Langutelo Ra Bibele

Xana Swi Vula Yini Ku Va Mukreste?

“EKA rikwerhu, ku va Mukreste swi vula ku ya ekerekeni kan’we hi vhiki,” hi ku vula ka Kingsley la humaka eka rin’wana ra matiko ya laha Afrika. Raad, wa le Middle East, wa hlamusela: “Eka rikwerhu Vakreste va tekiwa va ri ntlawa wa vanhu lava hanyaka xilungu, lava mikhuva, ndhavuko, maambalelo ya vona ni ndlela leyi va khomaka vasati va vona ha yona yi fanaka ni ya le Yuropa ni le Amerika N’walungu.”

Kambe, xana ku va Mukreste swi vula leswaku munhu u ya ekerekeni kan’we hi vhiki kutani a landzela mikhuva yo karhi ya ndhavuko wun’wana? Kahle-kahle, xana rito leri nge “Mukreste” a ri fanelanga ri kombetela eka mahanyelo ni vutomi leswi Kreste a dyondziseke ha swona ni ndlela leyi a hanyeke ha yona?a Xana Vakreste a va hanya njhani eku sunguleni?

Ndlela Leyi Vakreste Vo Sungula A Va Hanya Ha Yona

Yesu u byele vadyondzisiwa vakwe a ku: “Mi vanakulorhi va mina loko mi endla leswi ndzi mi lerisaka swona.” (Yohane 15:14) Leswi tidyondzo ta Yesu a ti khumba vutomi bya vona hinkwabyo, vadyondzisiwa va Kreste eku sunguleni a va kombetela eka vukhongeri bya vona tanihi “Ndlela.” (Mintirho 9:2) Endzhakunyana ka sweswo, “[a] va vitaniwa Vakreste hi nkongomiso wa Xikwembu.” (Mintirho 11:26) Vito lerintshwa leri va nyikiweke rona a ri vula leswaku va pfumela leswaku Yesu i N’wana wa Xikwembu, loyi a dyondziseke vanhu ku rhandza ka Tata wakwe wa le tilweni. Mhaka leyi yi va endle leswaku va hanya hi ndlela leyi nga faniki ni ya vanhu lava a va tshama na vona.

Tidyondzo ta Kreste ti susumetele valandzeri vakwe ku landzela tidyondzo ta Bibele, leswi a swi vula ku papalata “vumbhisa, thyaka, ku tikhoma ko biha, ku gandzela swifaniso swa hava, xiendlo xa vungoma, vulala, dzolonga, mavondzo, swifafa, ku kanetana, . . . minkarhi ya ku dakwa, minkhuvo ya huwa, ni swilo swo fana ni sweswo,” hilaha Bibele yi dyondzisaka hakona. (Vagalatiya 5:19-21; Vaefesa 4:17-24) Muapostola Pawulo u tsundzuxe Vakreste va le Korinto leswaku van’wana va vona va tshame va endla swilo leswi. Hiloko a ku: “Kambe mi hlantswiwile mi basa, mi kwetsimisiwile, mi vuriwe lava lulameke hi vito ra Hosi ya hina Yesu Kreste.”—1 Vakorinto 6:9-11.

E. W. Barnes, ebukwini yakwe leyi nge The Rise of Christianity u te: “Vakreste, ematsalweni ya vona ya milawu yo sungula va hlamuseriwa tanihi vanhu lava tikhomeke kahle naswona va yingisaka nawu. Swirho swa kona a swi navela ku va vaaka-tiko lavanene ni vo tshembeka. A swi papalata swihoxo ni vubihi lebyi endliwaka hi vahedeni. A swi lava ku va vaakelani lava nga ni ku rhula ni vanghana lava tshembekaka. A swi dyondzisiwa ku va ni mianakanyo leyi hlutekeke, ku gingiriteka ni ku hanya vutomi lebyi tengeke. A swi tshama swi tshembekile hambileswi a swi hanya etikweni leri nga ni mikhuva yo bola ni mahanyelo yo biha. A swi tikhoma hi ndlela leyi tengeke swinene etimhakeni ta rimbewu: swiboho swa vukati a swi xiximiwa naswona vutomi bya ndyangu a byi tshama byi tengile.” Ku va Mukreste a swi vula sweswo, loko Vukreste bya ha sungula.

Nchumu wun’wana wo hlawuleka hi Vakreste vo sungula a ku ri ku hiseka ka vona entirhweni wo chumayela. Kreste u lerise valandzeri vakwe a ku: “Fambani mi ya endla vanhu va matiko hinkwawo va va vadyondzisiwa.” (Matewu 28:19, 20) Jean Bernardi, profesa eYunivhesiti ya Sorbonne le Paris, eFurwa, u te: “[Vakreste] a va fanele va famba va ya chumayela kun’wana ni kun’wana eka vanhu hinkwavo. Emagondzweni lamakulu ni le madorobeni, etindhawini ta mabindzu ni le makaya. Ku nga khathariseki leswaku va amukeriwa kumbe e-e. A va chumayela swisiwana ni van’wankumi. . . . A va fanele va teka riendzo, va khandziya mabyatso va ya evugimamusi bya misava.”

Vakreste Va Ntiyiso Namuntlha

Vakreste va ntiyiso namuntlha va fanele va voniwa hi ndlela leyi hlawulekeke leyi va hanyaka ha yona, hilaha va endleke hakona eka lembe-xidzana ro sungula. Hikwalaho, Timbhoni ta Yehovha ti lwa hi matimba leswaku ti yi namarhela hi ku helela misinya ya milawu leyi simekiweke hi Vakreste vo sungula. Van’wana va swi lemuka loko ti ri karhi ti endla matshalatshala yo hanya hi ku landza tidyondzo ta Bibele.

Hi xikombiso, New Catholic Encyclopedia ya pfumela leswaku Timbhoni ta Yehovha ti tiviwa ti ri “vanhu lava tikhomeke kahle swinene emisaveni.” Phepha-hungu ra Deseret News ra le Salt Lake City, eUtah, ri vule leswaku Timbhoni ta Yehovha “ti aka mindyangu leyi tiyeke ni ku pfuna vanhu leswaku va va vaaka-tiko lavanene ni vo tshembeka.” Phepha-hungu leri ri engeterile: “Swirho swa vukhongeri bya vona swi hanya hi milawu leyi tlakukeke ya mahanyelo. Swi kholwa leswaku ku dzaha, ku nwa ngopfu, ku tirhisa swidzidzirisi, ku gembula ni ku nga tshembeki etimhakeni ta rimbewu swin’we ni vusodoma, swi onha vuxaka bya munhu ni Xikwembu. Swi dyondzisa mhaka ya ku tshembeka ni ku tirha hi ku tinyiketela.”

Timbhoni ti tlhela ti byi tekela enhlokweni vutihlamuleri bya tona byo va vachumayeri va evhangheli lava tshembekaka. Loko yi bula hi mhaka leyi, New Catholic Encyclopedia yi ri: “Vutihlamuleri lebyikulu bya xirho xin’wana ni xin’wana . . . i ku nyikela vumbhoni ha Yehovha hi ku tivisa hi ta Mfumo Wakwe lowu tshinelaka. . . . Leswaku munhu a va Mbhoni ya ntiyiso, u fanele a va muchumayeri lonene hi tindlela to hambana-hambana.”

Swi le rivaleni leswaku ku va Mukreste wa ntiyiso a swi vuli ntsena ku va xirho xa byin’wana bya vukhongeri lebyi nga tala bya Vujagana. Yesu hi byakwe u vule leswaku Vakreste va mavunwa va ta engeteleka. (Matewu 7:22, 23) Timbhoni ta Yehovha ta ku rhamba leswaku u ta dyondza leswi Yesu a swi dyondziseke ni ku hanya ha swona. Sweswo hi leswi ku va Mukreste swi vulaka swona. Yesu u te: “Loko mi tiva swilo leswi, ma tsaka loko mi swi endla.”—Yohane 13:17.

[Nhlamuselo ya le hansi]

XANA U TSHAME U TIVUTISA?

◼ I vamani lava Yesu a va vuleke vanakulobye vakwe?—Yohane 15:14.

◼ Hi wahi mahanyelo lawa Vakreste va ntiyiso va faneleke va ma papalata?—Vagalatiya 5:19-21.

◼ Hi wihi ntirho lowu Vakreste va faneleke va wu endla?—Matewu 28:19, 20.

[Swifaniso leswi nga eka tluka 26]

Vakreste va ntiyiso i vachumayeri lava hisekaka, hilaha a swi ri hakona eka malembe-xidzana lama hundzeke