Leti Humaka Eka Vahlayi

Ku Hela Ka Mavabyi! (January 2007) Loko mi vula leswaku vanhu van’wana va “tlanga hi mali va hakela vutshunguri lebyi nga tirhiki kumbe lebyi nga ni khombo,” swi vonaka onge mi vulavula hi matshungulelo ya xintu, hikuva xihloko lexi xi vule leswaku a swi tiveki loko ma tirha kumbe ni loko ma ri manene. Xana leswi swi vula leswaku Xalamuka! yi bumabumela matshungulelo ya xilungu leswaku hi wona lamanene? Hikuva hi ku ya hi U.S. General Accounting Office a swi tano.

G. C., United States

“Xalamuka!” ya hlamula: Ku ni matshungulelo yo tala lama a ma tirhisiwa ni ku voniwa ma ri manene, lawa hi ku famba ka nkarhi ku kumiweke leswaku a hi manene. Mhaka leyi yi tano eka mixaka hinkwayo ya matshungulelo. Mhaka ya nkoka i ku va ni vuxiya-xiya mayelana ni matshungulelo lama hi ma tirhisaka, hi tiva ndlela leyi ma hi pfunaka ha yona ni makhombo lama nga vaka kona ni ku tiyiseka leswaku matshungulelo lawa a ma lwisani ni milawu ya Bibele. Leswi swi lava leswaku munhu a tiendlela xiboho. Hi laha hi vuleke hakona ko tala “Xalamuka!” a yi bumabumeli matshungulelo yo karhi. Naswona Vakreste a va fanelanga ku sola-sola tindlela leti vamakwerhu va tihlawulelaka ku tshunguriwa ha tona. Hilaha xihloko xi kombiseke hakona a ku na vutshunguri lebyi nga ta herisa mavabyi lama nga kona laha emisaveni. I Mfumo wa Xikwembu ntsena lowu nga ta herisa mavabyi hinkwawo.—Nhlavutelo 21:3, 4.

Ndzi Ta ‘Tlula Kukota Mhunti’ (August 2006) Ku tiyisela ni ku titsongahata ka Francesco Abbatemarco swi ndzi endle ndzi tianakanyisisa. A nga pfumelanga leswaku ku lamala ka yena ku n’wi sivela ku tirhela Yehovha, kambe u tirhe hi matimba leswaku a hlula mboyamelo wo titeka a nga ri nchumu. Ntokoto wa yena wu ndzi pfune ku vona leswaku, ku nga khathariseki swiyimo leswi hi nga eka swona, hi nga swi kota ku tirhela Yehovha hi mbilu hinkwayo. Ndzi khutaziwe hi ku vona ndlela leyi ku tirhisa Rito ra Xikwembu evuton’wini bya yena swi n’wi pfuneke ha yona leswaku a cinca langutelo ra yena hilaha ku heleleke.

. G., Cambodia

Francesco a a ri ni swihinga swo tala leswi a a fanele a swi hlula. Kambe, endzhaku ko kuma ntiyiso u kote ku swi tiyisela hi vurhena ni hi ku tiyimisela. I xikombiso lexinene xa munhu la tiyimiseleke. Ndzi ni ntshembo wa leswaku mhaka ya yena yi ta khutaza van’wana hi ndlela leyi yi ndzi khutazeke ha yona.

M. D., South Africa

Xihloko lexi xi ndzi khutazile swinene! Ndzi navela onge ndzi nga vona Francesco Abbatemarco hi lawa ya mina, leswaku ndzi ta n’wi byela ndlela leyi mhaka ya yena yi ndzi khutazeke ha yona leswaku ndzi tiyimisela ku tirhela Yehovha.

J. B., United States

Ndza ku nkhensa wena Francesco, hikwalaho ka xikombiso xa wena lexinene xa ku tinyiketela. Ndzi ni ntshembo wa leswaku exiyimisweni lexintshwa u ta tlula kukota mhunti. Tiva leswaku u ni vamakwenu lava ku rhandzaka ni ku ku khongelela.

S. G., Russia