Ripfumelo Ra N’wana

DUSTIN u tshamile a yingisela minkarhi yin’wana loko un’wana wa Timbhoni ta Yehovha a ri karhi a dyondza ni mana wakwe Bibele. Hambileswi a ha ri ni malembe ya 11 ntsena, a a tlharihile naswona u vutise swivutiso swo tala leswi hlutekeke. Ku nga ri kungani u kombele leswaku khale ka murhumiwa loyi a a dyondzela mana wakwe Bibele a n’wi dyondzela na yena. U sungule ku byela vana lava a a nghena na vona xikolo leswi a a swi dyondza.

Dustin u sungule ku va kona eHolweni ya Mfumo ya kwalaho, naswona a hlamula loko ku vutisiwa swivutiso. Loko yena ni tindzisana takwe va endzela tata wa vona, tata wa vona u sindzise leswaku hinkwavo va ya ekerekeni. Dustin u hlamusele leswaku ha yini a lava ku ya eHolweni ya Mfumo. Tata wakwe u pfumerile leswaku Dustin a ya laha a lavaka kona.

Siku rin’wana nimadyambu loko ku hela minhlangano eHolweni ya Mfumo, mana wa Dustin u sungule ku n’wi lava. Dustin u vulavule ni mulanguteri wa Xikolo xa Vutirheli bya le Tilweni a kombela ku tsarisa exikolweni a nga n’wi byelanga mana wakwe. Mana wakwe u pfumerile. A a swi langutele hi mahlo-ngati ku nyikela nkulumo yakwe yo sungula. Kambe, hi nkarhi wolowo u sungule ku va ni switlhavi leswikulu enyongeni, kutani a yisiwa eka madokodela yo hambana-hambana leswaku ma ya n’wi kambela. Eku heteleleni, ri fikile siku ra Dustin ro nyikela nkulumo eHolweni ya Mfumo. Hi nkarhi wolowo, a a tirhisa tinhonga to xongotela. Hambileswi a a twa ku vava, kambe a nga yanga hi tona epulatifomo.

Endzhakunyana ka sweswo, ku kumeke leswaku Dustin u ni vuvabyi bya khensa ya marhambu leyi nga tolovelekangiki, leyi vuriwaka Ewing’s sarcoma. Haxawa xa kona u hete nkarhi wo tala a ri exibedlhele xa vana xa San Diego, eCalifornia. Vutshunguri byo tirhisa tikhemikhali, nyawuso, hambi ku ri ku tsemiwa nenge wa xinene ku sukela enyongeni a swi ri herisanga ripfumelo ra yena leri tiyeke ni rirhandzu rakwe hi Yehovha. Loko a tsane ngopfu lerova a nga ha swi koti ku hlaya, mana wakwe, loyi a a nga tali ku suka ekusuhi na yena, a a n’wi hlayela hi rito leri twalaka.

Hambileswi xiyimo xa Dustin xi nyanyeke ku biha, kambe a a nga tshameli ku rila-rila. A a tshama a khomekile, a famba-famba hi xitulu xakwe xa lava lamaleke a khutaza vavabyi van’wana ni vatswari va vona, ku katsa ni muvabyi loyi a a ri Mbhoni. Vatirhi va le xibedlhele a va swi vona leswaku Dustin ni muntshwa loyi un’wana la nga Mbhoni, a va nga fani ni vanhu van’wana—a va swi vona leswaku ripfumelo ra vona ra va tiyisa.

Dustin a a lava ku khuvuriwa. Kutani vakulu lava nga Vakreste va n’wi vutise swivutiso leswi vutisiwaka Timbhoni ta Yehovha leti lavaka ku khuvuriwa, hi nkarhi wolowo a a pavalale esofeni, a a tsanile, naswona a a nga swi koti ku tshama. Hi October 16, 2004, loko a ri ni malembe ya 12 ni hafu, Dustin u khuvuriwile enhlengeletanweni ya xifundzha.

Loko nkulumo ya nkhuvulo yi ri kusuhi ni ku sungula, Dustin u choviwe hi xitulu xakwe xa lava lamaleke a yisiwa laha ku tshameke van’wana lava lavaka ku khuvuriwa. Loko va komberiwa ku yima, Dustin u yime hi nenge wun’we, a ambale sudu yakwe leya xinjhinga, a khomelele xitulu leswaku a nga wi. U hlamule swivutiso swa lava lavaka ku khuvuriwa hi rito ra le henhla, leri twalaka kahle. Ndyangu hinkwawo wa ka va Dustin a wu ri kona kwalaho, ku katsa ni tata wakwe ni mana wakwe lowa muwundli. Vatirhi va le xibedlhele ni vatswari va vana van’wana lava khomiweke hi khensa lava a va ri exibedlhele na vona a va tile.

Endzhaku ka siku a khuvuriwile, u tlhelele exibedlhele. Khensa leyi ana se a yi tlulele eka marhambu yakwe hinkwawo. Loko a ya a tsana ngopfu naswona a swi vona leswaku wa fa, u vutise mana wakwe leswaku u le ku feni ke. Mana wakwe u te: “Ha yini u vutisa? Xana u chava ku fa?”

U hlamule a ku: “Doo! Ndzi to pfala matihlo, naswona loko ndzi ma pfula eku pfuxiweni ka vafi, swi ta twala onge ndzi ma pfale tisekene ti nga ri tingani leti hundzeke. A ndzi nge he ku twi ku vava.” Hiloko Dustin a hlamusela a ku, “Ndzi karhateke hi ndyangu wa ka hina ntsena.”

Eka n’hweti leyi landzeleke Dustin u file. Exilahlweni xakwe a ku ri ni madokodela, vaongori, mindyangu ya vatirhi va le xibedlhele, vadyondzisi, vaakelani swin’we ni ndyangu wa ka vona—lava a va ri Timbhoni ta Yehovha ni lava a va nga ri Timbhoni. Dustin a a kombele leswaku hinkwavo lava nga ta va kona enkosini wa rakwe va hlamuseriwa kahle hi ta vukhongeri byakwe. Mulanguteri wa Xikolo xa Vutirheli bya le Tilweni, loyi a n’wi aveleke nkulumo ya swichudeni leyi a koteke ku yi nyikela, u nyikele nkulumo leyinene ngopfu, leyi tiyisaka ripfumelo laha vanhu a va tele lerova a ku ri hava ni vuphelo bya marhi.

Matsalwa mambirhi lawa Dustin a a ma rhandza ngopfu ma tsariwe hi muchini ma nyikiwa lava va nga ta enkosini wa yena—Matewu 24:14; 2 Timotiya 4:7. Ripfumelo ni ku tshembeka kakwe ku khutaze hinkwavo lava n’wi tivaka. Hi swi langutele hi mahlo-ngati ku n’wi amukela eku pfuxiweni ka vafi.—Mhaka leyi yi runguriwe hi Mbhoni leyi dyondzeke Bibele na Dustin.

[Marito lama tshahiweke exihlokweni lama nga eka tluka 27]

“Ndzi lwe nyimpi leyinene, ndzi tsutsume pfhumba ndzi kondza ndzi heta, ndzi hlayise ripfumelo.”—2 Timotiya 4:7.

[Xifaniso lexi nga eka tluka 26]

Ehenhla: Dustin, loko a ha tihanyele kahle

[Xifaniso lexi nga eka tluka 26]

Ehansi: Loko Dustin a khuvuriwa, a ri ni malembe ya 12 hi vukhale