlanganisa switwi swa miri ni xirho lexi endliweke leswaku munhu a kota ku tirhisa byongo ku lawula nenge wakwe. EUnited States ni le matikweni man’wana, ku simekiwe mavoko ya vanhu va nga ri vangani hi ku tirhisa endlelo leri, kambe lawa i maendlelo lawa vanhu va nga enerisekiki ha wona, tanihi leswi ma lavaka leswaku munhu a hanya hi maphilisi vutomi bya yena hinkwabyo.

Enkarhini wa sweswi, ku tirhisiwa fambiselo leri vitaniwaka myoelectronics loko ku endliwa mavoko. Ku ni swinsimbana leswi vuriwaka ti-electrode, leswi kotaka ku fambisa switwi leswi saleke exipimbini. Switwi leswi swi pfuniwa hi matimba ya betri leswaku swi kota ku lawula swiaki swa elektroniki evokweni leri endliweke. Thekinoloji ya manguva lawa yi kota ku tirhisa fambiselo ra khompyuta ku endla leswaku voko leri tlhomeriweke ri fambisana kahle ni munhu loyi ri tlhomeriweke eka yena.

Loko ndza ha hlamarisiwe hi nhluvuko lowu endliweke eka thekinoloji yo endla swirho, ndzi vutise dokodela wa mina leswaku xana swirho leswi endliweke swi tirha njhani loko swi pimanisiwa ni swirho swa ntumbuluko. Dokodela u vhele a pfumela leswaku swirho swa ntumbuluko i swa xiyimo xa le henhla swinene. Leswi swi endle leswaku ndzi ehleketa hi marito ya mupisalema loko a khongela Muvumbi wa yena a ku: “Ndzi ta ku dzunisa hikuva ndzi endliwe hi ndlela yo hlamarisa, leyi chavisekaka.”—Pisalema 139:14.

[Dayagramu/Swifaniso leswi nga eka tluka 23]

(Leswaku u vona rungula leri hleriweke hi ku helela, vona nkandziyiso wa kona)

[Swifaniso]

Mavoko lama tlhomiweke ya “myoelectric” ma tirhisa switwi swa misiha ni ku tirha ka wona nileswaku ma va ni matimba naswona ma kota ku khoma

[Xihlovo Xa Kona]

Mavoko: © Otto Bock HealthCare

[Swifaniso]

Endzeni ka tsolo leri endliweke hi thekinoloji ya xiyimo xa le henhla ku ni fambiselo ra khompyuta ni maginete leyi pfunaka loyi a tlhomeriweke xirho loko a ri karhi a famba

[Xihlovo Xa Kona]

Tsolo: Photos courtesy of Ossur

[Xifaniso]

Mahlangano lawa ya komba rhaba leyi tirhisiwaka ku pfala nenge ni ndlela leyi nhlololwana ri vumbekeke ha yona

[Xihlovo Xa Kona]

[Xifaniso lexi nga eka tluka 21]

Ku lunghisa nenge lowu endliweke

[Xifaniso lexi nga eka tluka 22]

Ku tlhomeriwa nenge

[Xifaniso lexi nga eka tluka 23]

Xivokwana lexi tirhisiwaka ku toloveta vana lavatsongo lava nga riki na voko ku tirhisa voko leri endliweke

[Xifaniso lexi nga eka tluka 23]

Loyi a hluleke eka mphikizano wa mpfhuka wa 100 wa timitara hi 2004 eka Mintlango ya lava Lamaleke u kote ku tsutsuma mpfhuka wolowo hi 10,97 wa tisekoni, hi nenge lowu endliweke

[Xihlovo Xa Kona]

Photo courtesy of Ossur/Photographer: David Biene

[Laha Xifaniso Xi Humaka Kona eka tluka 21]