‘Ndzi Lava Ku Tirhela Xikwembu Ndzi Nga Si Fa’

RUNGULA RA MAMIE FREE

HI 1990 ku tlhekeke nyimpi ya xin’wana-manana le Liberia. Loko nyimpi yi ri karhi yi tinyika matimba, Mamie, nhwanyana wa malembe ya 12 wa rixaka ra Ma-Krahn ni ndyangu wa ka vona va tikume va pfaleleke endlwini ya ka vona entsindza wa Monrovia. Mamie u ri: “Hi twe ku buluka hala ka vaakelani. Bomo yi fike yi ba yindlu ya vaakelani kutani yi sungula ku tshwa. Malangavi ma tlulele endlwini ya ka hina kutani na yona yi sungula ku tshwa.” Mamie, mana wakwe ni malume wakwe va sungule ku baleka tanihi leswi nyimpi a yi hisa.

Mamie u ri: “Ku nga ri kungani, ndzi twe xilo xi ndzi ba.”

“Kutani manana u ndzi vutise a ku: ‘Swi lo yini?’”

Ndzi hlamule ndzi ku: “Ku ni xin’wana lexi ndzi beke! Ndzi ehleketa leswaku i kulu.”

Hiloko Mamie a wela ehansi, a khongela a ku: “Ndzi kombela u ndzi yingisa Xikwembu. Ndzi ehleketa leswaku ndzi le kusuhi ni ku fa, kambe ndzi lava ku ku tirhela ndzi nga si fa.” Kutani a titivala.

Hi ku anakanya leswaku Mamie u file, vaakelani a va lava ku n’wi lahla eribuweni ra le kusuhi. Hambiswiritano, mana wakwe u sindzise leswaku a yisiwa exibedlhele xa kwalaho. Khombo ra kona, xibedlhele a xi nga ri na switirhisiwa leswi lavekaka swo tshungula vavanuna, vavasati ni vana vo tala lava a va vavisekile. Malume wa Mamie, loyi na yena a a vavisekile, u file vusiku byebyo kambe Mamie u ponile, a a lamale ku suka exisutini ku ya ehansi.

U ye emahlweni a mpfempfa ngati ni ku twa ku vava lokukulu. Endzhaku ka tin’hweti ta mune, madokodela ma teke X-rheyi leswaku ma ta vona lomu kulu yi tshameke kona. A yi tshame exikarhi ka mbilu ni mahahu. Vuhandzuri bya kona a byi ta tika swinene, hikwalaho mana wa Mamie u n’wi yise eka n’anga ya mintsembyana. Mamie u ri: “N’anga leyi yi ndzi tseme hi xikaringana, ivi endzhaku yi ringeta ku koka kulu hi nomu. Yi te, ‘hi leyi’ yi ri karhi yi humesa kulu enon’wini wa yona. Hi yi hakerile kutani hi tifambela.”

Kambe wanuna luya o hemba. Ti X-rheyi to hlayanyana ti kombise leswaku kulu ya ha ri kona. Kutani Mamie ni mana wakwe va tlhelele eka n’anga yoleyo, leyi fikeke yi va byela leswaku swi ta teka tin’hweti tin’wana ta kaye X-rheyi yi nga si kombisa leswaku kulu yi humile. Va tlhelele ekaya va ya rindza. Hi nkarhi wolowo, Mamie a a tirhisa vutshunguri byo hambana-hambana leswaku a dambisa ku vava loku a a ku twa. Ku endliwe ti-X-rheyi tin’wana endzhaku ka tin’hweti ta kaye. Kambe kulu a ya ha ri kona. Hiloko n’anga yoleyo ya mintsembyana yi baleka.

Se a ku hele lembe ni hafu kulu yi ri emirini wa Mamie. Hiloko xaka rin’wana ri n’wi yisa en’angeni ya xintu. Ematshan’weni yo n’wi pfuna, n’anga yoleyo yi vule leswaku eka Mamie ni mana wakwe, u kona la nga ta fa hi siku ro karhi. Mamie se a a ri ni malembe ya 13 hi nkarhi wolowo. Mamie u ri: “A ndzi tshamela ku rila. Hambiswiritano, hi siku leri n’anga yoleyo a yi ri vurile, ku hava la feke.”

Hiloko bava-ntsongo wa Mamie a famba na yena eka murhangeri wa kereke loyi a vuleke leswaku u vone xivono lexi kombisaka leswaku Mamie a nga lamatiwanga hi kulu, kambe u lo loyiwa. U tshembise leswaku loko Mamie o endla mihivahivana leyi a nga ta n’wi byela yona, u ta tlhela a kota ku famba ku nga si hela ni vhiki. Mamie wa hlamusela: “Ndzi hlambe ko tala hi mati ya le lwandle hi ndlela ya mihivahivani, ndzi titsone swakudya ndzi tlhela ndzi vumbuluka ehansi siku rin’wana ni rin’wana exikarhi ka vusiku nkarhi wo leha. Kambe matshalatshala lawa hinkwawo a ma pfunanga nchumu naswona xiyimo xa mina a xi cincanga.”

Kambe, eku heteleleni, swibedlhele swo tala swi sungule ku tirha naswona kulu leyi a yi ri emirini wa Mamie yi hetelele yi susiwile. U xaniseke nkarhi wo tlula malembe mambirhi. U ri: “Endzhaku ka loko ndzi endliwe vuhandzuri, a ndzi nga ha twi ku vava naswona se a ndzi hefemula hi ku olova. Hambileswi ndzi lamaleke, se ndza swi kota ku yima loko ndzi khomelele hi xongotelo wa milenge ya mune.”

Mamie A Hlangana Ni Timbhoni Ta Yehovha

Endzhaku ka mavhiki yo hlayanyana a endle vuhandzuri, mana wa Mamie u hlangane ni Timbhoni ta Yehovha timbirhi. Hi ku tiva leswaku n’wana wakwe u rhandza ku hlaya Bibele, u rhambe Timbhoni ekaya rakwe. Mamie u amukele dyondzo ya Bibele hi nkarhi wolowo. Hambiswiritano, endzhaku ka tin’hweti ti nga ri tingani, u tlhelele exibedlhele kutani a nga ha vonani ni Timbhoni.

Hambiswiritano, Mamie u tshame a ri ni torha ra vutivi bya Bibele. Kutani, loko murhangeri wa kereke a lava ku n’wi pfuna, u pfumerile. Etlilasini ya xikolo xa Sonto, xichudeni-kulobye xi vutise mudyondzisi xi ku, “Xana Yesu wa ringana ni Xikwembu?”

Mudyondzisi u te: “Ina. Va ringana. Kambe Yesu a nga ringani hi ku helela ni Xikwembu.”

Mamie u tibyele a ku, ‘A nga ringani hi ku helela? Leswi a swi twali. Ku ni leswi hoxeke laha.’ Leswi a a nga enerisekanga leswaku u dyondza ntiyiso wa Bibele, Mamie u hetelele a chuveke rihlampfu ekerekeni yoleyo.

Hi 1996 ku tlhele ku pfuka nyimpi eMonrovia. Mamie u lahlekeriwe hi swirho swimbirhi swa ndyangu wa ka vona naswona yindlu ya ka vona yi tlhele yi tshwa. Endzhaku ka tin’hweti to hlayanyana, Timbhoni timbirhi ti hlangane na Mamie loko ti famba hi yindlu ni yindlu. Mamie u tlhele a sungula ku dyondza Bibele. Loko a ya eminhlanganweni ro sungula, u hlamarisiwe hi ku vona un’wana ni un’wana—ku katsa ni vakulu va vandlha—va pfuna eku basisiweni ka Holo ya Mfumo. Hi ku famba ka nkarhi hi lembe rero, u tsakele ku va kona eNtsombanweni wa Muganga lowu nge “Varhumiwa Va Ku Rhula Ka Xikwembu,” ku nga nhlengeletano yo sungula leyikulu ya Timbhoni ta Yehovha leyi a veke eka yona.

Mamie u ri: “A ndzi tsake ngopfu. Timbhoni a ti rhandzana hakunene, hambileswi a ti huma eka tinxaka to hambana-hambana. Swilo hinkwaswo a swi hleleke kahle.”

A Hetisisa Ku Navela Ka Yena Ko Tirhela Xikwembu

Hi 1998 nyimpi yi endle leswaku Mamie ni mana wakwe va balekela eCôte d’Ivoire, laha a va tshama eKampeni ya Vahlapfa ya Peace Town swin’we ni van’wana lava humaka eLiberia va 6 000. Mamie u ye mahlweni ni ku dyondza Bibele ni Timbhoni naswona u endle nhluvuko hi xihatla. Ku nga ri kungani u sungule ku chumayela van’wana. Leswaku a kota ku ya entirhweni wo chumayela, vamakwavo va moya va n’wi pfune ku chovha xitulu xa yena xa lava lamaleke. Hi ndlela yoleyo Mamie u swi kotile ku nyikela vumbhoni eka vahlapfa vo tala.

Hambileswi swiphiqo swa rihanyo a swi endla leswaku swi n’wi nonon’hwela ku ya eHolweni ya Mfumo, leyi a yi ri eka tikhilomitara ta tsevu ku suka laha a a tshama kona, Mamie a a va kona eminhlanganweni hinkwayo. Hi May 14, 2000, u fambe tikhilomitara to tlula 190 a ya enhlengeletanweni yo hlawuleka ya siku rin’we leswaku a ya kombisa ku tinyiketela ka yena eka Xikwembu hi nkhuvulo. (Matewu 28:19, 20) Exikarhi ka vanhu lava a va khapakhapa mihloti, Mamie u nghenisiwe exinambyanini laha a nyuperisiweke kona. Loko a huma ematini, xikandza xa yena a xi vangama hi ntsako.

Sweswi le kampeni ya vahlapfa ya Ghana, pakani ya Mamie i ku va phayona ra nkarhi hinkwawo kumbe muchumayeri wa nkarhi hinkwawo. Mana wakwe na yena u sungule ku dyondza Bibele ni Timbhoni ta Yehovha naswona u byela van’wana leswi a swi dyondzaka. Havumbirhi bya vona va wu langutele hi mahlo-ngati nkarhi lowu tshembisiweke eRitweni ra Xikwembu laha ‘la khutaka a nga ta tlula kukota mhunti, ni ririmi ra la nga vulavuriki ri nga ta huwelela hi ku tsaka.’—Esaya 35:5-7.

[Xifaniso lexi nga eka tluka 22]

Kulu leyi humesiweke emirini wa Mamie

[Xifaniso lexi nga eka tluka 23]

Mamie a ri karhi a nghenisiwa exinambyanini leswaku a ta khuvuriwa

[Xifaniso lexi nga eka tluka 23]

A ri karhi a fambisa dyondzo ya Bibele ni mana wakwe, Emma