Vantshwa Va Vutisa / TIMHAKA TA MASANGU / Ndzi Nga Endla Yini Loko Ndzi Godzomberiwe Hi Swifaniso Swo Navetisa Rimbewu?
Leswi u nga swi endlaka
Twisisa leswi swi nga swona. Swifaniso swo navetisa rimbewu i ndlela yo susa xindzhuti nchumu lowu Yehovha a wu endleke leswaku wu xiximeka. Ku twisisa swifaniso leswi hi ndlela leyi swi ta ku pfuna leswaku u ‘venga swilo swo biha.’—Pisalema 97:10.
Anakanya hi vuyelo bya swona. Swifaniso swo navetisa rimbewu swi susa lava hlaleriwaka xindzhuti ni munhu loyi a swi hlalelaka. Bibele yi ri: “U tlharihile la voneke khombo kutani a tumbela.”—Swivuriso 22:3.
Tiendlele xiboho. Wanuna wo tshembeka Yobo u te: “Ndzi endlile ntwanano ni mahlo ya mina, ndzi ku, a ndzi nga ha languti vanhwanyana.” (Yobo 31:1, Bibele—Mahungu Lamanene) Swiboho leswi landzelaka i swin’wana leswi u nga tiendlelaka swona:
A ndzi nge pfuki ndzi tirhise Internet loko ndzi ri ndzexe.
Ndzi ta huma hi ku hatlisa loko ndzo tshuka ndzi nghena eka website leyi kombisaka swifaniso swo navetisa rimbewu.
Ndzi ta byela munghana wa mina la wupfeke loko ndzo tlhelela eka mukhuva wo swi hlalela.
Swifaniso swo navetisa rimbewu swa godzombela—loko u ya u swi hlalela, swi ta ya swi ku tikela swinene ku swi tshika
Khongela ha swona. Mupisalema u khongele eka Yehovha a ku: “Endla leswaku mahlo ya mina ma hundza ma nga swi voni swilo leswi nga pfuniki nchumu.” (Pisalema 119:37) Xikwembu xi lava leswaku u tshika ku swi hlalela kutani loko u khongela eka xona xi ta ku nyika matimba yo endla tano!—Vafilipiya 4:13.
Vulavula ni munhu un’wana. Hakanyingi ku hlawula munhu loyi u nga vulavulaka na yena hi mhaka leyi i goza ra nkoka leri nga ku pfunaka leswaku u tshika mukhuva lowu.—Swivuriso 17:17.
Tsundzuka leswi: Nkarhi wun’wana ni wun’wana lowu u tshikaka ku hlalela swifaniso swo navetisa rimbewu, u va u hlule nyimpi leyikulu. Byela Yehovha Xikwembu hi ku hlula koloko naswona n’wi nkhense hileswi a ku nyikeke matimba. Loko u papalata swifaniso swo navetisa rimbewu, u tsakisa mbilu ya yena!—Swivuriso 27:11.