Buku Leyi Hangalasiweke Swinene Ku Tlula Hinkwato Emisaveni
“Bibele i buku leyi hlayiweke ku tlula hinkwato ematin’wini. . . . Tikopi ta Bibele leti hangalasiweke ti tele ku tlula ta buku yihi ni yihi yin’wana. Nakambe Bibele yi hundzuluxeriwe ko tala ni hi tindzimi to tala ku tlula buku yihi ni yihi yin’wana.”—“The World Book Encyclopedia.”1
HI TINDLELA to karhi, tibuku to tala ti fana ni vanhu. Ta humelela, kumbexana ti va ni ndhuma, kutani—handle ka leti nga riki tingani leti nga humiki moya—ti dyuhala ivi ti fa. Tilayiburari hakanyingi ti tirha tanihi swilahlo swa tibuku ta ntsandza-vahlayi leti hundzeriweke hi nkarhi, leti nga ha hlayiwiki, leti kahle-kahle ti feke.
Hambiswiritano, Bibele yi tlula ni tibuku leti nga humiki moya. Hambileswi yi sunguleke ku tsariwa malembe ya 3 500 lama hundzeke, ya ha hanya hakunene. I buku leyi hangalasiweke swinene ku tlula hinkwato emisaveni.a Lembe na lembe, ku hangalasiwa tikopi ta kwalomu ka 60 wa timiliyoni ta Bibele hinkwayo kumbe swiphemu swa yona. Nkandziyiso wa yona wo sungula lowu gandlisiweke hi muchini lowu rhwalekaka wu humesiwe hi muchini lowu endliweke hi Johannes Gutenberg wa Mujarimani, kwalomu ka 1455. Ku sukela kwalaho, ku kandziyisiwe Tibibele ta kwalomu ka mune wa magidi ya timiliyoni (hinkwayo ka yona kumbe xiphemu xa yona). A ku na buku yin’wana, hambi i ya vukhongeri kumbe swin’wana, leyi tshinelelaka yona.
Nakambe Bibele i buku leyi hundzuluxeriweke ku tlula hinkwato ematin’wini. Bibele hinkwayo kumbe swiphemu swa yona, yi hundzuluxeriwe hi tindzimi ni swindzin’wana swo tlula 2 100.b Vanhu vo tlula 90 wa tiphesente emisaveni hinkwayo va ni xiphemu xo karhi xa Bibele hi ririmi ra vona.2 Kutani buku leyi ya kumeka ematikweni, etinxakeni ni le swivongweni hinkwaswo.
Ndzinganyeto wa tinhlayo hi woxe swi nga endleka wu nga ku nyiki xivangelo xa matimba xo kambisisa Bibele. Hambiswiritano, tinhlayo ta ku hangalasiwa ni ku hundzuluxeriwa ka yona ta hlamarisa, ti kombisa leswaku Bibele ya tsakeriwa emisaveni hinkwayo. Kunene, swi fanerile leswaku u kambisisa buku leyi xavisiweke ni ku hundzuluxeriwa swinene ku tlula hinkwato ematin’wini hinkwawo ya vanhu.
[Tinhlamuselo ta le hansi]
a Buku leyi landzelaka yona hi ku hangalasiwa ngopfu ku ehleketiwa leswaku i xibukwana xa swifunengeto swo tshwuka lexi nge Quotations From the Works of Mao Tse-tung, laha ku xavisiweke kumbe ku hangalasa tikopi ta xona leti ringanyeteriwaka kwalomu ka 800 wa timiliyoni.
b Ndzinganyeto wa nhlayo ya tindzimi wu sekeriwe eka tinhlayo leti humesiweke hi United Bible Societies.
[Xifaniso eka tluka 6]
Bibele ya Gutenberg, hi Xilatini, i buku yo sungula leyi heleleke, leyi gandlisiweke hi muchini lowu rhwalekaka