Leti Humaka Eka Vahlayi

Ndlela Yo Kuma Ntirho Ni Ku Wu Hlayisa (July 8, 2005) Ndzi tsakisiwe swinene hi xiringanyeto xa n’wina xa leswaku munhu u fanele a landzelela ntirho wun’wana ni wun’wana hambiloko ntirho wa kona wu nga nyawuli. Sweswinyana a ndzi lava ku kuma ntirho wa nkarhinyana leswaku ndzi ta kuma nkarhi lowu engetelekeke wo chumayela. Kambe a ndzi lava ntirho wo karhi ntsena. Kambe ndzi kume ntirho wun’wana lowu ndzi wu amukeleke. Ntirho wa kona a wu nyawuli kambe ndzi tiyimisele ku eneriseka hi wona. Lexi tsakisaka hileswaku ndzi fika ekaya ndzi nga karhalanga kutani ndzi kota ku dyondza Bibele ya mina kahle.

M. I., Japani

Siku Ro Hlawuleka Ra May Day—Xana Ri Vula Yini Eka Wena? (April 22, 2005, hi Xinghezi) Ndzi xichudeni xa le xikolweni xa le henhla naswona nkhuvo wa May Day wu tlangeriwa lembe ni lembe exikolweni laha ndzi dyondzaka kona. Ka praktisiwa ku nga si fika siku-nkulu ra kona naswona swikolo hinkwaswo swa le henhla ni swa le hansi swi komberiwa ku hlalela leswi endliwaka. A ndzi hamba ndzi ya eka nkhuvo lowu kambe nkhuvo lowu a wu karhata ripfalo ra sesi. Xihloko lexi xi ndzi pfunile ku vona leswaku sesi a a tiyisile! Ndza nkhensa swinene. Xihloko lexi xi fike hi nkarhi wa kahle!

C. C., United States

Ku Tshama Hi Tsakile Hambiloko Hi Vabya (April 22, 2005, hi Xinghezi) Se ndzi ni malembe ya tsevu ndzi lwa ni vuvabyi bya khensa ya xiamukela-mbewu, naswona ndzi endliwe vuhandzuri ni ku tshunguriwa hi ku tirhisa tikhemikhali ko hlayanyana. Ku fana na Conchi, na mina ndzi ringeta ku seketela vandlha ra ka hina ni ku ya eminhlanganweni ni le mintsombanweni hilaha ndzi swi kotaka hakona. Vuvabyi bya khensa bya vava swinene, hikwalaho ndzi tlangela marito ya Conchi mayelana ni ndlela leyi hi nga langutanaka ha yona ni mahungu yo biha lawa hina lava khomiweke hi khensa hi tshamelaka ku ma kuma eka vadokodela. Ntokoto wa Conchi wu ndzi tiyisile hakunene!

B. F., United States

Ndzi ni vuvabyi bya nhlonge lebyi vitaniwaka lupus naswona ndzi tshame ndzi lahlekeriwanyana hi mianakanyo. Loko ndzi ri karhi ndzi hlakarhela, a ndzi ringeta ku tshama ndzi tsakile. Ku nga ri khale loko ndzi pfimbe khwiri naswona ndzi etlerisiwe exibedlhele, ndzi ringete ku endla leswi fanaka. Ndzi pfumelelana ni marito ya Conchi loko a ku: “A hi matlangwana ku vabya kambe u fanele ku ringeta ku tshama u tsakile.”

M. A., Venezuela

Ta Rivala (July 8, 2005, hi Xinghezi) Mayelana ni xihlokwana lexi a xi ku “Maphilisi Ya Tivhithamini Ni Khensa” ndzi lava ku vula leswaku mavonelo ya Dok. Sullivan tanihi laha ma tshahiweke hakona a ma pfumelelani ni mavonelo ya madokodela yo tala ya ta swakudya. Ku ni swiviko eka minkandziyiso yo tala ya sayense ni tidyondzo to tala leti kombaka leswaku nchumu lowu mi wu xaxameteke wa pfuna swinene eku siveleni—ni le ku tshunguleni—ka khensa ya muxaka wo karhi. Ndzi vona onge ku katsa mavonelo yo tano lama voyameleke tlhelo rin’we swi nga onha xiyimo xa Xalamuka! xa ku nga seketeli vutshunguri byo karhi.

A. B., Netherlands

“Xalamuka!” ya hlamula: Tanihi laha muhlayi loyi a kombisaka hakona, minkambisiso yi komba leswaku nchumu lowu ku vulavuriweke ha wona exihlokweni lexi wu pfunile ko talanyana eka lava khomiweke hi khensa. Ha tisola loko ku humesa mhaka leyi ku vange ku nga twisisani ko karhi. “Xalamuka!” a yi bumabumeli vutshunguri byo karhi. Ku tsalela vahlayi va hina rungula ro karhi hi ta vutshunguri a swi vuli leswaku ha byi bumabumela vutshunguri byebyo. Nakambe, loko hi tshaha mhaka yo karhi kumbe mutivi wo karhi, hi va hi swi tiva leswaku vanhu van’wana ni minkandziyiso yin’wana yi nga va ni vonelo leri hambaneke hi mhaka ya kona. Loko swi ta eku endleni ka xiboho xo karhi mayelana ni swa rihanyo, swi le ka muhlayi un’wana ni un’wana ku ti endlela xiboho.