Khombo Leri Tsonaka Mutswari Un’wana Ni Un’wana Vurhongo
HEATHER na Scott i mpatswa lowu tihanyelaka kahle naswona va ni xifanyetana lexi hanyeke kahle xa malembe manharhu.a Va xi khathalela kahle xifanyetana xa vona. Namuntlha emisaveni ku kurisa n’wana a hi matlangwana. Hikuva ku ni swo tala leswi vilerisaka ni vutihlamuleri byo tala. Ku ni swo tala leswi vana va faneleke va dyondzisiwa swona! Heather na Scott va karhateka swinene malunghana ni vutihlamuleri byo karhi, ku nga lebyi: Va lava ku sirhelela n’wana wa vona eka makhombo ya ku endliwa nsele. Ha yini?
Heather u ri: “Tata wa mina a a nga ri na xinghana, naswona a a ri xilovekelo. A a ndzi bukutela naswona u hi endle nsele mina ni ndzisana ya mina.”b Vanhu vo tala va pfumela leswaku nsele wo tano wu tsona vanhu vurhongo. Hi swona swi endlaka Heather a tiyimisela ku sirhelela xifanyetana xakwe! Scott na yena u vona swi fanerile leswaku n’wana wakwe a sirheleriwa.
Vatswari vo tala va karhateka malunghana ni ku xanisiwa ka vana. Kumbexana na wena u titwa hi ndlela leyi fanaka. Swi nga endlaka wena u nga endliwanga nsele wo tano, ku fana na Scott na Heather, kambe u tshame u twa hi ta swiviko leswi tsemaka nhlana malunghana ni swiendlo leswi swo biha ku tlurisa. Emisaveni hinkwayo vatswari a va dyi byi rhelela loko va twa leswi humelelaka vana emigangeni ya ka vona.
A swi hlamarisi leswi mulavisisi un’wana wa timhaka to pfinya a vuleke leswaku ku pfinyiwa ka vana “i mhaka leyikulu leyi hetaka matimba leyi tshuburiweke enkarhini wa hina.” Kunene yoleyo i mhaka yo vava, kambe, xana ku andza ka ku xanisiwa ka vana i mhaka yo hlamarisa? Swichudeni swa Bibele a swi hlamali loko swi twa timhaka leti. Rito ra Xikwembu ri vula leswaku hi hanya enkarhini wa mangava lowu vuriwaka ‘masiku yo hetelela,’ i nkarhi lowu taleke “tihanyi,” laha vanhu va “tirhandzaka” naswona va nga “riki na xinakulobye xa ntumbuluko.”—2 Timotiya 3:1-5.
Mhaka ya ku endliwa ka vana nsele hi yona yi tsonaka vanhu vurhongo. I ntiyiso, vatswari van’wana va karhateka ngopfu loko va ehleketa hi nsele lowu vanhu va wu endlaka eka vana. Hambiswiritano, xana vatswari va nga tsandzeka ku tlhantlha xiphiqo lexi? Kumbe, xana ku ni magoza lama pfunaka lawa vatswari va nga ma tirhisaka leswaku va sirhelela vana va vona? Swihloko leswi landzelaka swi ta hlamula swivutiso leswi.
[Tinhlamuselo ta le hansi]
a Mavito ma cinciwile eka nxaxamelo wa swihloko leswi.
b Munhu lonkulu u endla n’wana nsele loko a lava ku enerisa ku navela ka yena n’wini hi tlhelo ra rimbewu. Hakanyingi mhaka yo tano, Bibele yi yi vula vuoswi kumbe por·neiʹa, leswi nga katsaka ku tlangisa swirho swa rimbewu, ku va ni vuxaka bya rimbewu, ku vula nhlambha kumbe ku endla vusodoma. Swiendlo swin’wana swa nsele, swo tanihi ku khoma-khoma mavele, swiringanyeto swa ku tikhoma ku biha hi tlhelo ra rimbewu, ku komba n’wana swifaniso swa vanhu lava nga ambalangiki, ku hlalela vanhu lava endliwaka nsele ni ku kombisa swilo swo homboloka, swi katsiwa eka swilo leswi Bibele yi swi vulaka ku “tikhom[a] ko biha” kumbe ku “endla thyaka . . . hi makwanga.”—Vagalatiya 5:19-21; Vaefesa 4:19.