Leti Humaka Eka Vahlayi

Ku Pfuna Vantshwa Lava Nga Le Khombyeni (April 8, 2005) Xihloko lexi a xi ri ni rungula ra kahle hakunene. Minkarhi yin’wana swa tika ku va muntshwa, kambe swihloko swo fana ni leswi swi endla leswaku ntshikilelo wu antswa. Leri i rungula leri hi ri lavaka hakunene leswaku hi ta kota ku langutana ni “minkarhi ya mangava leyi swi nonon’hwaka ku langutana na yona.” (2 Timotiya 3:1) Switsundzuxo leswi nga le xihlokweni lexi swi ta hi pfuna leswaku hi nga phasiwi hi “marhengu ya Diyavulosi.” (Vaefesa 6:11) Ha nkhensa hi ku hi nyika swakudya swa moya hi nkarhi wa kona.

K. S., United States

Kaya Leri Baseke—Hinkwerhu Hi Hoxa Xandla (June 8, 2005) Loko ndza ha kula, vatswari va mina havambirhi a va tirha naswona mina ni vamakwerhu va mina vambirhi a hi tlanga endlwini masiku hinkwawo. Yindlu a yi tshama yi lo hliki! Ndza ha venga ku basisa yindlu ku ta fikela namuntlha. Kambe ku hlaya xihloko lexi swi ndzi endle ndzi twa onge hiloko manana hi musa a ri ku ndzi dyondziseni ku basisa yindlu. Sweswi ndzi ni vana lava kuleke, na vona a va swi rhandzi ku basisa yindlu. Ku ni swo tala leswi ndzi faneleke ku va dyondzisa swona. Xihloko lexi xi ndzi khutazile.

Y. E., Japani

Swivutiso Leswi Nga Kambisisiwaka Hi Ndyangu (May 8, 2005 hi Xinghezi) Loko ndzi vona xihloko lexi, ndzi xiririke ni mihloti. Ndzi xi kombe n’wana wa mina wa nhwanyana. Kutani u ndzi byele leswaku se u xi hlayile xihloko lexi vulavulaka hi xindzingiri lexi a xi vavisekile kutani u hlamule swivutiso haswimbirhi eka xihloko lexi.

L. S., United States

Tilayiburari—Ndlela Yo Kuma Vutivi (May 22, 2005 hi Xinghezi) Ndzi kombela ku mi byela leswaku xifaniso lexi nga le ka tluka 18 a hi xa Hosi Axubanipali wa le Asiriya. Kambe i xa Hosi Esari-hadoni wa le Asiriya.

A. W., Jarimani

“Xalamuka!” ya hlamula: Ha nkhensa ku hi byela mhaka leyi. Tanihi laha swi kombisiweke hakona eka buku leyi nge “Insight on the Scriptures,” vholumo 1 tluka 757, Esari-hadoni a a ri n’wana lontsongo wa jaha ni la tekeke xitulu xa tata wakwe Hosi Senakeribi wa le Asiriya.a

Khalendara Ya Vamaya Yo Hlamarisa (April 8, 2005 hi Xinghezi) Xihloko lexi xi ndzi susumetele ku endla vulavisisi eka Internete. Ndzi kume leswaku ku ni ku yelana lokukulu exikarhi ka khalendara ya Vamaya ni vungoma bya swilo swa le mpfhukeni. Ndzi vona onge ku humesa swihloko swo fana ni leswi swi nga endla leswaku vahlayi va tsakela vungoma ni masalamusi.

J. K., Poland

“Xalamuka!” ya hlamula: Tanihi laha swi hlamuseriweke hakona eka tluka 4 ra “Xalamuka!” magazini lowu wu “vika mahungu, wu vulavula hi vanhu va le matikweni yo tala, wu kambisisa vukhongeri ni sayense.” Leswi a swi vuli leswaku hi bumabumela leswi endlekaka eka tidyondzo toleto. Eka xihlokwana lexi u vulavulaka ha xona, hi vulavula hi Vamaya va khale, lava vuswikoti bya vona byo hlayela nkarhi byi va pfuneke ku humesa khalendara leyi pakanisaka hakunene. Leswi khalendara leyi a yi tirhiseriwa ku hlahluva—tanihi laha swi boxiweke hakona exihlokweni lexi—a swi fanelanga swi khutaza vahlayi ku dyondza vungoma bya swilo swa le mpfhukeni.

Nkarhi ni nkarhi hi kuma swivutiso leswi fanaka ni leswi mayelana ni swifaniso leswi vaka kona eminkandziyisweni ya hina. Ku fanisiwa ka swifaniso swa hava, mimfungho ya vukhongeri kumbe swin’wana leswi kombisaka vungoma a swi vekeriwi leswaku vanhu va ta lavisisa ha swona kambe leswaku va ta kota ku swi twisisa kahle leswaku swi yimela yini kutani va nga swi tirhisi. Marito yo tala ya ku nkhensa lawa hi ma kumeke ma komba leswaku swihloko swa hina ni swifaniso swa pfuna swinene.

[Nhlamuselo ya le hansi]