Leti Humaka Eka Vahlayi

Ripfumelo Ra N’wana (August 2006) Ndzi ta tsaka loko ndzi vona Dustin, ni vanhu va magidi-gidi lava feke emisaveni leyintshwa leyi nga kwala enyongeni, va ri karhi va tsutsuma-tsutsuma ni ku tlula-tlula va tsakile.

A. A., Sri Lanka

Ripfumelo ra Dustin ni xivindzi lexi a xi kombiseke swi ndzi khumbe mbilu. Ntokoto wa yena wu ndzi pfune ku ehleketisisa hi nkoka wa ntiyiso ni vutomi bya mina ni ku lwela ku rhangisa swilo swa nkoka evuton’wini. Sweswi ndza swi xiya leswaku ku va ni vuxaka lebyinene na Yehovha ni ku rhangisa swilaveko swa Mfumo evuton’wini hi wona nchumu wa nkok swinene eka mina.

M.C.V., Brazil

Mbilu ya mina a yi khapa hi ntsako loko ndzi vona ndlela leyi Dustin a amukeleke ntiyiso ha yona. Leswi a swi endleke a swi komba leswaku u rhandza ku tsakisa Yehovha ni ku tirhela van’wana. Ku fana na Dustin, na mina ndzi lava ku ‘tsutsuma pfhumba kukondza ndzi heta, ndzi hlayise ripfumelo’!

M. N., Japani

Ndzi ni malembe ya nkombo. Ndza mi nkhensa hi ku hi tsalela ntokoto lowu. Ripfumelo ra Dustin leri tiyeke eka Yehovha ri ndzi tsakisile, hambileswi a a vabya swinene. Xikombiso xa yena xi ndzi khutazile ku tirhela Xikwembu hi ku tinyiketela.

T. D., Italiya

Swilo Leswi Tsakisaka Eka Swimilana (September 2006) Ndzi hete awara ni hafu ndzi ri karhi ndzi hlaya xihloko lexi! Xa dyondzisa hakunene! Ndzi endle swifaniso swo karhi leswaku ndzi ta kota ku xi twisisa kahle. Ndzi kombela mi xiya leswaku nhlayo ya 13/21 a yi yimeli xiphemu xo hlawuleka xa xirhendzevutana kambe yi yimela xiphemu lexin’wana xa 222,5 wa ti-digri.

L. C. United States

“Xalamuka!” ya hlamula: Vahlayi va hina vo tala va be kona ku vula leswaku xiphemu xo hlawuleka xa xirhendzevutana xi kwalomu ka 222,5 wa ti-digri. Ha yini xihloko xa hina xi vule leswaku mpimo wa xiphemu xo hlawuleka i 137,5 wa ti-digri?—i xiphemu lexi fanaka lexi hlayiweke hi xindzhaku-ndzhaku. Web-site ya MathWorld yi ri: “Xiphemu xo hlawuleka xa swiluva i xiphemu lexi avaka xirhendzevutana lexi heleleke [360°] (kambe xi hlayiwa hi tlhelo lerin’wana ra xona, leswaku xi ta va ehansi ka 180 wa ti-digri).” Loko mutivi wa tinhlayo wa le Britain Dok. Ron Knott a hlamusela leswaku ha yini vativi va tinhlayo ni sayense va hlamusela xiphemu lexi hi ndlela leyi u ri: “Hi tala ku ‘vona’ xiphemu lexitsongo.” Xisweswo hambileswi xiphemu xo hlawuleka xi nga 13/21(ku tlula hafu), xiphemu xo hlawuleka hi xitalo ku vuriwaka leswaku i 137,5 wa ti-digri (a xi fiki eka hafu).

“Va Khotseriwele Ripfumelo Ra Vona” (April 2006) Ndzi ti xixima swinene Timbhoni ta Yehovha hambileswi mina ndzi nga riki Mbhoni. Ndzi hlangane ni Timbhoni to hlayanyana hi nkarhi lowu a ndzi khomiwile etikampeni ta nxaniso ta le Gross-Rosen ni le Buchenwald. Ndlela leyi a ti tikhoma ha yona a yi ri yinene ni ku tinyiketela ka tona eka vukhongeri bya tona a swi ri swinene lerova a ti xiximiwa hi vabohiwa lavan’wana hinkwavo. Hambi vatirhela-mfumo va Manazi a va tsaka hi tona. Loko Timbhoni ta Yehovha ti ta ekaya ka mina ndzi ti amukela hi mandla mambirhi.

P. V., United States