Buku Yo Hlawuleka

“Bibele i buku leyi vanhu vo tala va nga na yona.”—The World Book Encyclopedia.

EMALEMBENI lama tlulaka 550 lama hundzeke, Johannes Gutenberg, la nga Mujarimani hi yena munhu wo sungula ku endla muchini wo kandziyisa, u sungule ku kandziyisa hi muchini lowutsongo. Buku yo sungula leyi dumeke leyi kandziyisiweke hi muchini wa yena a ku ri Bibele.a Ku sukela kwalaho, ku kandziyisiwe tibuku ta ntsandza-vahlayi leti vulavulaka hi timhaka to hambana-hambana. Kambe Bibele hi yona yi kandziyisiweke ngopfu ku tlula hinkwato.

◼ Ku ringanyetiwa leswaku ku kandziyisiwe Tibibele ta 4 700 wa timiliyoni (yi helerile kumbe xiphemu xa yona). Buku ya vumbirhi leyi kandziyisiweke ngopfu i Quotations From Chairman Mao, kambe nhlayo ya Tibibele leti kandziyisiweke yi yi tlula hilaha ku phindhiweke ka ntlhanu nhlayo ya tibuku leti.

◼ Eka lembe rin’wana, sweswinyana ku hangalasiwe Tibibele to tlula 50 wa timiliyoni ti helerile kumbe swiphemu swa yona. Xiviko xa magazini wun’wana xi te, “Bibele i buku leyi xaviwaka ngopfu lembe ni lembe.”—The New Yorker.

◼ Bibele leyi heleleke kumbe xiphemu xa yona yi hundzuluxeriwe hi tindzimi to tlula 2 400. Bibele yi kumeka hi tindzimi ta kwalomu ka 90 wa tiphesente.

◼ Kwalomu ka hafu ya vatsari va Bibele va hete ku tsala ka vona emahlweni ka ku velekiwa ka Confucius, mutivi wa filosofi wa Muchayina la dumeke na Siddhārtha Gautama, musunguri wa Vubudha.

◼ Bibele hi yona yi kuceteleke vanhu va ta ntivo-vuxongi ku katsa ni tinghwazi to dirowa, ta vuyimbeleri ni vatsari va tibuku.

◼ Tihulumendhe a ti nga yi lavi Bibele, vakaneti va vukhongeri va yi hisile kasi vaxopaxopi va yi xopaxope swihoxo. A ku na buku yin’wana ematin’wini leyi langutaneke ni ku kanetiwa konghasi ku fana na yona kambe yi tama ya ha kumeka ninamuntlha.

Timhaka leti boxiweke laha henhla ta hlamarisa hakunene! Ina, vuxokoxoko lebyi khorwisaka ni tinhlayo leti yi kandziyisiweke ha tona a hi swona ntsena swi tiyisekisaka leswaku ya tshembeka. Eka swihloko leswi landzelaka hi ta kambisisa swivangelo swa ntlhanu leswi endlaka vanhu va timiliyoni va tiyiseka leswaku hakunene Bibele ya tshembeka.

[Nhlamuselo ya le hansi]

[Xifaniso eka tluka 4]

Muchini wo kandziyisa wa Gutenberg ni tluka ra Bibele yakwe

[Vini va Swifaniso]

Press: Courtesy American Bible Society; page: © Image Asset Management/age fotostock