Vantshwa Va Vutisa . . .

Ndzi Nga Papalata Njhani Ku Hlalela Swifaniso Swo Navetisa Rimbewu?

“Mufana un’wana exikolweni, elokharini yakwe a a ri ni xifaniso xa nhwanyana un’wana la nga ambalangiki. Naswona lokhara yakwe a yi ri ekusuhi ni ya mina.”—Robert.a

“A ndzi ri karhi ndzi endla ndzavisiso eka Internet wa xiviko xa le xikolweni loko ndzi kotlana ni swifaniso swo navetisa rimbewu.”—Annette.

LOKO vatswari va wena va ha ri vatsongo, vanhu a vo swi hlota kunene swifaniso swo navetisa rimbewu. Namuntlha, hi swona swi hlotaka wena. Ku fana na Robert, la boxiweke laha henhla, u nga ha tikuma mahlo ya wena ma vone xifaniso xo navetisa rimbewu lexi xichudeni-kuloni xi nga na xona. Kumbe, ku fana na Annette, swifaniso leswi swi nga humelela u nga swi rindzelanga eka Internet. Nhwanyana un’wana wa malembe ya 19, u ri: “Minkarhi yin’wana loko ndzi ri eku endleni ka ndzavisiso kumbe ndzi xava swo karhi hi Internet kumbe ndzi kamba ntsena switatimendhe swa le bangi, swifaniso swo navetisa rimbewu swo humelele, ndzi nga swi rindzelanga!”b

A swi endleki u nga hlangani na swona swifaniso leswi. Buku yin’wana yi ringanyete leswaku vantshwa vo tala va malembe ya le xikarhi ka nhungu na 16 hi vukhale va vule leswaku va tshame va hatlana ni swifaniso swo navetisa rimbewu va nga swi rindzelanga, hakanyingi loko va ri eku endleni ka ntirho wa xikolo ekaya! Ntiyiso wa kona hileswaku ku ni madzana-dzana ya timiliyoni ta ti-Website leti tameleke magidi-gidi ya swilo leswi kombisaka timhaka ta rimbewu, leswi endlaka leswaku swi olova ku pfula swifaniso swo navetisa rimbewu eka Internet. U nga ha kota ku swi pfula ni le ka selfoni. Denise wa malembe ya 16 u ri: “Swi tolovelekile exikolweni xa hina. Hi Musumbhunuku loko hi ri eku buleni u ta twa un’wana a ku, ‘Hi swihi swifaniso leswi u nga swi teka eka Internet hi selfoni ya wena hi mahelo-vhiki?’”

Leswi vanhu vo tala va hlalelaka swifaniso swo navetisa rimbewu, u nga ha tivutisa leswi, ‘Xana hakunene swi hoxile ku swi hlalela?’ Nhlamulo i ina, hikwalaho ka swivangelo swo tala. Xiya swinharhu ntsena:

◼ Vateki ni lava tekiwaka ni vahlaleri va swifaniso swo navetisa rimbewu va tisusa xindzhuti.—1 Vatesalonika 4:3-5.

◼ Loko munhu a tsakela ku hlalela swifaniso swo navetisa rimbewu a nga ngheniwa hi moya wo anakanya hi rimbewu hilaha ku hundzeletiweke ku fana ni vanhu va le masikwini ya Nowa.—Genesa 6:2; Yudha 6, 7.

◼ Hakanyingi ku hlalela swifaniso swo navetisa rimbewu swi yisa eku endleni ka xidyoho xa vuoswi.—Yakobo 1:14, 15.

Swifaniso swo navetisa rimbewu swi va onhile vanhu lava phasiweke hi swona. Xiya swikombiso swimbirhi ntsena:

“Ndzi sungule ku hlalela swifaniso swo navetisa rimbewu ndza ha ri ntsongo, naswona a swi nga ndzi oloveli ku tshika ku swi hlalela. Ku hundze malembe ndzi tshikile ku swi hlalela, kambe swifaniso sweswo se a swi dzikile emianakanyweni ya mina. Swifaniso leswi a swi suki emianakanyweni ya wena naswona u tshama u ri ni ripfalo leri nga basangiki. Swifaniso swo navetisa rimbewu swi ku susa xindzhuti naswona swi ku siya u ri xikangalafula. U ta tshama u ri eku dyeni ka mbitsi u xeva hi nhlomulo.”—Erica.

“A a ndzi godzomberiwe hi ku hlalela swifaniso swo navetisa rimbewu ku ringana malembe ya khume, kambe se ndzi ni malembe ya 14 ndzi tshikile ku swi hlalela. Kambe nisweswi, ndza ha lwa nyimpi yo papalata ku swi languta. Hambileswi ndzi hluleke mukhuva wo swi languta kambe swa ha ri kona emianakanyweni ya mina. Ndza ha swi navela ku swi hlalela. Swifaniso leswi swa ha dzikile emianakanyweni ya mina. Ndzi navela onge loko a ndzi nga tirhwexanga mpingu lowu ku sukela eku sunguleni. Eku sunguleni a swi tikomba onge a swi na khombo. Kambe sweswi ndzi tivonele hi ya mina. Swifaniso swo navetisa rimbewu swa onha, swi hombolokile naswona vanhu lava swi endlaka ni lava va swi hlalelaka swi va susa xindzhuti. Ku nga khathariseki leswaku lava swi seketelaka va ri yini, swifaniso swo navetisa rimbewu a swi pfuni nchumu.”—Jeff.

Ku Tikambisisa

U nga swi papalata njhani ku hatlana ni swifaniso swo navetisa rimbewu u nga swi rindzelanga? Xo sungula, xiya xiyimo lexi u nga eka xona.

I kangani u vona swifaniso swo navetisa rimbewu u nga swi rindzelanga?

□ A ndzi si tshama ndzi hatlana na swona □ Minkarhi yin’wana

□Vhiki na vhiki □ Siku ni siku

Minkarhi yo tala u swi vona kwihi?

□Eka Internet □ eXikolweni

□Eka TV □ Kun’wana

Xana ku ni tindlela to karhi leti u hatlanaka na swona ha tona?

Xiya swikombiso leswi landzelaka:

Xana lava u nghenaka na vona xikolo va rhandza ku ku rhumela swifaniso swo navetisa rimbewu hi e-mail kumbe hi selfoni? Loko u swi tiva leswaku va endla tano u ta vhela u susa rungula ra kona u nga ri hlayanga.

Loko u ri eka Internet, xana swifaniso leswi swi humelela loko u kambisisa rito ro karhi? Loko u swi tiva, swi ta antswa u papalata ku tsala marito wolawo loko u ri karhi u kambisisa marito eka Internet.

Laha hansi xaxameta swiyimo leswi endleke leswaku u hatlana ni swifaniso swo navetisa rimbewu.

․․․․․

Malunghana ni leswi u swi xaxameteke laha henhla, xana u ta endla yini leswaku u hunguta minkarhi leyi u hatlanaka ni swifaniso swo navetisa rimbewu u nga swi rindzelanga? (Tsala leswi u swi ehleketaka laha hansi.)

․․․․․

Xana u endla yini loko u hatlana ni swifaniso swo navetisa rimbewu?

□ Ndzi swi papalata hi ku hatlisa.

□ Ku rhandza ku tiva swi ndzi susumetela ku swi hlalelanyana.

□ Ndzi ya emahlweni ndzi swi languta hambi ku ri ku lava-lava leswi engetelekeke.

Loko u funghe nhlamulo ya vumbirhi kumbe ya vunharhu, hi yihi pakani leyi u nga tivekelaka yona malunghana ni mhaka leyi?

․․․․․

Tshika Mukhuva Wo Swi Hlalela

Van’wana lava kotlanaka ni swifaniso swo navetisa rimbewu va nga swi rindzelanga va sungula ku navela ku swi languta kutani hi ku famba ka nkarhi va nga ngheniwa hi mukhuva wo swi languta. Ku tshika mukhuva wo tano a hi matlangwana. Jeff loyi a boxiweke eku sunguleni, u ri: “Loko ndzi nga si dyondza Bibele, ndzi ringete xidzidzirisi xin’wana ni xin’wana lexi dumeke. Kambe eka swilo hinkwaswo leswi a swi ndzi godzomberile, mukhuva wo languta swifaniso swo navetisa rimbewu hi wona a wu ndzi tikela ku wu tshika.”

Loko mukhuva wo langutisa swifaniso swo navetisa rimbewu wu dzikile eka wena, u nga heli matimba. U nga wu kuma mpfuno. Njhani?

◼ Twisisa leswi swifaniso swo navetisa rimbewu swi nga swona. Entiyisweni i rhengu ra Sathana ro susa xindzhuti xa nchumu lowu Yehovha a endleke leswaku wu xiximiwa. Ku twisisa rhengu ra yena ra swifaniso leswi swi ta ku pfuna leswaku u ‘venga swilo leswo biha.’—Pisalema 97:10.

◼ Anakanya hi vuyelo bya kona. Swifaniso swo navetisa rimbewu swi dlaya vukati. Swi endla leswaku vavasati ni vavanuna va nga xiximiwi. Munhu loyi a swi hlalelaka swi n’wi susa xindzhuti. Bibele yi ri: “U tlharihile la voneke khombo kutani a tumbela.” (Swivuriso 22:3) Laha hansi tsala xikombiso xin’we xa khombo leri nga ku welaka loko wo va ni mukhuva wo hlalela swifaniso swo navetisa rimbewu.

․․․․․

◼ Tiendlele xiboho. Wanuna wo tshembeka Yobo u te: “Ndzi endlile ntwanano ni mahlo ya mina, ndzi ku, a ndzi nga ha languti vanhwanyana.” (Yobo 31:1, Bibele—Mahungu Lamanene) Laha hansi ku ni swiboho leswi u nga tiendlelaka swona:

□ A ndzi nge pfuki ndzi tirhise Internet loko ndzi ri ndzexe ekamareni.

□ Ndzi ta tima hi xihatla loko ko humelela Website leyi kombisaka swifaniso swo navetisa rimbewu.

□ Ndzi ta vulavula ni munghana wa mina la wupfeke loko ndzo tikuma ndzi vuyele eka mukhuva wa mina wa khale.

Xana u nga ehleketa hi xiboho xin’we kumbe swimbirhi leswi nga ku pfunaka ku hlula nyimpi leyi yo hlalela swifaniso swo navetisa rimbewu? Loko swi ri kona, swi tsale laha hansi.

․․․․․

◼ Khongela malunghana ni mhaka leyi. Mupisalema u khongerile eka Yehovha a ku: “Endla leswaku mahlo ya mina ma hundza ma nga swi voni swilo leswi nga pfuniki nchumu.” (Pisalema 119:37) Entiyisweni, a swi olovi ku papalata nchumu lowu tsakisaka nyama leyi nga ni vudyoho. Kambe Yehovha Xikwembu u lava leswaku swi ku fambela kahle, naswona a nga ku nyika “matimba lama tlulaka lama tolovelekeke” leswaku u kota ku endla leswi nga swinene!—2 Vakorinto 4:7.

◼ Vulavula ni munhu un’wana. Xana u ni tingana? Kumbexana u na tona! Kambe, anakanya ndlela leyi u nga ta phyuphya ha yona loko se u ti rhule ndzhwalo. Munhu loyi u n’wi byelaka u ta fana ni ‘makwenu la velekiweke loko ku ri ni maxangu.’ (Swivuriso 17:17) Ku hlawula munhu loyi u n’wi tshembaka loyi u nga tiphofulaka eka yena i masungulo yo tshika mukhuva lowu hi ku helela.

Loko u tolovele ku hlalela swifaniso swo navetisa rimbewu, tsala vito ra munhu loyi u vonaka u ntshunxekile ku n’wi phofulela mhaka leyi laha hansi.

․․․․․

Tiyiseka leswaku u nga yi hlula nyimpi yo papalata ku hlalela swifaniso swo navetisa rimbewu. Kahle-kahle, swi papalate nkarhi hinkwawo, loko u endle tano se u hlurile enyimpini leyi leyikulu. Byela Yehovha hi ta ku hlula loku, naswona n’wi nkhense leswi a ku nyikeke matimba. Minkarhi hinkwayo tsundzuka leswaku loko u papalata khombo ro hlalela swifaniso swo navetisa rimbewu, u tsakisa mbilu ya Yehovha!—Swivuriso 27:11.

Swihloko swin’wana leswi nge “Vantshwa Va Vutisa . . .” swi kumeka eka Website leyi nge, www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

◼ Xana swifaniso swo navetisa rimbewu swi wu susa xindzhuti hi ndlela yihi nchumu lowu xiximekaka?

◼ Hi tihi tindlela leti pfunaka leti nga ku sirhelelaka eka swifaniso swo navetisa rimbewu?

◼ Xana u nga n’wi pfuna njhani makwenu la nga ni xiphiqo xo hlalela swifaniso swo navetisa rimbewu?

[Xifaniso nga eka tluka 12, 13]

Xana vadyondzi-kuloni va nga ha ku rhumelela swifaniso swo navetisa rimbewu hi selfoni?