Xana Ku Hlongorisa Mali Swa Ku Hlakata?

LOKO wo tikuma u ri n’wankumi mundzuku, xana a wu ta endla yini? Xana a wu ta nava milenge, u tiphina hi vutomi? Xana a wu ta tshika ntirho kutani u tiphina ni ndyangu wa wena ni vanghana? Xana a wu ta sungula ntirho lowu u wu tsakelaka ngopfu? Lexi hlamarisaka, vanhu vo tala lava kumaka rifuwo ro tala a va swi endli sweswo. Ku ri na sweswo, va heta nkarhi wo tala va ri karhi va endla mali leyi engetelekeke—leswaku va ta hakela swikweleti swa vona leswintshwa kumbe leswaku va ta fuwa ngopfu.

Kambe, van’wana lava endleke sweswo va swi xiya leswaku ku hlongorisa rifuwo swi ri vavise ngopfu rihanyo ra vona, vutomi bya ndyangu wa vona ni mahanyelo ya vana va vona. Sweswinyana, tibuku, timagazini ni minongonoko ya thelevhixini ni tivhidiyo swi lemukise vanhu hi mhaka ya ku hlongorisa rifuwo, swi tlhela swi va khutaza “ku hanya vutomi byo olova.” Tibuku to hlayanyana ti kombisa leswaku ku hlongorisa swilo leswi vonakaka swi nga ku vabyisa—emianakanyweni, swi nga ku tshikilela hambi ku ri ku ku vavisa emirini.

Phela, ku karhateka hi makhombo ya ku va ni rifuwo a ku sungulanga tolo. Emalembeni ya kwalomu ka 2 000 lama hundzeke, Bibele yi te: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni. Hikuva ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.”—1 Timotiya 6:9, 10.

Kambe, xana sweswo i ntiyiso hakunene? Xana lava hlongorisaka mali ni ku tihlengeletela swilo leswi vonakaka va xaniseka hakunene hikwalaho ka swona? Kumbexana va na swona hinkwaswo leswi va swi lavaka—rifuwo, rihanyo ni mindyangu leyi tsakeke? A hi voneni.