Leti Humaka Eka Vahlayi

Ntirhisano I Wa Nkoka eVuton’wini (September 8, 2005) Ndza pfumela leswaku loko ndzi sungula ku vona xifunengeto xa nkandziyiso lowu, a ndzi ehleketa leswaku xihloko lexi xi nge ndzi tsakisi. Kambe ndzi hlaye swihloko hinkwaswo, naswona swi ndzi tsakisile! Loko ndzi ri karhi ndzi hlaya, ndzi yime minkarhi yo tala ndzi khensa Yehovha hikwalaho ka ndlela yo hlamarisa leyi a vumbeke swilo ha yona. Swa hlamarisa hakunene ku vona ndlela leyi swiharhi swi tirhisanaka ha yona.

B. K., United States

Vantshwa Va Vutisa . . . Xana Ndzi Nga Swi Papalata Njhani Ku Tolovelana Ni Vanhu Lava Nga Riki Vanene? (September 8, 2005) A ndzi kokiwe hi munhu la nga riki ‘lonene’ loyi a a nga rhandzi ntiyiso wa Bibele hilaha ku heleleke. Rungula leri ri ndzi pfunile ku twisisa khombo ro tihlanganisa ni vanhu lava nga ni ripfumelo leri tsaneke. Swa tsakisa ku tiva leswaku Yehovha wa hi khathalela. Ndzi nkhensa mpfuno lowu fikeke hi nkarhi.

A.B.K., Zambia

Xihloko lexi xi ndzi pfunile ku vona nkoka wo hlawula vanghana lavanene. Hambileswi a swi nga ndzi oloveli, nkandziyiso lowu—lowu ndzi tshamaka ndzi ri na wona—wa ndzi pfuna. Ha nkhensa hi mpfuno ni xikhutazo lexi mi hi nyikaka xona hina vantshwa.

L. R., United States

Langutelo Ra Bibele—Xana U Fanele U Khongela Eka Wanhwana Mariya? (September 8, 2005) Ndzi xixima Timbhoni ta Yehovha hikwalaho ka mahanyelo ya tona lamanene naswona magazini wa n’wina wu ndzi pfunile swinene. Hambiswiritano, hikwalaho ka yini mi vula leswaku hi nga endli swikombelo eka Mariya? U hi vulavulela na Tatana leswaku hi ta va ni ku rhula.

E. R., Spaniya

“Xalamuka!” ya hlamula: Hilaha xihloko lexiya xi hlamuseleke hakona, a ku kona laha Bibele yi hi nyikaka mpfumelelo wo khongela eka un’wana handle ka Xikwembu. Hi ku ya hi mutsari wa Mukhatoliki tlhelo mufundhisi, Andrew Greeley, “xifaniso xa Mariya xi katsa Vukreste ni vukhongeri bya khale byo gandzela swikwembukati.” Xisweswo, ku gandzeriwa ka Mariya swi sungule eka vuhedeni, ku nga ri eka Vukreste. Leyi ku nga va ku ri dyondzo leyintshwa eka vo tala lava hlayaka timagazini ta hina, kutani ha va khutaza hinkwavo leswaku va kambisisa Bibele ku vona leswaku yi dyondzisa yini hakunene. Vo tala lava nga Timbhoni ta Yehovha a va ri Makhatoliki eku sunguleni, kambe, endzhaku ko dyondza Rito ra Xikwembu, va swi vonile leswaku Xikwembu a xi swi lavi leswaku hi xi khongela hi ku tirhisa munhu un’wana handle ka Yesu Kreste ku nga yena ntsena muyimeri wa hina. (Vaheveru 7:25) Leswaku u kuma rungula leri engeteleke, vona buku leyi nge “Xana Bibele Yi Dyondzisa Yini Hakunene”a eka Ndzima 15 leyi nge, “Vugandzeri Lebyi Amukelekaka Eka Xikwembu,” yi vulavula hi nkoka wa ku pfumelanisa leswi hi swi kholwaka ni Matsalwa yo Kwetsima.

Ku Tshama Hi Tsakile Hambiloko Hi Vabya (April 22, 2005 hi Xinghezi) Nsati wa mina u fe hikwalaho ka vuvabyi bya xivindzi hi December 2002. Ku hele tin’hweti ta kwalomu ka nhungu a ri karhi a xaniseka. Hambiswiritano, a a tshama a ri karhi a vulavula hi swilo leswi khutazaka ni ku hi rungulela hi mintokoto leyi hlekisaka. U endle sweswo ku fikela loko a fa, a a tshama a ri ni langutelo lerinene. Endzhaku ko hlaya xihloko lexi, ndzi sungule ku twisisa leswaku hikwalaho ka yini. A a fanele a tshama a tsakile ku fana na hina. Ndzi xiya leswaku sweswo swi n’wi endle a titwa a antswa ku fana na Conchi. Ndza nkhensa ku ndzi pfuna ndzi twisisa leswaku hikwalaho ka yini nsati wa mina a a endla leswi a swi endleke.

D. H., United States

Leti Humaka Eka Vahlayi Ndzi tshama ndzi xi langutele hi mahlo-ngati xihloko lexi nge, “Leti Humaka Eka Vahlayi.” Minkarhi yin’wana ndzi hlaya papila leri humaka eka un’wana kutani ndzi swi xiya leswaku ‘Na mina ndzi titwa hi ndlela leyi fanaka!’ Minkarhi yin’wana ndza tivutisa, ‘Xana yinhla leyi a ndzi yi twanga kahle exihlokweni xexo?’ Kutani ndzi hlaya xihloko xexo nakambe, hakanyingi sweswo swa ndzi tsakisa ni ku ndzi khutaza.

M. T., Japani

[Nhlamuselo ya le hansi]