Leti Humaka Eka Vahlayi

Tintshava I Ta Nkoka eVuton’wini Bya Laha Misaveni (April 8, 2005) A ndzi na marito yo hlamusela ndlela leyi a ndzi tsake ha yona hi ku endzela ntanga wa swiharhi wa Grand Tetons. Kambe ku hlaya hi ndlela leyi tintshava ti nga ta nkoka ha yona swi ndzi hlamarisile. Sweswi ndza ti tlangela swinene tintshava leti nga kona emisaveni ya hina swin’we ni Muvumbi wa hina wo hlamarisa loyi a ti endleke.

J. G., United States

Loko ndzi vona ku saseka ka ntumbuluko wa Yehovha, ndzi hava marito yo hlamusela ndlela leyi ndzi titwaka ha yona. Hambileswi va onheke ni ku thyakisa mbango, kambe swi nga ha ku tsakisa ku va etintshaveni. Ndzi tsakela ku byela van’wana leswi nga ta endleka enkarhini lowu taka, hilaha swi tshembisiweke hakona eka Pisalema 72:16.

R. C., United States

Vantshwa Va Vutisa . . . Ha Yini Ndzi Fanele Ku Endla Ntirho Wa Mavoko? (April 8, 2005) Ndzi tirha ekhampanini yo penda leyi fambisiwaka hi tatana, kambe un’wana u ndzi byele leswaku ntirho lowu ndzi wu endlaka a wu lavi leswaku ndzi tirhisa byongo. Kambe, xihloko lexi xi kombise leswaku Yesu na Pawulo a va endla ntirho wa mavoko. Sweswi ndzi khutazekile leswaku ndzi endla ntirho wa mina hi ku hiseka swinene. Ndzi lava ku tirha swinene leswaku ndzi ta kota ku tirhisa vutshila lebyi eku akeni ka Tiholo ta Tinhlengeletano ni Tiholo ta Mfumo.

M. Y., Japani

Xihloko lexi xi ndzi khutazile hakunene! Xi tlhele xi ndzi tsundzuxa leswaku xikongomelo xa hina lexikulu evuton’wini i ku tirhela Yehovha Xikwembu nileswaku ntirho lowu ndzi wu hlawulaka wu fanele wu fambisana ni xikongomelo lexi. Xihloko lexi lexinene xi endle leswaku na mina ndzi titekela goza ro endla leswi lavaka ku endliwa ekaya. Xa nkoka ngopfu, xihloko lexi xi ndzi pfune ku vona langutelo ra Yehovha malunghana ni ntirho wa mavoko.

Y. K., Rhaxiya

Vutomi Bya Hlamarisa Swinene (January 22, 2005 hi Xinghezi) Ndzi ni malembe ya 15. Etlilasini ya hina ya ntivo-vutomi exikolweni hi dyondza hi mhaka leyi khumbaka matimba ya ku gayela. Loko ndzi ye ni magazini lowu exikolweni, mudyondzisi wa mina wa ntivo-vutomi u tirhise xihloko lexi ku dyondzisa tlilasi, a kombisa swifaniso leswi nga endzeni. Endzhaku ka dyondzo yoleyo, un’wana ni un’wana u kombele magazini lowu. Xihloko lexi xi hlamusela kahle leswaku Yehovha u ni vutlhari lebyikulu. Handle ko kanakana swa n’wi fanela ku dzunisiwa. Ndzi wu langutele hi mahlo-ngati nkarhi lowu swilo hinkwaswo leswi hanyaka swi nga ta dzunisa Yehovha!

Y. B., Rhaxiya

“Loko Vanhu A Va Lo Swi Tiva!” (January 8, 2005) Ndzi ni malembe ya 17 hi vukhale naswona nkarhi ni nkarhi ndzi ehleketa hi ku ya endhawini leyi ku nga ni xilaveko lexikulu xa vahuweleri va Mfumo. Xikombiso xa David xi ndzi khutazile leswaku ndzi ya ensin’wini yo tano endzhaku ko heta xikolo. Onge mi nga hambeta mi humesa swikombiso swo fana ni leswi, leswi khutazaka. Vantshwa lava ringanaka na mina va lava ku khutaziwa nkarhi ni nkarhi leswaku va ya emahlweni ni ntirho wo chumayela.

K. O., Poland

Ndzi ni malembe ya 20, naswona ndzi havaxele mihloti loko ndzi hlaya xihloko lexi. Ndzi tivutise ndzi ku, ‘Loko ndzo fa ndza ha ri ntsongo, a ndzi lavi ku tisola hi ku va ndzi tsandzeke ku tirhela Yehovha hi matimba ya mina hinkwawo!’ Pakani ya mina i ku va muevhangheli wa nkarhi hinkwawo ku nga ri khale. Ndzi ta nghenisa xihloko lexi eka fremi ndzi xi hayeka ekhumbini leswaku ndzi nga rivali ndlela leyi ndzi titweke ha yona loko ndzi xi hlaya. Ndza nkhensa hi ku va mi kandziyisa mintokoto leyinene swonghasi.

N. N., Japani