Ta Rivala

◼ N’wexemu a ku ri lembe “leri nga hisa swinene eka Hafu ya Misava leyi nga eN’walungwini” naswona a ku ri “lembe ra vumbirhi ku hisisa xileswi emisaveni hinkwayo.” “Eka malembe ya khume lama hundzeke hi kona laha a ku ri ni malembe ya nhungu lama ri hiseke swinene [ematin’wini].”—BBC NEWS, BRITAIN

◼ Nguva ya swidzedze le Atlantic hi 2005 a yi ri ni “hasahasa” swinene naswona hi yona leyi “ku vuriwaka leswaku . . . yi onhe ngopfu” ku tlula swidzedze hinkwaswo ematin’wini. Eka swidzedze swa 14 leswi rhekhodiweke, nkombo wa swona a swi ri ni mimoya leyi a yi hunga hi rivilo leri tlulaka 177 wa tikhilomitara hi awara.—U.S. NATIONAL OCEANIC AND ATMOSPHERIC ADMINISTRATION.

◼ “Hi 1850, a ku ri ni mabuwa lamakulu ya ayisi yo tlula 150 le Ntangeni wa Mabuwa ya Ayisi wa le Glacier eMontana [U.S.A.]. Sweswi ku sele 27 ya wona ntsena.”—THE WALL STREET JOURNAL, U.S.A

◼“Ntiyiso lowu nga erivaleni hi timhaka ta ku cinca ka maxelo ya misava hileswaku a ku na tiko leri lavaka ku endla swo karhi loko ku ve tiko ri ta lahlekeriwa hi mali yo tala.”—TONY BLAIR, HOLOBYE-NKULU WA TIKO RA BRITAIN.

Xana Makhatoliki Ma Nga Famba Hi “Yindlu Ni Yindlu”?

Hi ku ya hi Cláudio Hummes, bixopo-nkulu wa le São Paulo, nhlayo ya vanhu va le Brazil lava nga Makhatoliki yi ehlile yi suka eka 83 wa tiphesente ku ya eka 67 wa tiphesente emalembeni ya 14 lama hundzeke. Bixopo-nkulu loyi u sole kereke hi ku “hluleka ka yona hikwalaho ka swivangelo swo hambana-hambana, ku hluleka ka yona ku chumayela evhangeli hi ndlela leyi pfunaka eka swirho swa kereke leswi khuvuriweke.” Hummes u ri: “Hi fanele ku fikelela lava nga ni ripfumelo, hi yindlu ni yindlu, eswikolweni ni le ka tindhawu leti nga ni vanhu vo tala, ku nga ri eka vanhu lava nga swirho swa kereke ntsena.” Phepha-hungu ra Folha Online ri vula leswaku ntirho lowu wu fanele wu endliwa hi vanhu lava nga riki vafundhisi kambe lava leteriweke ku va varhumiwa. Ku kayivela ka vafundhisi i xiphiqo xin’wana lexikulu lexi Kereke ya Khatoliki le Brazil ni le ka matiko hinkwawo ya le Latin Amerika ma langutaneke na xona.

Ku Tsarisiwa Hi Nawu le Jarimani

Eka xiboho lexi kandziyisiweke hi February 10, 2006, Huvo ya Vulawuri ya le Leipzig, eJarimani, yi endle xiboho xa leswaku Mfumo wa le Berlin wu fanele wu xiya Nhlengeletano ya Timbhoni ta Yehovha ya le Jarimani tanihi nhlangano wa mani na mani. Leswi a swi heta nyimpi ya le nawini leyi tekeke malembe ya 15 naswona yi kambisisiweke hi tihuvo to hambana-hambana le Jarimani ku katsa ni Huvo yo Endla Milawu. Tanihi nhlangano wa mani na mani Nhlengeletano ya Timbhoni ta Yehovha ya le Jarimani a yi fanelanga yi hakela xibalo naswona yi fanele yi va ni timfanelo leti fanaka ni leti kumiwaka hi vukhongeri byin’wana lebyikulu etikweni.

Vantshwa Va Le Chayina A Va Hambani Ni Mintlango Ya Le Ka Internet

Phepha-hungu ra South China Morning Post ra le Hong Kong ri ri: “Se swi tolovelekile leswaku vantshwa va le Chayina va godzomberiwa hi mintlango ya le ka Internet.” Xiphiqo lexi xa vonaka ni le ka vantshwa va le tindhawini tin’wana ta le Vuxeni to fana ni le Hong Kong, Japani ni le Riphabliki ra Korea. Phepha-hungu leri ri ri: “Vana va ya va navela ngopfu ku tshamela ku tlanga mintlango, a va vi na mhaka ni vanhu van’wana, naswona leswi swi komba vuyelo lebyi vaka kona loko vatswari va tikisela vana hi ku langutela swo tala eka vona, ni nkwetlembetano lowu nga kona wo lava ku amukeriwa eyunivhesiti.” Ku anakanyiwa leswaku vana va le Chayina va kwalomu ka tsevu wa timiliyoni va lava mpfuno leswaku va ta kota ku hlula ku godzomberiwa loku.